ZAKINIU 23 - Sumi Naga CL (Re-edited) Bible (BSI)

Aqoaho lono Hapheve kemi

¹ “Timi khuu no aphighü lothi ikhive momu aphighü ghithave akeno, pa ye Ampeu hoho lo iloghi mla nani.

² “Tüqhanu momu tipaqo polo kughukomi ye tiqheli chighi kutolo Ampeu hoho lo iloghi mla nani.

³ “Ammonmi momu Moabmi ye Ampeu hoho lo iloghi mla nani. Pano polo kughukomi ye tiqheli achighiu kutolo, alholo Ampeu hoho lo iloghi mla nani,

⁴ kughengu nongu no Egypt lono ipeche kelo panongu no achuqupu ngo azü pesü nongu tsünikeu milive, eno Mesopotamia lo Pethormi Beor nu Balaam piqe no nongu müsüini peke.

⁵ Ikemu Ampeu nongu Lhou no Balaam tsa initsü moe; Tishinike züqhulo Ampeu nongu Lhou no ghukusho pesü kükümgha lo süve tsüe, kughengu Pa no nongu kimiye ke.

⁶ Nongu ye alholo panow külakishi momu kinikülü phumoni.

⁷ “Edommi jumithi moni, kughengu panongu ye nongu thiküzümi ke. Egyptmi jumithi moni, kughengu ghuthu lakhi lo nongu ye pano yeghi lo kachenami shi acheke.

⁸ Tiqheli aküthüu nguno hulauye pano kughukomi ghi Ampeu hoho lo iloghilu nani.

Aghazü lo Mithekumo

⁹ “Aghüshi lo aghazü lo akelo, nongu ye alhoksa kümtsü lono putosü lo.

¹⁰ “Timi lakhi no putho lo asamou no aphizü ijive no mithe move aye, pa ye aghazü lono khalau ipeveni, eno iloghi pemoni,

¹¹ ikemu avelau no azü kuchhuve no khetsünhe ilove kethiu no aghazü lo ighini.

¹² “Aghazü khalau a-a lakhi kutolo eno tilau kübakupujo shiwuni.

¹³ Sholepu aghulo peve no avehu shive kethiu ayeghi shole no jonhave lo.

¹⁴ Kughengu Ampeu nongu Lhou ye nongu xaphelu eno nongu u lo aghümi süve tsüniye aghazü mta lono chesü iqhoiqi acheni kehu nongu ghazü ye akimthe shimasae, tikumo aye Pa no mithekumo ithulu no nongu launo tsüghüve nosake.

Mudomgho Yezah

¹⁵ “Aqemi lakhi no pa mpeu launo pove no o lau ighi kelo, nongu ye pa mpeu tsüchile moni.

¹⁶ Pa ye nongu no akeu phughi, pa no ngoni shikeu lo ngoni. Nongu ye akipimi pa tsümoni.

¹⁷ “Israelmi kiptimi totimi khumu achineki lo kütüqhami shimoni.

¹⁸ Nongu ye kütüqha keu lono iloghi keu pisa pesü ashoqhi kümllagho shi Ampeu nongu Lhou kilo iloghi moni, kughengu hi ye Ampeu nongu Lhou zülo aphikümqhüpu ke.

¹⁹ “Pisa na, achuqupu na, kiu kiumu akighishe lono no thiküzümi püna moni, eno akighishe lumoni.

²⁰ Inaghami launo akighishe lulu nani, ikemu no thiküzümi lau ye akighishe lumoni, tishikeu lono Ampeu nongu Lhou no nongu no ngoniye akeu yeghi lo thokha nongu kümgha tsü nani.

²¹ “Nongu no Ampeu nongu Lhou lau ashoqhi shikelo süpushu moni, kughengu Ampeu nongu Lhou ye nongu launo ti khu nani, eno akipimi nongu tsü nanike.

²² Ikemu nongu no tushoqhi moaye, tipau ghenguno akipimi shimo nani.

²³ Kiu pive akeno shinike kutokupui lo, kughengu nongu kutoshi no Ampeu lau piqhive ake.

²⁴ “Nongu no nongu kisüghüu tsailu lo ilo kelo, chuni shike thaqhü chulu nani, ikemu süqhu loye süpu kevilo.

²⁵ Nongu kisüghüu ghi lu lo ilo kelo, abo lono athi muxupe chulu nani, ikemu ayevü pesü aghibo lakhimu gholu moni.