ZAKINIU 22 - Sumi Naga CL (Re-edited) Bible (BSI)

Kütau Yezahqo

¹ “No ye o thiküzüu mishitsü momu ambe ala kütau pocheghi keu ithulu pülaghi jukümghale moni. Pa lau tipau saideghive tsüni.

² Pa no o ki phivilo acheghimo, momu ampeu khuu keno nono mtha aye, o kilo sawove lo, eno tishi qhipüa no ampemi no phusü ighi kelono pa tsülo.

³ Khurha na, aphimini na, o thiküzümi no kiukiu thime pühave aghi namu nono ithulu aye, titoi shini; no ye juzüve moni.

⁴ No ye o thiküzümiw khurha momu amshitsü no alaghi lo veqhipe aghi kelo, tipau jukümghale moni, ikemu sünhe puthuni kuphuni.

⁵ “Totimi ye kiptimi phimini pepu moni, eno kiptimi ye totimi phimini pepu moni, kughengu titoi kemi ye Ampeu nongu Lhou zülo aphikümqhüpu ke.

⁶ “Nongu no asübo lo momu ayeghi lo aghau püsü lo aza no ayikhu momu ati vape aghikeu ithulu aye, aza ngo ati luve moni.

⁷ Atiqo ye luluvi, ikemu aza ye wuve pelo, tishianguno nongu kivipu shi nani eno axüshulu nani.

⁸ “Nongu no aki kithe shikelo, aki kütsüqa lo akuptu mlalo, tishikeu lono khuana no tileno veqhi iqi thive kelo adou lono akithi ji o ki shou ikughi pemoni.

⁹ “O atsaili lo axa jeli kini sümoni, tikumo aye yisükeu kümtsü adou shive nosae, nono apiti yisükeu ngo atsaithi kümagha adou shive nosae.

¹⁰ Amshitsü ngo khurha küma tsügha küqhano alu hole moni.

¹¹ Amhi ngo phepheike phi no ghoküqha keu phimini pepu moni.

¹² “Nongu phimini ashe cheku bidi lo akighikipili tsüghuda pukuni.

Kipti-toti dolo Mithekumo Yezah

¹³ “Timi lakhi no anipu luno li sasü küghüna cheno mithiuve,

¹⁴ eno ajuaje küsa pesü li nguku ghi, ‘I no totimi hipau sasü küla kelo li ye athathe kumove aghie,’ ipi aye,

¹⁵ tileno atotiu puaza no pano nga ayiliu ye athathe kepi keu michipu pesü mishiphu khagho lo sakiphemi lau süghini.

¹⁶ Eno ayiliu papu no panoqo vilo pini, ‘I no I nga pesü timi hipau kilo puwo kelaye itehi pa ye li mithi ani,

¹⁷ eno pa ye akimki iqiphe no li nguku ghi ishi piani, “Ni ye o nga ye athathe shi aghikeu michipu ithumlae.” Ikemu hi no I nga thathe michipu ke.’ Tishino aphi xakhope sakiphemi zülo qhini.

¹⁸ Tileno aphughi lo sakiphemi no timi tipau ghaqhini,

¹⁹ eno panongu no pa shou ghükayi ahu 1,100 asüchu no tipau pesü atotiu puaza tsüveni, kughengu pa no Israelmi totimi lakhi shou ajuaje küsa süghike. Tinguno alau, li ye pa nipu shi nani eno pa no xüake tivilo khilemu li sasü ixamo nani.

²⁰ Ikemu nguku akeu no kuchou shi aghive, eno ayiliu ye athathe kumove aghi aye,

²¹ panongu no li sasü papu ki hukikha lo wuno tilauno mishighüna lo kiptimiqo no atu pesü li veqhi pithiveni, kughengu li no apu ki lono kütüqhave keu vecheo Israel lo akukujopu kümla shike. Hitoi alhoksa ye nongu dolono ikhiveni.

²² “Timi lakhi no kütami nipu sazü aghi kelono küghalu aye, pama kinikujo pithiveni. Hitoi alhoksa ye nongu dolono ikhiveni.

²³ Ilimi lakhi kütami no inisüve keu no aphughi tipau lo kütami sazüve aye,

²⁴ pama sasü aphughi khagho lo ipeghi no atu pesü pamagha veqhive lo. Ayiliu no aphughi lo akeghi hakhotsü penike ighamkumo kehu, eno akiptiu no kütami nipu shipüthave kehu pithive masake. Hitoi alhoksa ye nongu dolono ikhiveni.

²⁵ “Ikemu tsala timi lakhi no aluza lono inisüve keu ilimi lakhi sholu no anguka lono li sazüve aye, akiptiu likhi pithiveni.

²⁶ Eno ayiliu shou ye kiumu shimoni; li ye akithipu kipimi kiumu shipüamoe. Kughengu aküküpna hi ye timi lakhi no pa kisüghüu heqhi pithive keu tho shive ake,

²⁷ kughengu timi huno aluza lono li sholu, eno inisüve keu ayiliu no igha namu, li xaluni kemi lakhimu kühave ke.

²⁸ “Timi lakhi no inisümo kemi ilimi lakhi sholu no anguka lono li sazü akelono küghaluve aye,

²⁹ akiptiu no ghükayi ahu 550 ayiliu papu tsüveni, eno li ye pa nipu shiveni, kughengu pa no li shipüthave ake. Eno pa küxü tivilo li sasü küghüxa mlae.

³⁰ “Timi khumu papu nipu sasü küla moni, kughengu ti ye papu shipüthave anie.