ZAKINIU 21 - Sumi Naga CL (Re-edited) Bible (BSI)

Ghikiqhi lo Xathamla keu Vehu

¹ “Ampeu no nongu tsü akeu yeghi lo timi lakhi heqhipe aluza lo aghini, eno khuu no pa heqhive keno nongu no mthaveni kelo,

² now sakiphemi ngo xaküthami no ighi no akumo-a sükümxa lo mishighüna akeqo dolo alaghi mighi juni.

³ Akumo kupunu aghikeu mishighüna lo sakiphemi no kuokhasü pipe mphikeu mishi lhothe lakhi luni.

⁴ Panongu no amishi sasü azü qowu akeu akhila lo iqi no ayeghi hole mphi momu kiumu shosü mphi ke-a lono amishi kuo hechheve tsüni.

⁵ Tishino Ampeu nongu Lhou no Pa qe penike eno Pa je lono kümghatsü penike kishelu keqo Levimi achinemi no ighi no panongu tsa vecheo aküküpna eno hekiqhi jeli xatha tsüni.

⁶ Timi heqhi püaghi ke-a lono mishighüna akupunuu shi aghikeu lo sakiphemi kümtsü no akuo hechheve tsükeu mishi shouno pano u mütsüveni,

⁷ eno panongu no ishi thopi shini, ‘Ningu ye timi hipau heqhimoe, eno pa heqhi aghi keumu ithumlae.

⁸ O Ampeu, Ow timi Israelmi Nono xaphelu keqo ghenguno hi lokichile ikhilu tsülo, eno pimiha ji peleve keu kipimi Ow timi Israelmi shou pukutsü kevilo.’

⁹ Hitoi Ampeu zülo kiu no achipi keno ti shikeu lono pimiha ji peleve keu xine nongu dolono shipühaveni.

Akughumi Totimi sasü Küla

¹⁰ “Nongu no aghü shiwu kelono Ampeu nongu Lhou no tokulu tsüno akughumi küghalu kelo,

¹¹ akughumi gholo totimi ajukivi ithulu no li pesü o nipu shinishi kümsü no,

¹² li sasü o kilo ighive aye, li ye akütsüsa miyeve eno aumütsü yeveni.

¹³ Li küghalu kelo pepu chekeu phimini kiliveni, eno o ki lono aqhi lakhi kutolo li puaza ghenguno mloqa pelo. Tithiuno nono li sasü küghünalu nani.

¹⁴ Ikemu nono li lunishi move aye li pelo wuve pelo, nono li shipüthave akehu no ye ame lono li jemoni, momu aqüaxemi shi li peitha moni.

Anoghiu Mheghi

¹⁵ “Timi lakhi no anipu kini luno lakhi kimiye eno lakhiu ye kimiyemo, eno pamagha anuli punu kelo pa no kimiye mokeu nipu no anoghiu shive aye,

¹⁶ pa no atianuli dolo amheghi kijetsü ke ghuloki lo pa ye pa no kimiye chekeu nipu nu lau anoghiu mheghi tsüve no kimiye mokeu nu anoghiu kuchou kileve moni.

¹⁷ Ikemu pa ye amheghi saje kini pesü pa no kimiye mokeu nipu nu anoghiu tsüni, kughengu anu tipau ye pa kükakumto xathi atüghüu ke, eno anoghiu chipiu ye paw ke.

Hekibide Nu

¹⁸ “Timi lakhi no kuthovi eno hekibide nu aghini, eno apuaza no shikümzü sakiyi keu ini tsümo aye,

¹⁹ pa puaza no mishighüna khile acheni keno tipa khagho lo sakiphemi zülo pa sawuni,

²⁰ eno pama no mishighüna lo sakiphemi vilo pini, ‘Ni nu hipau ye kuthovi eno hekibide; pa ye ni gholu chemoe; akive tholo eno shokümzümi.’

²¹ Tileno mishighüna lo küami kümtsü no atu pesü pa veqhiveni. Hitoi alhoksa ye nongu dolono shipühave lo eno Israelmi kümtsü no chilu no msave nani.

Tshüqhive keu Timi ye Müsüinivae

²² “Timi lakhi no akithipu kipimi shive no nongu no asübo lono pa tshüqhi pithive aye,

²³ pa kumo ye puthotsü tishi asübo lo qhimoni, ikemu tipa tsalani no pa shiqhoveni, kughengu tshüqhive keu timi ye Alhou no müsüinivae. Ampeu no nongu mheghi shitsü akeu yeghi tino shipüthave moni.