ZAKINIU 20 - Sumi Naga CL (Re-edited) Bible (BSI)

Aghükishi Yezah

¹ “Nongu no aghü küpüghü wukelo, now khurshi ngo khurkulu eno ghüshimi nguno alau ithulu namu msa kevilo, kughengu Ampeu khuu Egypt lono nongu xaphelu keno nongu Lhou no nongu gholo anani.

² Nongu no aghüshiqa kupunuve kelo, achineu no azüu ighi no ghüshimi vilo ishi pini,

³ ‘Inilo, O Israel, ishi tsala lo nongu ye aghümi sasü küpüghü nike cheni, amlo loti kevilo. Msa kevi, amlo hauve kevi momu pano jukichive kevilo,

⁴ kughengu Ampeu nongu Lhou no nongu züqhushi aghü shinike no gholo wucheni eno tokulu nongu tsü nani.’

⁵ Tishino kijemi no timiqo lau sheshuni, ‘Hile khuana aki shiqhi püani kemu ikhiphekütsü shimphi keshea? Pa ye aki lo wolu nani, tikumo aye aghüshi lono thiveni kelo kütami no pa ki ikhiphekütsü shimasa niae.

⁶ Hile khuana atsailu chipe qhipüani püzü tipa xathi chulu mphi keshea? Pa ye aki lo wolu nani, tikumo aye pa no aghüshi lono thiveni kelo, kütami no axathi chuniae.

⁷ Hile khuana anipu inisüve kemi anio? Pa ye aki lo wolu nani, tikumo aye aghüshi lono thiveni kelo kütami no atotiu sasü külaniae.’

⁸ Kijemi no timiqo vilo itaghi pini, ‘Hile khuana msa momu amlo loti ani keshea? Pa ye aki lo wolu nani, tikumo aye pa no kütami mlo ghi shikulotive tsü nosae.’

⁹ Kijemi no ghüshimi vilo pive kethiu, timiqo shou zatsümi süsüve lo.

¹⁰ “Kughou nongu no mishighüna lenike kupunu ighini keno, külakishi bekütha tsüju paghi lo.

¹¹ Panongu no külakishi lono khochile no khagho khaqhitsü aye, tile timi kümtsü küghape nongu kümla shino nongu qe pelo.

¹² Ikemu panongu no külashi mono nongu sasü aghüshi aye, mishighüna tipau khasü luveni.

¹³ Kughou Ampeu nongu Lhou no nongu pelo aphughi tipau lepeni keno, tile kiptimi kümtsü pithiveni.

¹⁴ Ikemu nongu sala hakhokulu totimi ngo atianuli, atsüaqu eno aphughi lo thime kümtsü luvelo. Ampeu no nongu tsükeu hakhokulu thimeqo peitha lo.

¹⁵ Shiye hilau akeqo phughi kumono nongu nguno putosüu akeu phughiqo shou hitoi shilo.

¹⁶ Ikemu Ampeu nongu Lhou no nongu tsü akeu mishighünaqo loye atuthu she aghike thaqhü lakhimu püxü moni,

¹⁷ ikemu Ampeu no azah nongu tsüke toi Hittimi, Amorimi, Canaanmi, Perizimi, Hivimi eno Jebusimi, qhoi püghave lo,

¹⁸ tishikeu lono panongu no pano lhouqo lau aphikümqhüpu khuaye shiche keqo nongu shikamo nani, eno nongu pelo Ampeu lau axine shipemo nani.

¹⁹ “Nongu no mishighüna lakhi sasü aghüshi no ado kushuo tipau khasü kepu shive namu amüghü pesü tile axathiboqo yeqhi moni. Axathiqo chulo ikemu abo yeqhi moni. Asüboqo ye timi kesheno nongu ye tipaqo khasü masa keshea?

²⁰ Nongu no axathi sübo kumo kepi ithi akeqo likhi yeqhipe aphughi lelu moke kutolo akala ghepukulu kepushi peitha lo.