ZAKINIU 2 - Sumi Naga CL (Re-edited) Bible (BSI)

Asayeqha lo Chekeu Mpe

¹ “Tithiu Ampeu no I vilo pike toi ningu no tsüghüsü Akuhu Züghi küdau asayeqha lo wuve. Atsala kutomo ningu no Seir Toghi homxasü wue.

² Tile Ampeu no I vilo pi,

³ ‘Nongu ye ado kushuo hi ato yeghi homxavae. Itehi ye ahuu küdau wulo,

⁴ eno timiqo azah tsülo, “Nongu ye no thiküzümi Esau laghami lughi kathasü wuniye ani. Panongu ye Seir lo acheni, eno nongu jumsa nani. Ikemu kutokupui lo.

⁵ Panongu sasü aghüshi kevilo, kughengu I no Seir Toghi pesü Esau mheghi shivetsü kehu Ni ye pano yeghi apukhu kinepu qhemi mu nongu tsümo nani.

⁶ Nongu ye pano launo chusho kepu achuqupu ngo azü qhümasa nani.

⁷ Ampeu nongu Lhou no nongu kümla thokha kümgha tsüe. Nongu no hi asayeqha katha chekeu Pa no ithi ani. Hi ampe lhobidi Ampeu nongu Lhou no nongu gholo ighive ake nongu ye kiumu püqümoe.”’

⁸ Ikehu ningu no ni thiküzümi Esau laghami Seir lo akemi launo eno Arabah, Elath ngo Ezion-geber laghi lono putosüu wuve. “Ningu no tsüghüsü Moab sayeqha küdau wuve.

⁹ Ampeu no I vilo pi, ‘Moabmi sasü aghüshi kevilo, kughengu I no Ar pesü Lot mheghi shitsü kehu Ni ye pano yeghi kitilamu nongu tsümo nani.’

¹⁰ (Inahuu ye Emimmi no tile xüche, panongu ye Anakimi toi ighono sübosüghi eno kütsasae.

¹¹ Anakimi toi panongu ghi Rephaim ipiche, ikemu Moabmi no panoqo pesü Emim kutsü ke.

¹² Horimi ghi Seir lo xüche, ikemu Israelmi no Ampeu no tsükeu yeghi lono pano ghümi hapupove ke toi, Esau laghami no pano haleve no kütsave, eno pano yeghi lo xüsüve.)

¹³ ‘Itehi ithu no Zered ghoki katha ikulo.’ Ikehu ningu no Zered ghoki katha ikuve.

¹⁴ Ningu no Kadesh-barnea qhive no Zered ghoki kathake kutolo ampe shighi-tache luve, eno Ampeu no tushoqhi ketoi, tipa tiqhelimi aghükishimi kümtsü thikhave.

¹⁵ Kughengu kuchou no Ampeu no aghazü lono pano shipühave moke kutolo mlache.

¹⁶ “Aghükishimi thaqhü thive kethiu,

¹⁷ Ampeu no I vilo pi,

¹⁸ ‘Ishi no nongu ye Ar lono Moab lughi kathani.

¹⁹ Kughou nongu no Ammonmi yeghi kathani keno, pano kijipüsa momu sasü aghüshi kevilo, kughengu I no Ammonmi yeghi pesü Lot mheghi shivetsü kehu Ni ye kitilamu nongu tsümo nani.’

²⁰ (Tipa qha ye Rephaim yeghi, pano no tile xüche—ikemu Ammonmi no pano pesü Zamzummim ipi kuche—

²¹ panongu ye Anakimi toi sübosüghi eno kütsasa; ikemu Ampeu no Ammonmi zülono panongu kütsave no Ammonmi no tile xüsüve.

²² Hi ye Ampeu no Seir lo Esau laghami akeqo zülono Horimi kütsave no pano pelo ishi kutolo tile küghüna peke toike.

²³ Avvimi aphu lo küxümi khunoqo Gaza kutolo ache keno, panongu ye Caphtor lono ighi kemi Caphtormi no leve no pano-a lo xüsüve.)

²⁴ ‘Ithu no Arnon Khila lo wulo. I no Heshbon lo Amorimi kükau Sihon eno pa ghakhu pesü nongu u lo süve tsüae. Ilo qhasü lulo eno pa sasü aghü shilo.

²⁵ Ishi tsala nguno I no atsütsü qholo nongu ghili chilu kemi ashiaye kümtsü pelo nongu msauve peni eno nongu zülo khokhoshi peni.’

Akükau Sihon Theqhive

²⁶ “Ikehu I no Kedemoth lono aghinimi hape Heshbon kükau Sihon lau alakishi tsa pi puwuke:

²⁷ ‘I pelo no yeghi katha wulu pelo. Ni ye vejoi ala züsü wuveni eno piyiumu ajeumu tsüghümo nani.

²⁸ I no chusho kepu nono achuqupu eno azü ame lono jetsülo. I pelo apukhu lono katha wuluke likhi shipelo.

²⁹ I no Jordan kathasü Ampeu ni Lhou no tsü akeu yeghi lo ilo moke kutolo Esau lagha no Seir lo, eno Moabmi no Ar lo pulotsü ketoi shitsülo.’

³⁰ Ikemu Heshbon kükau Sihon no ningu pelo pa ghakhu katha pemoe, kughengu Ampeu nongu Lhou no pa pelo kuthovi eno hebideve pe, tishikeu lono Pa no ishi kutolo tishi acheke toi panoqo pesü nongu u lo süvetsü niye ke.

³¹ Ampeu no I vilo pi, ‘Julo, I no Sihon eno pa yeghi nongu tsü thuvae. Pa yeghi qhasü thulo eno ngoluve lo,’

³² Tileno Sihon no paw timi kümtsü sasü aghü shinike Jahaz lo ipeghi.

³³ Ikemu Ampeu ni Lhou no pa pesü ningu u lo süvetsü eno ningu no pa eno pa nuli ngo timi kümtsü leluve.

³⁴ Tipa tüqhüdo lono ningu no pa phughi kümtsü leluve no kiptimi, totimi eno atianuli lakhimu püxü mono pithive tsü.

³⁵ Pichepighi likhi aghüshi lono hakholu keqo gholono luvetsü.

³⁶ Arnon Khila mtsü lo Aroer, eno akhila lo aphughi lono Gilead kutolo ni ghenguno akumto phughi lakhimu kühave. Ampeu ni Lhou no kümtsü ningu tsüve.

³⁷ Ampeu ni Lhou no wukevi lopi azah tsüke toi nongu ye Ammon nuli yeghi, ti ye Jabbok ghoki mkü thaqhü eno ato yeghi lo mishighünaqo phivilo likhino wumo ke.