ZAKINIU 19 - Sumi Naga CL (Re-edited) Bible (BSI)

Itshükulupu Phughi

¹ “Ampeu nongu Lhou no shiye khunoqo yeghi pesü nongu tsü ani keno tipaqo kütsave no nongu no panow mishighüna ngo akiqo lo ngoluve kethiu,

² nongu ye Ampeu no nongu tsü akeu yeghi lo mishighüna küthü kishephe lo.

³ Ampeu no nongu tsü akeu ghakhu pesü saje küthü shi aqhemi lono kijetha lo, tishianguno timi hekiqhimi pelo mishighüna tipaqo lo powo ngolu peni.

⁴ “Hino hekiqhimi pelo pa ampi süsholu penikeu laghi. Tsala timi lakhi no inahuu ye kiumu mithikile keu kühano kütüngülu püzü pa kisüghüu pithive aye,

⁵ ti ye timi lakhi no pa kisüghüu sasü aghasü lo asü gheniye wukelo, amüghü hejope pa kisüghüu pithive aye, pa ye aphughi hipano küthü dolo lakhi lo powulu nani eno pa küxü xalu nani.

⁶ Alaghi no shulove aye, akithiu no bolomi no amlo kushu lono pa hasü ighi no pithi küzü kumomu pithive nosa, kughengu pa ye inahuu ye kiumu mithikile keu kühake.

⁷ Tighenguno I no nongu vilo aphughi küthü qhilopi azah tsü ani.

⁸ Tsala Ampeu nongu Lhou no nongu puasüqo vilo pi püake toi nongu ghakhu pekhotsü no nongu puasüqo tsünie pikeu yeghi kümtsü nongu tsüve aye,

⁹ nongu ye mishighüna küthü gholo itaghi ala küthü süküphani. Ishi tsala lo I no azah nongu tsü akeu kümtsü papelu, Ampeu nongu Lhou kimiyelu eno Pa laghi lo cheche aye, Pa no piqhike toi ayeghi nongu tsü nani.

¹⁰ Hi shilo eno Ampeu nongu Lhou no amheghi shi tsükeu yeghi lo pimimo kemi ji pelemo nani, eno aji pelekeu ngusü nongu shou ikughi monani.

¹¹ “Ikemu milakhi no pa kisüghüu mithi kelauno khea püzü heqhive no mishighüna hipaqo lo poilove aye,

¹² aphughi lo sakiphemi no pa saghi no akithiu no bolomi amkhü kulumi tsüve no pa pithive peni.

¹³ Pa kimiye qhiyi moni, ikemu Israel lono pimimo kemi ji pelekeu ngusü ikhive lo, tishianguno nongu kivipu shilu nani.

Amheghi Lughiqo

¹⁴ “Ampeu nongu Lhou no nongu pelo amheghi shilu penike tsü akeu yeghi lo nongu ye akisüghümi lughi, apuasüqo no atu shokeu pekiqe kevilo.

Thopimi Ghenguno Ayezah

¹⁵ Thopiu lakhi shepe likhi ye pimive keu no kiukiu shi püaghimu luzülae. Akipimi tsükulupu ghenguno akimkheu no thopimi kini momu küthü aghi masae.

¹⁶ Tsala axeküsü thopiu no milakhi shou akipimi tsü aye,

¹⁷ pama kinikujo achinemi ngo tipa ghuloki lo hiyam lo akemi xaküthami eno Ampeu zülo ighini.

¹⁸ Xaküthami no tsaqüi phujuni eno tsala thopiu no akimki lono pa thiküzüu shou thopi shiaghi aye,

¹⁹ pa no nguku akeu timi huno aghime ithulu kepushi akeu pa shou pukuveni. Hitoi alhoksa ye nongu gholono ikhiveni.

²⁰ Tileno kümtsü no kiu shive keno chilu no msave nani, eno khunomu alhoksa tikithipu shikithe monani.

²¹ Pa kimiye qhiyi jumoni. Aküxü theli lo aküxü, anhethi theli lo anhethi, ahu theli lo ahu, au theli lo au, eno apukhu theli lo apukhu ke.