ZAKINIU 18 - Sumi Naga CL (Re-edited) Bible (BSI)

Achinemi ngo Levimi Saje

¹ “Levimi achinemi eno Levi laghami thaqhü ye ayeghi saje lumo nani momu Israel lo amheghi kühae. Panongu ye Ampeu lau achuqupu kümllagho tsükeu no pano mheghi shi nani.

² Panongu ye pano thiküzümi gholo amheghi ighimoni; Ampeu no panongu mheghi ke, ti ye Ampeu no tushoqhive keue.

³ Kughou amshitsü momu ambe pesü aghakishi kümlla shikeno, achinemi saje ye hike: abi ngo amkhü kini eno akive.

⁴ Now athi, atsaizü, eno thazü atüghüu eno ambe mhi gho kelo atüghüu ye achinemi tsüveni.

⁵ Kughengu Ampeu nongu Lhou no ashiaye kümtsü gholono Levimi pelo achinemi shi pülhapuju pa qe penike kishelu ke.

⁶ Levimi lakhi no Israel lo pa no achekeu phughi qhive no khile khilemu Ampeu no kishetsü ke-a lo wuve,

⁷ eno pa thiküzümi kütami no Ampeu qe aketoi, pa ghi Ampeu je lono huthu aye,

⁸ pa pu mheghi jelu keu gholono, pa ye achinemi kütami qhemi achuqupu ithulu masae.

Aphikümqhüpu Kümla

⁹ “Ampeu nongu Lhou no tsü akeu yeghi lo nongu no iloghive kelo, nongu ye shiye tile akeqo no aphikümqhüpu kümla shiche keqo pape moni.

¹⁰ Nongu tianuli pesü akiptia lono piti mlla moni; now timiqo ye hipaqo pepimhe moni, asakiqhi, asheazü tsa kipi, atumu, eno küdüu,

¹¹ momu ajojigha kipe, kithixashe, eno kithimi küsütsa keu,

¹² hipaqo shikemi ye Ampeu zülo aphikümqhüpu ke. Hi ghenguno nongu nhethe lono Ampeu Alhou no shiye hipaqo hapheve ani.

¹³ Nongu ye Ampeu zülo tukutiye kühani,

¹⁴ kughengu shiye hi hapheve niye akeqo ye asheazü tsa kipimi ngo asakiqhimi tsa papeche. Ikemu Ampeu nongu Lhou ye nongu pelo tishi pemoe.

Moses Toike Tungkupu

¹⁵ “Ampeu nongu Lhou no I toike tungkupu lakhi nongu athiküzümi lau puwu nani, nongu ye pa gholu masae.

¹⁶ Kughengu nongu no Horeb lo kumqo ake tsala lo Ampeu launo laju keu tsa ishi pike, ‘Ningu ye thive nosake, ni pelo Ampeu ni Lhou sütsa chilupe kevi eno ami kije ithulupe kevilo.’

¹⁷ Ampeu no I vilo pi, ‘Panongu no pi akeu ye achipie.’

¹⁸ I no o toike tungkupu lakhi pano thiküzümi lau puwu nani. I no pa kichi lo I tsa sütsü no pa no I no azah tsükeu kiqi lono thokha panongu vilo pi nani.

¹⁹ Pa no I je lono pi kelo khukhumu pa gholumo keu ye Ni ampi no ghime nani.

²⁰ Ikemu tungkupmi khuu no I zakütsü lono kumono I je lono pini momu alhou kütauqo je lono pini keno pa ye thinani.

²¹ Nongu mlo lono, ‘Ningu ye kishino Ampeu ye pi püamoe pi ithini kea?’ ipi kümsü aghi aye,

²² tungkupu lakhi no Ampeu je lono pi kelo, tino shikupu move aye, ti ye Ampeu no pikeu tsa kumoe; tungkupu huye kümsükuju lono pivae. Ikehu nongu ye pa msa kevilo.