ZAKINIU 17 - Sumi Naga CL (Re-edited) Bible (BSI)

¹ “Amshitsü ngo ambe tukutiye akeu pesü Ampeu nongu Lhou lau aghashi moni, kughengu ti ye Ampeu nongu Lhou zülo aphikümqhüpu ke.

² “Ampeu nongu Lhou no nongu tsü akeu phughi lakhi lo kiptimi na totimi namu AMPEUw puloshoqhi shipixi keu vecheo Ampeu nongu Lhou zülo alhoksa shive no

³ kütau lhou qeuve eno mllauve no I no lakha chekeu khetsünhe, aqhi, momu ayepuqo mllauve aye,

⁴ nongu no hi chilu kelo tsaqüi kighinikile juni, eno tsala tino kuchou shive aghi eno aphikümqhüpu hitoike Israel lo shive aghi aye,

⁵ tileno kiptimi totimi khuu no hi alhoksa shi keno, pa sasü aphughi khagho lo ipe no atu pesü veqhi pithive lo.

⁶ Thopimi kini momu küthü shepe lono khuu no akipimi shive keno, tipau pithive lo; thopi lakhi vecheo likhino timi pithi moni.

⁷ Thopimi paghi no atu pesü veqhini, tithiu no kütami no atu pesü veqhini. Hipa ghola lono alhoksa nongu dolono shipühave lo.

Achinemi ngo Xaküthami

⁸ “Tsala timi pithive keu, momu shiküpsa ghenguno atsa kükügha kushokütsüpu shive no nongu phughi loye ti xatha kümlapu shive aye, Ampeu nongu Lhou no kishetsü ke-a lo wulo.

⁹ Levimi achinemi ngo tipa ghuloki lo khuu no küghaküthau shi hiyam peitha aghini keno tipaqo vilo pino panongu no xatha tsüni.

¹⁰ Ampeu nongu Lhou no kishetsü ke-a lono panongu no xatha tsüke toi shilo, nongu ye thokha panongu no pikeu kiqi lono shinike kutokupui lo.

¹¹ Panongu no mijetsü eno shuphe tsükeu kiqi lono shilo. Nongu ye xakütha tipau lono ajeumu piyiumu tsüghüve moni.

¹² Timi khuu no ighü mono achineu eno küghaküthau Ampeu nongu Lhou qeche keu hebideni keno pithive lo. Hipa ghola lono alhoksa ye Israel lono ikhive lo.

¹³ Timi kümtsü no ti chilu no msave nani eno khunomu tikithipu shikithe mo nani.

Israel Kükami Vehu lo Ayezah

¹⁴ “Ampeu nongu Lhou no tsü akeu yeghi lo amheghi shi ngoluve kethiu nongu no, ‘Ningu sükümxa lo shiyeqo toi, ningu ghi akükau süküsü shini,’ ipiuve aye,

¹⁵ nongu ye Ampeu nongu Lhou no kishe tsükeu timi pesü nongu kükau shini. No thiküzümi dolo lakhi no akükau shipelo, ikemu inaghami ye pesü akükau shimoni.

¹⁶ Akükau ye khurshi kutomo pa sala qhimoni, momu khurshi qhünike Egypt lo paw timi pelo idewo pemoni, kughengu Ampeu no ishi nongu vilo pivae, ‘Nongu ye khilemu tipa laghi lo idewo moae.’

¹⁷ Pa mlo tsüghüsü wuve nosake pa ye anipu kutomo lumoni, eno pa sala ameshoyi ngo ghükayi akumou shi hekütsü moni.

¹⁸ “Kughou pa no kükalakhü lo iqani keno, pa ye Levimi achinemi no puloza tsüno pa sala kaku lo Ayezah hipaqo yepe qhini.

¹⁹ Kaku tipau ye pa phivilo qhini, eno pa küxü tivilo phini, tishianguno pa ye ayezah eno akhuaye kümtsü pelu keu vecheo Ampeu nongu Lhou sümsani keu shikalu nani,

²⁰ eno pa mlo ye pa thiküzümi nguno akuchuquu shi kümsümo eno Ampeu no azah tsükeu lono ajeumu piyiumu tsüghüve monani. Pa eno pa kibolomi ye ado kushuo pa kükaqha lo ayepelu nani.