ZAKINIU 16 - Sumi Naga CL (Re-edited) Bible (BSI)

Hechekulu Ghulhu

¹ “Abib qhi lo Ampeu nongu Lhou lau Hechekulu ghulhu shilo, kughengu tipa qhi putho lono Ampeu no Egypt lono nongu saipeghi ke.

² Ampeu nongu Lhou no Pa je ghenguno kishetsü ke-a lono now atsüaqu loji lono Hechekulu ghakishi tsülo.

³ Tipau ghulhu lo kholaqhi sükeu sho chumoni. Atsala tsüni dolo nongu ye kholaqhi sümokeu, aghime kitikhi sho chuni, kughengu nongu ye mighimghai Egypt lono ipeghi ke, tishikeu lono nongu no aküxü tivilo Egypt lono ipeghi keu tsala kümsülu chenani.

⁴ Atsala tsüni ghenguno no ghakhu lo, kholaqhi sükeu sho qhimoni, momu atüghüni tsala avelau nongu no aghashi keu lhoxü shi ye thanau kutolo qhimoni.

⁵ Nongu ye Ampeu nongu Lhou no tsü akeu phughiqo lono aghashi moni,

⁶ ikemu Ampeu nongu Lhou no Pa je ghenguno kishetsü ke-a lono Hechekulu ghakishi shilo, ti ye avelau khetsünhe iloche kelo nongu no Egypt lono ipeghi ke ghuloki lono mlla lo.

⁷ Ampeu no kishetsü ke-a lono ashi lho no chuni. Eno thanau no nongu phiki lo idewoni.

⁸ Tsala tsügho dolo nongu ye kholaqhi sümokeu sho chuni, eno atsala akütsüniu loye Ampeu nongu Lhou mlla nike aqoaho kumqoni. Tipani ye akümla shimoni.

Ghile Pine

⁹ “Nongu no ayevü pesü aghibo ghothuke tsalani no apinedo tsüni kihi thulo.

¹⁰ Tishino Ampeu nongu Lhou lau Ghile Pine ikhilu keu shi Ampeu no nongu kümgha tsükeu pesü nongu u lono pulokini kümllagho tsülo.

¹¹ Ampeu nongu Lhou no Pa je ghenguno kishetsü ke-a lo wuno Pa zülono nongu eno no tianuli, no qemi, Levimi, kachenami, mighimi, eno chimemi no phughi lo akemi sasü alovilo.

¹² Nongu ye Egypt lo aqüaxemi shiche kepi kümsülu lo; eno tsaqüi akhuaye hipau pepimhe lo.

Apusho lo Pine

¹³ “Nongu no athi ghope kümtsü qoleve kethiu, eno atsaithi kümtsü tsüghüve kethiu, atsala tsüni Apusho lo Pine ikhilu lo.

¹⁴ Nongu eno no tianuli, no qemi, Levimi, kachenami, mighimi, eno chimemi no phughi lo akemi sasü alovilo.

¹⁵ Ampeu nongu Lhou no Pa je ghenguno kishetsü ke-a lono tiqhetini hipau atsala tsüni ikhilu lo, kughengu nongu pelo alovilu penike Pa no nongu luche eno nongu kümla thokha lo kümgha tsü nani.

¹⁶ Kiptimi thaqhü ampe lo ghuthu küthü Ampeu nongu Lhou no kishetsü ke-a lo Pa zülo ighilo: ti ye Kholaqhi sümokeu Sho, Ghile pine, eno Apusho lo pine lo ishi.

¹⁷ Timi kümtsü pütüta no kutolu keu Ampeu no pa kümgha tsükeu kiqi lono tsülo.

Kuchou Xakütha

¹⁸ “Ampeu nongu Lhou no nongu tsü akeu phughi kümtsü lo küghaküthami ngo hiyampemi alagha kiqi lono süküsü shipe qhilo, eno panongu pelo kuchou xakütha timiqo tsü pelo.

¹⁹ Nongu ye kuchou xakütha tuchighi moni, agiju moni, eno külügho lumoni, kughengu külügho no alokütsümi nhethi kighicheve tsücheni eno amikuchomi chipiu lakhave tsücheni.

²⁰ Kuchou xakütha likhi papelo, tishianguno Ampeu nongu Lhou no nongu tsü akeu yeghi ighilu no tile xülu nani.

Kütau Kümlla Lakükha

²¹ “Nongu no Ampeu nongu Lhou ghenguno akümlla-khache mla kelo tipau phivilo Asherah kimihi shi asübo shosü moni.

²² Nongu ye atsükucho qhimoni, kughengu Ampeu no tipaqo mithi ke.”