ZAKINIU 15 - Sumi Naga CL (Re-edited) Bible (BSI)

Ampe Akütsüniu

¹ Ampe akütsüniu kishekhake kümtsü lo apiashe qhive tsüni.

² Hipa gholau no shini: akisüghüu püna püaghi kelo apiashe qhive tsüni. Pa ye pa kisüghüu, athiküzümi launo ti lumoni, kughengu AMPEUw kuqhokiphe ye sheshuve ake.

³ Inaghami launo apiashe khulu nani, ikemu o thiküzümi no o piashe puaghi keu ye qhive tsülo.

⁴ Nongu dolo khumu kumlhomi shimo nani; kughengu Ampeu Alhou no nongu tsü akeu yeghi lo nongu kümghatsü nani.

⁵ Nongu no tsaqüi Pa gholu eno ishi tsala lo I no azah nongu tsü akeu kümtsü kutokupui pelu aye,

⁶ Ampeu nongu Lhou no tushoqhi ketoi nongu kümgha tsü nani, nongu no shiye kutomo püna nani, ikemu nalumo nani; nongu no shiye kutomo shou ayepe nani ikemu khunomu nongu shou ayepemo nani.

⁷ “Ampeu nongu Lhou no tsü akeu yeghi lo aphughi lakhi lomu nongu thiküzümi no shilusa aghi aye, nongu ye shonu shive no pa milive moni.

⁸ Ikemu michhi mono pa no kiu kiumu avehupu shi aghi keu pünalo.

⁹ Mthamini kixikila kükümsü nongu lolo iloghive no, ‘Ampe akütsüniu, apiashe qhikütsü mpe kupunuvae,’ ipi no amlo alomo qhiyi no thiküzümi akumlhou juno kiumu pa tsümove nosae. Pa no nongu küla ghi Ampeu lau ighamku kelo nongu ye akipimi shive nani.

¹⁰ Shonu shimono nibonilei pa tsülo, eno nongu lolo alhoksa kümsü mono tsülo, kughengu hi ghenguno Ampeu nongu Lhou no thokha lo nongu kümgha tsü nani.

¹¹ Kughengu aghakhu lo kumlhomi ye kühave monani. Tighenguno I no azah nongu tsü ani, ‘Aghakhu lo no thiküzümi, aveküsami, eno kumlhomi lau au sükhope nibonilei tsülo.’

¹² “No thiküzümi Hebrewmi kiptimi totimi namu o lau jesü aye, pa ye ampe tsügho o qeni, eno ampe akütsüniu loye pheveni.

¹³ Nono pa pheve kelo au kümsa puwu moni.

¹⁴ Ampeu no o kümgha tsükeu ambe loji, athi, eno atsaizü pesü ililai pa ghenguno kuto tsülo.

¹⁵ No ye Egypt lo aqemi shiche kelono Ampeu no xachilelu kepi kümsülu lo, tighenguno ishi tsala lono I no azah hipau tsü anike.

¹⁶ Ikemu o qeu no o gholo aloqhiyi ngolu kehu no eno o kibo kimiye püzü o vilo, ‘Ni ye o launo wuvemoe,’ ipi aye,

¹⁷ pa sasü o hukikha lo ipe no pa kini vüve tsülo, tishino pa ye aküxü tivilo o qeu shiniae. O qeliu lau ghi hipaphi shini.

¹⁸ Aqemi phepuwu kelo amlo püna kevilo, kughengu pa ye aqe kiqemi jume tüxa lono ampe tsügho o qevae. Ampeu Alhou no nono mlaitha keu thokha lo kümgha tsü nani.

¹⁹ “Amishi eno ambe piti tüghüu atsü thaqhü ye Ampeu lau ikhiphe tsülo. Tipaqo sasü akümla shimoni, eno tipaqo mhi gholu moni.

²⁰ Ampe atsütsü Ampeu no kishetsü ke-a lono no kibolomi sawo Ampeu zülono chulo.

²¹ Ikemu lhoxü tino tukutiye aghi, apukhu kinita, anhethi iche, momu kiukiu tukutiye mu aghi aye, ti ye Ampeu nongu Lhou lau aghashi moni.

²² Ti ye no phughi lono chuveni. Mqhamqhi na monamu aqhu ashe shi chu akeshi ti chulu nani.

²³ Lhoxü tipau ji likhino chumoni; ti ye azü pele keshi ayeghi lo kighijive lo.