ZAKINIU 14 - Sumi Naga CL (Re-edited) Bible (BSI)

Mqhamqhi eno Mithekumo Chuqupu

¹ “Nongu ye Ampeu nongu Lhouw nuliqo ke. Kithimi ghenguno nongu kütsüsa miye moni.

² Kughengu nongu ye Ampeu Alhou lau akimthemi, Pa no ayeghi lo ashiaye kümtsü gholono Paw timi shipenike nongu kishelue.

³ “Nongu ye aphikümqhüpu jeli kiumu chumoni.

⁴ Lhoxü hipaqo nongu no chulu nani: amshitsü, ambe, ane,

⁵ ashe, aghalo mbe, aghalo ne, achuyi, eno naghuto lo mbe.

⁶ Lhoxü khikhi apukhumtsü shoba eno akhakile cheni keno ti ye chulu nani.

⁷ Ikemu apukhumtsü shoba momu akhakile chekeqo gholo hipaqo ye chumoni: sayeshi, ajighi, eno achighi, hipaqo ye akhakile cheni kemu apukhumtsü shobamo kehu mithe moke.

⁸ Awoshi chumoni, kughengu awo ye apukhumtsü shoba kemu akhakile chemo kehu mithe moke. Lhoxü hipaqo shi chumoni momu tipaqo kithikumo bumoni.

⁹ “Azü lo lhoxü gholo hipaqo chulu nani: akha akoza eno asaxü pukeqo.

¹⁰ Ikemu akoza küha eno asaxü pumo keu ye chumoni; ti ye mithe moke.

¹¹ “Mqhamqhi keu ghauqo chulu nani.

¹² Ikemu hipaqo chumoni: alhuqu, aluküzüva, eno tipa jeli;

¹³ alhaqü, kithimi lhuqu, eno titoike jeli;

¹⁴ agha jeli kümtsü,

¹⁵ ostrich, alhuqu kimihi putho ghau, azüghau, alhuqu jeli,

¹⁶ aqhaqho kije kitila,

¹⁷ aune qhaqho, akumo kuchu aluküzüva, azüghau,

¹⁸ ahu alisa toikeu ghau eno titoike jeli, minitügha eno ashuqha.

¹⁹ Achishibo kupu tikha-ninga kümtsü mithe moke tipaqo chumoni.

²⁰ Achishibo kupu tikha-ninga mqhamqhi keu lhoxüqo ye chulu nani.

²¹ “Pakutoshi no thive keu lhoxü thaqhü ye chumoni. Tipaqo ye kachenami no gholo xüakemi no chuvepe, momu inaghami vilo jevelo. Kughengu nongu ye Ampeu nongu Lhouw akimthe timiqo ke. “Aneti shi pesü aza kichhizü lono lho kevilo.”

Chighi Saje

²² “Ampe atsütsü nongu lulo pekighi kümtsü chighi saje tsüni.

²³ Ampeu nongu Lhou no kishetsü ke-a lo Pa zülono now athi, atsaizü, eno thazü lo chighi saje, eno amishi ngo ambe piti tüghüu pesü chuni, tishikeu lono nongu ye alhokuthu Ampeu Alhou sümsa nani.

²⁴ Ampeu nongu Lhou no Pa je ghenguno kishetsü keu-a huno ala kushuo shive no Pa no nongu kümgha tsükeu chighi saje xapu wumlave aye,

²⁵ tipaqo jepe pisa kughulhove no Ampeu nongu Lhou no kishetsü keu-a lo wuni,

²⁶ eno no pulou lono pisa tipau peitha lo, amishi momu ambe shi, atsaiji momu aji kümka lono puwolo. Eno Ampeu nongu Lhou zülono nongu eno no kibolomi sasü kuchu-kusho shino alovilo.

²⁷ Nongu ye Levimi phughi lo akemi kughucho kevilo, kughengu panongu ye pano mheghi kühae.

²⁸ “Ampe aküthüu shekha lo now tüxatini lo chighi saje kümtsü pesü no phughi lo pekütsü lo.

²⁹ Aphughi lo Levimi ye pano mheghi küha kehu panongu eno kachenami, mighimi, eno chimemi pelo ighi no tipaqo chuno aghaqilu pelo, tishianguno Ampeu nongu Lhou no nongu kümla thokha kümghatsü nani.