ZAKINIU 13 - Sumi Naga CL (Re-edited) Bible (BSI)

¹ “Tungkupu momu asamo vecheo piche kemi nongu dolo ipeghi no amchipu momu akümzapu mla aye,

² eno pa no amchipu momu akümzapu pikeu huno shikupuve, momu nongu no mthakeu lhou vehulo pa no, ‘Ningu kütau lhouqo papeni eno tipaqo huthuni nolo,’ ipi aye,

³ nongu ye tungkupu momu asamo pumo kicheu tipau tsa ini moni. Kughengu nongu ye amlo kuchopu eno angulho kuchopu pesü Ampeu nongu Lhou kimiye ani kemo keno ithini ke Ampeu nongu Lhou no nongu peju ani.

⁴ Ampeu nongu Lhou papelo, Pa sümsa no Pa zakütsüqo pelu lo, Pa tsa inilo, Pa huthu no Pa tsüqüpe lulo.

⁵ Ikemu tungkupu momu asamo pumo kicheu ye pithive lo, kughengu Ampeu khuu Egypt lo aqüaxe lono nongu xaphelu keno, Pa launo tsüghüve penike pa no nongu pelo Ampeu no azah tsükeu hebide peniye shi ani. Ikehu alhoksa ye nongu dolono ikhive lo.

⁶ “Tsala o thiküzüu, o pu-anga, nono kimiye chekeu o nipu, momu o poshuu no tuqhouno o vilo no eno o puasüqo no mthakeu lhou vehulo, ‘Nikujo kütau lhouqo mllani ke shilo,’ ipi aye,

⁷ no sükümxa lo ashiaye lhouqo shi aghina, no phivilo momu putou ayeghi halau no halu kutolo akemiqo lhou namu,

⁸ o pütsaqhi luvepe kevi, pa tsa ini kevi, pa kimiyeqhiyi kevi, momu pa kipimi küsüve kevilo.

⁹ Ikemu pa pithive lo. Pa pithini ke nou no atüghüu shini, tithiu no kütami no papeni.

¹⁰ Atu pesü pa veqhive lo, kughengu pa no Ampeu khuu Egypt lo aqüaxe küxü lono nongu saipeghi keno, Pa launo nongu müsü sawuve niye shike.

¹¹ Tileno Israelmi kümtsü no chilu eno msave no nongu gholo kixikila hitoike khilemu shimove nani.

^12-13 “Ampeu nongu Lhou no tsükeu phughi lakhi lo ameküha kemi khami no aphughi lo akemi müsü sawuve no nongu no mthakeu lhou vehulo, ‘Ningu kütau lhouqo mllani ke shilo,’ ipi keu nongu no chilu aye,

¹⁴ nongu ye tsaqüi ti phuju no ighijuni. Tsala tino kuchou shiaghi eno nongu gholo aphikümqhüpu titoike shive aghi aye,

¹⁵ nongu ye tipa phughi lo küxümi, atsüaqu, eno tile akeu kümtsü pithiveni eno qhoi kütsaveni.

¹⁶ Tile küxümi tinhemgha kümtsü pesü mishighüna mta lo qhini, eno Ampeu nongu Lhou lau akümllagho shi mishighüna tipau pitiveni.

¹⁷ Kütsaveni keu nhemgha kiumu lumoni, tishikeu lono Ampeu no amloide moveno nongu kimiyeqhiyive nani, eno no puasüqo lau tushoqhi ketoi nongu kughuko tsü nani,

¹⁸ nongu no Ampeu nongu Lhou zakütsü khikhi ishi tsala lo I no nongu tsü ani keno, tipaqo pelu no Ampeu zülo kiu no achipi keno ti shilu aye tishitsü nani.