ZAKINIU 12 - Sumi Naga CL (Re-edited) Bible (BSI)

Ampeu no Kishelu keu Kümlla-a

¹ “Ampeu nongu puasüqo Lhou no nongu tsüakeu yeghi lo ilo kelo, nongu no xüake tivilo akhuaye ngo pimheye hipaqo pelu lo.

² Nongu no shiye hale niye akeqo no pano lhou mlla cheke-a, naghuto kuchuqu, atoghiqo, eno asübo qholo ache keqo kümtsü kütsave lo.

³ Pano kiptiaqo tulaqhive tsülo eno atsükucho ngo Asherim julho kubove no pitive tsülo. Pano lhou julhoqo micheve tsülo eno a-a tipau lono panongu je pühave tsülo.

⁴ Nongu ye tipa ghola lono Ampeu nongu Lhou mlla moni.

⁵ Ikemu Ampeu nongu Lhou no Pa je ghenguno eno Pa kungo-a shikepu nongu shiaye yeghi lo khile kisheni keno nongu ti phuni, eno tilau wuni.

⁶ Nongu no now akipti kümllagho, aghakishi kümllagho, chighi saje, pulokini kümllagho, ashoqhi kümllagho, kümsagho, eno amishi ngo ambe piti tüghüu kümllagho kümtsü tilau no mllani.

⁷ Tilau no nongu no Ampeu nongu Lhou no nongu kümgha tsükeu je lono nongu eno no kibolomi sasü Ampeu nongu Lhou zülono aghulhu shini.

⁸ “Itehi ningu no pütüta no kiu achipie pi kümsü ani keno titoi xüake toi tilau ye tishimo nani,

⁹ kughengu nongu ye Ampeu Alhou no akulhokiqhi eno amheghi yeghi tsü akeu lo iloghi mphie.

¹⁰ Ikemu kughou nongu no Jordan katha ikuno Ampeu no nongu tsü akeu yeghi lo xülu, eno no sükümxa lo aghümi akeqo launo nongu kulhoqhi tsüno sükusho tsüni keno,

¹¹ tileno Ampeu no Pa je ghenguno kishelu ke-a lo, I no nongu vilo süghi lopi azah tsükeu kümtsü peighini: akipti kümllagho, aghakishi kümllagho, chighi saje, nongu no Ampeu lau ashoqhi kümllagho shikeu akiviu kümtsü süghini.

¹² No tianuli ngo aqemi kiptimi totimi, eno aphughi lo Levimi kümtsü sasü Ampeu zülo alokivi shilo, Levimi ye pano mheghi kühae pi ithilo.

¹³ Nongu ye akipti kümllagho a-a kümtsü lono mlla moni,

¹⁴ ikemu Ampeu no nongu shiaye yeghi lo a-a kishetsü keu lo likhino akümllagho tsüni, eno tileno I no azah nongu tsükeu jeli kümtsü shilo.

¹⁵ “Tishimu Ampeu nongu Lhou no kümgha tsükeu kiqi lono nongu no aphughi khile xüni keno, tileno atsüaqu heqhi chulu nani. Mithe akemi eno mithekumomi ghi aqhu ngo ashe chuke toi chilu nani.

¹⁶ Tipaqo ji likhino chumoni; ti ye azü pele keshi ayeghi lo kighiji qhiveni.

¹⁷ Now athi, atsaizü, thazü, eno amishi ngo ambe piti tüghüu lo chighi saje, momu ashoqhi kümllagho, pulokini kümllagho, eno akimchi kümllagho thaqhü ye nongu no küghüna akeu phughi lono chumoni,

¹⁸ ikemu tipaqo ye nongu eno no tianuli, no qemi eno Levimi no phughi lo akemi sasü kümtsa Ampeu nongu Lhou no kishetsü keu-a lo wuno Pa zülono chuni. Tishino nongu ye thokha ghenguno Ampeu nongu Lhou zülono alovini.

¹⁹ Hi ithilo, nongu no xüake tivilo Levi laghami kughucho kevilo.

²⁰ “Ampeu nongu Lhou no piqhi püake toi no lughi pekhove tsü kethiu, nongu no chunishi kelauno, ‘Ni ye ashi chuni,’ ipi aye, kugho kughomu chulu nani.

²¹ Tsala Ampeu nongu Lhou no Pa je ghenguno kisheni ye akeu-a huno ala kushuo shive aye, I no azah nongu tsüke toi kugho kughomu nongu ye Ampeu no nongu kümgha tsükeu lhoxü loji gholono lakhi heqhipe nongu no akeu phughi lono heqhi chulu nani.

²² Mithe akemi na mithekumomi namu aqhu ashe shi chu akeshi tipau chulu nani.

²³ Aji ye chumo nanie pi ithilo, kughengu aji ye aküxü ke, nongu ye ashi gholono aküxü chumoni.

²⁴ Nongu ye ti chumoni; azü pele keshi ayeghi lo ti kighiji qhiveni.

²⁵ Nongu ye ti chumoni, kughengu nongu no Ampeu zülo kiu no achipi keno ti shiaye, nongu eno no tianuli ghenguno akivipu shinani.

²⁶ Ikemu nongu launo akimthe kümllagho ithulu masa kepu, now ashoqhi kümllagho ye pesü Ampeu no kishe tsükeu-a lo wuni,

²⁷ eno no kipti kümllagho, ashi ngo aji ishi pesü Ampeu nongu Lhou kümlla khache lono mllalo. Nongu ghakishi lhoxü ji ye akiptia lo lepukuve no ashi ye nongu no chuveni.

²⁸ I no azah nongu tsükeu thokha pekupu nike pükapütsa lo, tishianguno nongu eno no tianuli ghenguno alholo akivipu shinani, kughengu kiu no akivi eno achipi keno tishi aye akivipu ke.

Ajulho Kümlla Ghenguno Kütü

²⁹ “Kughou Ampeu nongu Lhou no nongu zülono shiyeqo kütsave no nongu no ilo tipaqo yeghi lo ngoluni keno,

³⁰ panoqo kütsave kethiu nongu ye pano lhouqo vehu lo, ‘Ningu ghi mllani kehu shiye hipaqo ye kishi pano lhouqo mlla che kea?’ ipi ighiju anipi nongu meluve no ti pape wuve monike tsükhüi lo.

³¹ Nongu ye tipa gholau no Ampeu mlla moni, kughengu Ampeu no mithi chekeu aphikümqhüpu jeli thokha panongu no pano lhouqo lau shicheni, panongu ye pano tianuliu thotsü ami lono pitipe pano lhou tsüve cheni.

³² “I no azah nongu tsü akeu thokha shilo; tile kiumu süküpha kevi momu ikhive kevilo.