ZAKINIU 11 - Sumi Naga CL (Re-edited) Bible (BSI)

Ampeu Kimiye eno Huthulo

¹ “Ampeu nongu Lhou kimiye lo eno alhokuthu Pa khuaye, pimheye, eno azakütsü pelu lo.

² Ishi tsala lo Ampeu nongu Lhou ghaküsü ye, Pa kughushu küka kumto kümsülu lo, (ni ye no tianuli khunoqo hi ithumla keno tipaqo vilo pi anike kumoe).

³ Pa no Egypt kükau Pharaoh ngo pa yeghi kuchopu shou amchipu eno akümla shikeqo,

⁴ Pa no Egypt ghüshimi ngo panow khurshi eno khurkuluqo shou kiu shi, kishi panoqo no nongu hasü ighi kelo, Akuhu Züghi no pano mhoqhive eno ishi kutolo Ampeu no kishi panongu kütsave keno,

⁵ Nongu no hilau ighi mphi lo Ampeu no nongu ghenguno asayeqha lo kiu shikeno,

⁶ Reuben nu Eliab nu Dathan ngo Abiram pama shou Israelmi kümtsü zülono Pa no kishi ayeghi pelo mpakho püzü pama eno akibolomi, aphiki eno lhoxü jeli kümtsü munove pe keno, hi kümtsü kümsülu lo.

⁷ Kughengu kuchou no nongu nhethi no Ampeu kümla kije kümtsü ithuluve ake.

⁸ “Tighenguno I no ishi tsala lo azakütsü nongu tsükeu kümtsü pelu lo, tishianguno nongu ye akumto shino nongu no ilo niye akeu yeghi pükhalu nani,

⁹ eno Ampeu no nongu puasüqo eno pano polo kughukomi tsünike tushoqhi keu akichhizü ngo akhingozü no qowu akeu yeghi lo axüshulu nani.

¹⁰ Kughengu nongu no iloni ye akeu yeghi ye nongu no achekeu Egypt yeghi toi moke. Tilau ye aghutu toi apiti yisüve kethiu azü sünike aka-ave shiche.

¹¹ Ikemu nongu no ilo niye akeu yeghi ye atoghi ngo akhila, tsütsüghu züno pütsü chekeu yeghi ke.

¹² Ampeu nongu Lhou no ayeghi hipau tucho acheni. Ampe bothu lono kishekha kutolo Ampeu nongu Lhou nhethi no jukuto acheni.

¹³ “Ishi tsala lo nongu mlo kuchopu eno angulho kuchopu pesü Ampeu nongu Lhou kimiye eno huthu penike I no tsü akeu zakütsü nongu no pelu aye,

¹⁴ Pa no nongu yeghi ghenguno atusho kiqi lono, tixi eno ghixu tsütsüghu tsü nani, tishianguno nongu no athi, atsaizü eno thazü ililai ithulu nani,

¹⁵ nongu tsüaqu ghenguno Pa no atsüni tsünani, eno nongu no achuqupu ililailu nani.

¹⁶ Nongu mlo pishiqhive nosa, eno tsüghüsü kütau lhouqo mlla eno qeuve nosake kutokupui lo;

¹⁷ tikumo aye, Ampeu no nongu shou amloideve no tsütsüghu süchile luve no ayeghi no axathi pithi move nani, eno nongu ye Ampeu no nongu tsüniye akeu aghüma kivi yeghi lono pai püghave nani.

¹⁸ “Tighenguno I tsa hipaqo nongu mlo eno akükümsü lo süpulo, nongu u lo amchipu shi khapu lo, eno nongu kishe lo khapu lo.

¹⁹ Hipaqo pesü no tianuli shika lo, nongu no aki lo akelo, khalau chekelo, züake lo eno ithu akelo, hipaqo pesü pialo.

²⁰ Nongu hukikha ngo khagho lo yepe qhilo,

²¹ tishianguno ayeghi no atsütsü qholo ake kutolo, nongu eno no tianuli ye Ampeu no pano puasüqo tsünike tushoqhi keu yeghi lo axüshulu nani.

²² Kughengu I no tsü akeu zakütsü kümtsü nongu no tsaqüi pelu, Ampeu nongu Lhou kimiye, eno Pa laghi lo chelu no mtotoi Pa mtulu aye,

²³ Ampeu no nongu zülono shiye hi kümtsü hapheve tsü nani, eno nongu ye nongu nguno shiye akijeu eno akumtou yeghi haphelu nani.

²⁴ Nongu pukhu no khile nesüni keno nonguw shive nani. Nongu lughi ye asayeqha lono Lebanon kutolo qhawo nani, eno Euphrates ghoki lono kulola züghi kuto shi nani.

²⁵ Khunomu nongu shoqamla nani. Ampeu nongu Lhou no tushoqhi ketoi, nongu no khile wu keno, kümtsü lo timi pelo nongu msape nani.

²⁶ “Julo, ishi tsala lono I no nongu zülo kükümgha ngo angusüpu qhitsü ani:

²⁷ ishi tsala lo I no tsü akeu Ampeu nongu Lhou zakütsü nongu no pelu aye kükümghae,

²⁸ ikemu nongu no Ampeu nongu Lhou zakütsü hebideve no ishi tsala lo I no azah nongu tsü akeu lono tsüghüsü nongu no mthakeu lhouqo lau wuve aye angusüpue.

²⁹ Kughou nongu no ilo niye akeu yeghi lo Ampeu no nongu sailoghi keno, nongu ye Gerizim Toghi lono kükümgha sheshu eno Ebal Toghi lono angusü sheshu lo.

³⁰ Atoghi hiküma ye Jordan kukuu, Canaanmi khunoqo Gilgal ghüngüu Arabah qhalo acheni keno, tipaqo ghakhu lo, khetsünhe ikulola küdau wucheke laghi lo piyiu, ti ye Moreh lo aphisübo phivilo anike kumo?

³¹ Kughengu nongu ye Jordan katha iku Ampeu nongu Lhou no nongu tsü akeu yeghi lo ngoluni cheae. Kughou nongu no ti pükhalu no tile ngoluni keno,

³² nongu ye ishi tsala lo I no akhuaye eno pimheye nongu tsü akeu kümtsü pekupu nike kutokupui lo.