ZAKINIU 10 - Sumi Naga CL (Re-edited) Bible (BSI)

Atupha Kithe

¹ “Tileno Ampeu no I vilo pi, ‘Atupha atüghüu toi kini yetha eno tiküma süpe qhikepu asü bohu lakhi mlano naghuto lo I lau iqhoghi lo.

² Nono kubove keu tupha lo yepüa keu tsa I no tiküma lo yepuku tsüni, eno tithiu nono abohu lo süveni.’

³ Ikehu I no acacia sü pesü Puloshoqhi bohu lakhi mla, eno atüghüu tupha toike kini yethape naghuto lo iqho.

⁴ Ampeu no atüghüu lo yepuku keu tsatho atupha küma lo yepuku tsü, ti ye Azakütsü Chighi nongu no naghuto philo kumqoke tsalani Pa no ami lono nongu vilo pikeqo tsake. Ampeu no tiküma pesü I tsüve.

⁵ Tithiu I no naghuto lono iqighi no atupha küma pesü Puloshoqhi bohu lo süve. Eno Ampeu no azah tsüke toi tilehi acheni.”

⁶ (Israelmi no Beeroth Bene-jaakan lono chesü Moserah lo wuve. Aaron ye tileno thive, eno tile shiqhove. Pa nu Eleazar no pa züqhulo achineu shive.

⁷ Tileno panongu no Gudgodah lo wuve, eno Gudgodah lono azü kupukuno shi akeu yeghi Jotbathah lo wuve.

⁸ Tipa ghuloki lono Ampeu no Levi laghami pelo Paw Puloshoqhi bohu pe penike, Pa huthu, eno Pa je sheqhe penike kishe kütüta shie. Ti ye ishi kutolo tishi chephie.

⁹ Tighenguno Levi lagha ye pano thiküzümi gholo amheghi tsümove. Ampeu nongu Lhou no Levi vilo pike toi, Ampeu hukuthu no pa mheghi ke.)

¹⁰ “Atüghüu lo shike toi ni ampi no naghuto lo putho pucho atsala lhobidi ngove, eno Ampeu no tile ghi I tsa initsü eno nongu kütsa moni keu shive.

¹¹ Tishino Ampeu no I vilo pi, ‘Ithu no I no nongu puasüqo tsünike tushoqhi keu yeghi pükhalu nike saphesü wulo.’

Nongu Mlo Shikimthe lo

¹² “O Israel, Ampeu nongu Lhou ye nongu launo kiu khu ani nomu hike, nongu mlo eno angulho kuchopu pesü Pa sümsa lo, thokha lo Pa pulou lono cheche lo, Pa kimiye eno huthu lo,

¹³ nongu kivipu ghenguno ishi tsala lo I no Ampeu zakütsü ngo akhuaye nongu tsü akeu kümtsü pelulo.

¹⁴ Julo, kungugha eno kungugha akiqheu kutolo eno ayeghi eno tile akeu jeli ghi Ampeuw ke.

¹⁵ Ikeghi ashiaye kümtsü dolono Ampeu no nongu puasü eno pano polo kughukomi qhuivü, eno ishi kutolo tishi aphie.

¹⁶ Tighenguno nongu mlo shikimthe lo, eno hinguno hilau ye kuthovi kevilo.

¹⁷ Kughengu Ampeu nongu Lhou ye alhouqo Lhou eno ampemi shou Ampeu, Pa ye kije, akumto, eno akighiche Lhou, Pa ye agi juchemo eno külügho luchemoe.

¹⁸ Pa no mighimi eno chimemi ghenguno achipiu xakütha tsü cheni, eno achuqupu ngo aphimini pesü kupokichemi tsücheni eno kimiye cheni.

¹⁹ Tighenguno kupokichemi kimiye lo, kughengu nongu ye Egypt lo kupokichemi shi acheke.

²⁰ Ampeu nongu Lhou sümsa lo. Pa huthu eno mtulu lo, eno Pa je lono tushoqhi lo.

²¹ Pa ye nonguw shekiqhepu, nongu Lhou ke, nongu nhethe lono Pa no nongu ghenguno akichiqhipu eno akümsapu kümla shitsüe.

²² Nongu puasüqo ye Egypt lo pano lhotsüni likhi iqie, ikemu itehi ye Ampeu nongu Lhou no nongu pesü atsütsü lo ayepu jehi shive tsüae.