ZAKINIU 1 - Sumi Naga CL (Re-edited) Bible (BSI)

Horeb Qhive penike Azah

¹ Jordan kukuu asayeqha, ti ye Paran ngo Tophel, Laban, Hazeroth, eno Dizahab dolo Suph ghüngü lo Arabah lono Moses no Israelmi vilo pikeu tsake.

² Horeb vechesü Seir Toghi lono Kadesh-barnea lo wuni kelo atsala chighiqhaqhi lunani.

³ Egypt qhiveke mpe lhoabidiu, aqhi chighiaqhaqhiu atsala atüghüni, Ampeu no Israelmi azah tsülo pikeu kiqi lono Moses no timiqo pütsa.

⁴ Hi ye Ampeu no Amorimi kükau Sihon, Heshbon lo achekeu ngo Bashan lo akükau Og, Ashtaroth ngo Edrei achekeu pama toluve kethiu noke.

⁵ Jordan kukuu Moab yeghi lono Moses no hi Ayezah chixechilei pitsü,

⁶ “Ampeu ni Lhou no Horeb lono ningu vilo pi, ‘Nongu ye naghuto hipau lo ado kushuo ngovae.

⁷ Aghazü xave no aghüzüla lo wuve lo, Amorimi ato yeghi eno Arabah lo pano sümxape akemi, ato eno aqa yeghi lo, Negeb eno azüghimkü lo, Canaanmi ngo Lebanon yeghi lo, eno aghoki akijeu, Euphrates ghoki kutolo wulo.

⁸ Julo, I no ayeghi hipaqo nongu tsüvae, Ampeu no nongu puasü Abraham, Isaac, eno Jacob ngo pano laghami tsünike piqhi püakeu yeghi lulo.’

Sakiphemi Süsü

⁹ “Tipa ghuloki lo I no nongu vilo pi, ‘I likhi ye amakho pumlavae.

¹⁰ Ampeu nongu Lhou no nongu kughukove tsüae, julo, itehi nongu ye atsütsü lo ayepuqo jehivae.

¹¹ Ampeu no puasü Lhou no Pa no piqhike toi ghuthu qhethonhe kutolo alau nongu kighishetsü eno kümghatsü peniu!

¹² Ikemu kishino I likhino nongu makho kimshi puqhe luni kea?

¹³ Pütüta lagha lono, alokütsümi, vethakulumi, eno puju shijuve kemi kishephe lo, eno nongu saphe penike I no panongu süsüni.’

¹⁴ Nongu no I khochile, ‘Nono ni vilo pi akeu ye ni ghenguno akivie.’

¹⁵ Ikehu I no nongu lagha lo alokütsümi eno puju shijuve kemi pesü qhethonhe, aqhe, lhopungu, eno chighi shou zatsümi eno hiyampemi shipe.

¹⁶ I no nongu shou xaküthami azah tsü, ‘No thiküzümi dolo aküküpnaqo tsaqüi inilo, Israelmi athiküzümi dolo na inaghami lakhi pano gholo akeu sasü namu, kuchou xakütha shilo.

¹⁷ Xakütha lo agi jumoni. Kitilami na kijemi namu aphiphi shi küghatha lo. Khunomu nongu shikümsape kevilo, kughengu xakütha ye Alhouw ke. Aküküpna khikhi no nongu ghenguno kushokütsü keno I lau süghini, eno I no ti xathatsü nani.’

¹⁸ Tipa ghuloki lono nongu no shikepu thokha I no kiche tsüe.

Pukujumi Puwu

¹⁹ “Tishino Ampeu ni Lhou zakütsü kiqi lono, ningu no Horeb lono chesü Amorimi ato yeghi lo wucheke laghi lo kümsapu sayeqha nongu no ithulu keu kathasü wuno Kadesh-barnea lo ighie.

²⁰ I no nongu vilo pi, ‘Amorimi ato yeghi khikhi Ampeu ni Lhou ni tsü ani keno, nongu ye tile ighivae.

²¹ Ampeu ni Lhou no nongu zülo ayeghi ikhiphetsü ani. Ampeu nongu puasü Lhou no nongu vilo pike toi wuno now shilulo. Msa kevi momu alomtshü kevilo.’

²² Tile nongu kümtsü no I lau ighi no pi, ‘Ayeghi puju penike ningu züu no timi puwuni nolo, tishianguno panongu no ayeghi puju no khipa la no wu masa momu aphughi khipau sholu nani keno, tipaqo sütsa ningu lau pechile ighi peni.’

²³ Ti ye aloe pi kümsü lu kehu I no alagha lo lakhikhi timi chighikini kishelu.

²⁴ Panongu no ato yeghi lo iqho no Eshcol Khila lo ighi eno ti puju.

²⁵ Panongu no tilau no axathi hami ningu lau süghi no pi, ‘Ampeu ni Lhou no ningu tsü akeu yeghi ye aghüma yeghi shi ani.’

²⁶ “Ikeghi nongu no wunike züqhulo Ampeu nongu Lhou zakütsü hebide.

²⁷ Eno nongu no aphiki lono nhenheshi pi, ‘Ampeu no ningu jumithi kehu Egypt lono ni saipeghi no kütsave niye Amorimi u lo süvetsü.

²⁸ Ningu ye khila wucheni kea? Ni thiküzümi no ishi pikeu lono ni shikümsavae, “Tilau timiqo ye ningu nguno akuchuqu eno akumtou. Pano mishighünaqo ye kije eno aliwo no atsütsü kuto shiqhe püani. Tinguno alau nino Anakim nuli ithulue.”’

²⁹ Tileno I no nongu vilo pi, ‘Timi tipaqo jumsa kevilo.

³⁰ Nongu züu cheche keu Ampeu nongu Lhou ampi no Egypt lo nongu nhethe lono shike toi nongu ghenguno aghü shitsü nani.

³¹ Apu lakhi no pa nu khape cheke toi, Pa no kishi asayeqha lono nongu xapusü hipa-a kutolo ighi keno nongu no ithuluve ake.’

³² Atsa hipaqo nongu vilo pive kethiu ghi nongu ye Ampeu nongu Lhou pükhübe moe.

³³ Pa no nongu züuno wuno nongu pelo aphiki shipenike a-a phutsü, alaghi nongu piye nike putho lono ami tsükucho eno puchou no khüngküsü shike.

Hekibide Ghenguno Aghime

³⁴ “Ampeu no nongu tsa chilu no amloideve, eno Pa no tushoqhi,

³⁵ ‘Hi alhoksa tiqhelimi lakhimu I no nongu puasü tsünie pi tushoqhi keu yeghi kivi ithumla nani,

³⁶ ikemu Jephunneh nu Caleb likhino ilolu nani, eno pa no nesüve keu yeghi pesü I no pa eno pa tianuli tsüveni, kughengu pa no amlo kuchopu no Ampeu pape ke!’

³⁷ Nongu tsa ghenguno Ampeu no I shou ghi amloideve no pi, ‘No ghi tipau yeghi lo ilomo nani.

³⁸ O kukuphuu Nun nu Joshua no ilo nani, Pa shikumto lo, kughengu pa vecheo Israelmi no ti ighilu nani.

³⁹ Nongu nga kughunu khunoqo thive nanie pi nongu no pi, eno no tianuli ishi kutolo kivi-küsa mthano ani keno, tipaqo no ilolu nani. I no ayeghi pesü panongu tsüve nani, eno panongu no tile xüsü nani.

⁴⁰ Ikemu nongu ye tsüghüve no Akuhu Züghi küdau asayeqha lo wuvelo.’

⁴¹ “Tileno nongu no I khochile, ‘Ningu no Ampeu zülo axine shivae. Ampeu ni Lhou no azah tsüke toi ningu ampi no wuno aghü shini.’ Nongu kümtsü no ato yeghi lenikeu ye mlalei küghashi aghü nanu kutoe.

⁴² Ampeu no I vilo pi, ‘Panongu vilo pilo, Aghü shinike wu kevilo, kughengu Ni ye nongu gholo chemovae eno nongu ye aghümi zülo tomlave nani.’

⁴³ Ikehu I no nongu vilo pi kemu nongu no Ampeu zakütsü hebideve no akuchhoma shi ato yeghi lo iqhove.

⁴⁴ Tileno ato yeghi lo küxümi Amorimi no akhi tache keshi nongu shou ikughi no Seir lono Hormah kutolo nongu leve.

⁴⁵ Nongu no ideighi no Ampeu lau mloqa, ikemu Ampeu no ini tsümoe.

⁴⁶ Ikehu nongu no Kadesh lo ado kushuo ngove.