YETSAPIU 9 - Sumi Naga CL (Re-edited) Bible (BSI)

Kümtsü lau Akithi Ighi nani

¹ I no hi kümtsü kümsü kutoju eno kishekhalu keu no, alokütsümi ngo amikuchomi kümla ye Alhou u lo ani. Ikemu kikimiye no keo akimthi no pano khe ani keno khunomu mthae.

² Hi ye kümtsü ghenguno aphiphi ke, amikuchomi ngo kixikilami, akivimi ngo alhoksami, mqhamqhi kemi ngo mithekumomi, aghakishimi ngo shimo kemi, kümtsü aphiphi ke. Kivimi no axinemi nguno akiviu ke kumoe, eno ashoqhi shikemi no shimo kemi nguno akiviu ke kumoe.

³ Khetsünhe qholo kiu shi ani keno kümtsü lo alhoksa ye hike: kümtsü lau atüqhüdo aphiphi ighi nani. Itaghi, timi no xüake tivilo pano kükümsü ye alhoksa eno anikha likhi, eno tithiu pano ye thive nani.

⁴ Ikemu khuu no küxümi gholo ani keno pa ye lajupu ani, atsü xü akeu no abongshuu thive keu nguno akiviue.

⁵ Kughengu küxümi no pano ye thive nanie pi ithi ani, ikemu kithimi ye kiumu mthae. Pano ye asaxü küha eno pano ghili ye kümsümave cheni.

⁶ Panow kikimiye ngo akimthi, eno mine chekeu kümtsü pühavae, eno khetsünhe qholo kiu shi ani keno, tile pano saje ye kiumu kühavae.

Kimiye kemi Sasü Alopivi lo

⁷ Wulo, alokivi shi o chuqupu chulo, eno aloqiqhiyi o tsaizü yelo, kughengu nono kiu shi ani keno Alhou no kihithape qhivae.

⁸ O phimini metsüghoi qhilo, thazü no o kütsüsa nupulo.

⁹ Alhou no ayeghi lo adou küxü o tsü püake tivilo nono kimiye chekeu o nipu sasü alopivi xülo, kughengu nono ime mlaitha chekeu lo tino o saje ke.

¹⁰ Kiu kiu kümla lomu o kumto süno mlalo, kughengu nono wuche keu kithimi yeghi loye akümla, akükümsü, akighithi, alokütsü, kiumu kühae.

Mbomzü ye Alokütsü Pavi

¹¹ Itaghi I no hi ithulu, ayeghi lo pokuxu kelo akümthümi no tolu chenike kumoe, titoi akumtomi no aghüshi tolu, alokütsümi no asho ithulu, akighichemi no küakini ithulu, kighithimi no adokivi ithulu chenike kumoe, ikemu atüqhüdo eno adokivi ye kümtsü lau ighi cheni.

¹² Kughengu timi ye pa do-aghuloki mthae. Akhame lo akha meluve eno alichhe lono aghau meluve ketoi, ado lhoksa lichhe no paikhavi timi meluve cheni.

¹³ I no khetsünhe qholo alokütsü kichekipiye hi ghi ithulu püani, eno hi ye I ghenguno akighiche.

¹⁴ Mishighüna lakhi lo timi aghulo ache, kükami kumto lakhi no tipau leighi no aqoghe ghepuku püzü khasü luve.

¹⁵ Aphughi tile alokütsümi kumlhomi lakhi ache eno pa lokütsü lono pa no aphughi tipau xaphelu. Ikeghi khunomu kumlhomi hu kümsü mlave.

¹⁶ Ike akumlhou lokütsü thogha eno pa tsa ini tsümo namu, I no pi akeu ye alokütsü no akumto nguno akiviue.

¹⁷ Yepeu lakhi no mbomzümi gholo ighamku akeu ye qümüi alokütsümi tsa ini akeu pavie.

¹⁸ Alokütsü no aghünanu nguno akiviue, ikemu axinemi lakhi no akivi kutomo shipüsave cheni.