YETSAPIU 8 - Sumi Naga CL (Re-edited) Bible (BSI)

Akükau Zakütsü Papelo

¹ Khuu no alokütsüu toi kea? Khuu no thime kiqi ithi ani kea? Timi lokütsü no pa gi yepüvü tsücheni, eno pa gi kümka ghi kilive tsücheni.

² I no piani; Akükau zakütsü papelo, kughengu Alhou no pa lau ashoqhi shipüani ke.

³ Pa zülono wuveni ke mighi kevilo. Alhoksa ghenguno puthugho kevilo, kughengu akükau ye pa no shinishi keu kiu kiumu shiluve nani.

⁴ Pa tsa no ashekhau xakütha eno khuu no pa vilo ishi piluni kea, “No ye kiu shi ani kea?”

⁵ Khukhumu azakütsü pape keu ye alhoksa ithi chemoe, eno alokütsümi ye ado achipiu ngo achipiu laghi ithi ani.

⁶ Aküküpna no mishishei timi qaqhi anamu thokha kümtsü ghenguno ado eno aghola achipiu acheni.

⁷ Kughengu pa ye kiu shive nani keno mthae eno khuu no pa vilo ti pikulupu kea?

⁸ Timi khumu pa küxü tuthu hakhalu kepu küka kühae, momu pa kithi tsala tukiqeve mlae. Aghükishi lo ghüshimi ye aki lo womla ketoi kixikila ye khilemu timi phepupo chemoe.

⁹ Ayeghi lo kiu shi ani keno I no tsaqüi phuju kelo hi kümtsü ithulu, ti ye kughou timi khami no kütami qhasüni keno, pano ghi alokughuno kühano acheni.

Alhou Msa kemi no Akivi Shinani

¹⁰ Tishino kixikilami shiqhove keu I no ithulu. Panongu no akimthe-a lo ipe-ilo ache, eno mishighüna khileno pano kümla lhoksa shiche keno, tileno pano sheqhe. Hi ghi adoue.

¹¹ Küsakügha kümla shou ke-i xakütha tsümoke ghenguno timi mlo lono alhoksa shinike kughuuve cheni.

¹² Kixikilami no ghuthu 100 kutolo alhoksa mlano xüaghi namu, I no ithi anike khuu no Alhou msani keno, pau pavi nani, kughengu pa no Alhou msaighü acheni.

¹³ Ikemu kixikilami ye akivipu kumoe, pa küxü ghi yekükhü lakhi toi süchho mla nani, kughengu pa ye Alhou msamoe.

Timi ye Alhou Laghi Ithimlae

¹⁴ Ayeghi lo adou vehu ani: khanilo amikuchomi no kixikilami saxü ithulu cheni, eno kixikilami no amikuchomi kümla ghenguno asaxü ithulu cheni. I no pi anike highi adoue.

¹⁵ Ikehu alovi alopi I no piani, kughengu khetsünhe qholo timi ye chusho eno alovini keu nguno akiviu ye kiumu kühae. Alhou no aküxü pa tsüke tivilo alokivi huno pa ghime kupuju lo pa gholo anani.

¹⁶ Kughou I no alokütsü ithi nike, ayeghi lo kiu shiani keno ithi nike, eno kishi putho pucho lomu timi no zühu chemo keno ithi nike pükapütsa keno,

¹⁷ tileno I no Alhou kümla kümtsü ithulue, ti ye kiu kishi ani keno timi ye khilemu ithi khamlae. Timi no kishi pükapütsa anamu phuphe luni chemoe. Alokütsümi no ithivae pi aghi namu, pau ghi phuphe mlae.