YETSAPIU 7 - Sumi Naga CL (Re-edited) Bible (BSI)

Alokütsü ngo Mbomzü

¹ Ajuaje kivi ye amekusho thazü nguno akiviue; akithi tsala no apunu tsala nguno akiviu ke.

² Küqa kumlo kilo wukeu no aghulhu kilo wukeu nguno akiviue, kughengu akithi no timi kümtsü shekuho ke, küxümi no ti pesü pano mlo lo qhimasae.

³ Amloksa no akunu nguno akiviue; kughengu agi khümüi keu no amlo lopiqi tsücheni.

⁴ Alokütsümi mlo ye küqa kumlo kilo acheni, ikemu mbomzümi mlo ye zütizügha kemi kilo acheni.

⁵ Mbomzümi lephe ini akepu ye alokütsümi no sakiyi keu ini akeu pavie.

⁶ Kughengu mbomzümi kunu ye ami lo asahu no pepeshi mpa ake toike; hi ghi adoue.

⁷ Nedaqoda keu no alokütsümi pesü mbomzü shive cheni, eno külügho no amlo shipuqove tsücheni.

⁸ Ashekuho no abothu nguno akiviue, alolo kutuukulu no alolo aqheküza nguno akiviu ke.

⁹ O mlo lo lolhülo axuide kevilo; kughengu axukighide ye anikhami mlo lo acheni.

¹⁰ “Kushiye khaghi no itehi nguno akiviu kea?” ipi kevilo. Kughengu ti ye alokütsü tsa lono iniju anike kumoe.

¹¹ Alokütsü ye amheghi toi aloe, khetsünhe ithulu kemi ghenguno adokivi ke.

¹² Pisa no süsholu cheke toi alokütsü no süsholu cheni, eno akighithi lo ala akeu ye, alokütsü no alokütsümi küxü pükha tsücheni.

¹³ Alhou no mlakeu kümsü julo: Pa no ihoghülai mla püakeu khuu no shikümzü luni kea?

¹⁴ Kinikülü shilu ake ghuloki lo alovi alo, eno shiluküsa tsala lo kümsülu lo: Alhou no alokivi eno shiluküsa ghi puwue, tishianguno timi pelo pa thiu kiu ighi nani keno ithi pemo niye ke.

¹⁵ Iw adou küxü lono I no thokha ithuluvae. Amikuchomi no pa mikucho lono thive cheni, eno kixikilami no paw kixikila kümla lono pa xüpushu cheni.

¹⁶ Ihulo amikucho shikevi momu alotsülo kevilo; Kushiye o likhi o kütsaveni kea?

¹⁷ Ihulo kixikila shikevi momu mbomzü shi kevilo; kushiye o do tomphi lono thiveni kea?

¹⁸ Hipau tsüqü luve keu no o ghenguno alo, eno lakhiu ghi pheve kepu kumoe. Kughengu khuu no Alhou sümsani keno, pa ye ti küma kinikujo lono pojolu nani.

¹⁹ Alokütsü no alokütsümi lakhi pesü mishighüna lakhi lo yepemi chighi nguno akumtou shitsü cheni.

²⁰ Mtsüqheino ayeghi lo timi khumu amikucho shi akivi mlano axine shimo kemi kühae.

²¹ Timi no pikeu tsa kümtsü amlo lo süpu kevilo, tikumo aye o qeu no o ghusho keu nono chilu niae.

²² O mlo no ithi anike no ampi ghi ghuthu kutomo kütami ghushovae.

²³ I no alokütsü lono hi kümtsü pejuvae. I no pi, “Ni ye alotsüni,” ikemu tino I launo putosüve.

²⁴ Kiu acheghi keno ti ye putosüu ani eno shishe thonheike khuu no phuphe luni kea?

²⁵ I no alokütsü ngo thokha thime phunike amlotsü, eno mbomzümi kixikila ngo anikhami ghüzü ye kiutoi keno phuju.

²⁶ I no akithi nguno kukhukimji lakhi phulue: totimi khuu mlo no alichhe eno akhame toi, eno khuu u no ayikichhe toi keno, tino akithi nguno kukhukimji ke. Alhou lopushi chekeu no li launo polu cheni, ikemu axinemi ye li no tsüqü luve cheni.

²⁷ Julo, Yetsapiu no pi, I no thokha vehu phuche kelono lakhi lono lakhi kime keu phulue—

²⁸ I no ideide phu kemu phumlave. Timi qhethonhe gholo akümzümi kiptimi lakhi I no phulu, ikemu totimi gholo ye lakhimu phumlae.

²⁹ Julo, I no hi likhi phulue: Alhou ye amikucho timi lhophe, ikemu panongu no küptshü küpünaive ke.