YETSAPIU 6 - Sumi Naga CL (Re-edited) Bible (BSI)

¹ Khetsünhe qholo küsakügha akeu I no ithulu, tino mishishei timiqo qaqhi cheni:

² Alhou no küakini ngo tinhemgha eno agigihupu pesü timi khami tsüe, eno pa no lunishi keu lakhimu püqüve moe, ikeghi Alhou no pa pelo tipaqo peitha no alopivilu pemono tüsümiu pelo aloino lupe cheni. Hi ye adou; eno shishe küsakügha ke.

³ Timi lakhi no atianuli 100 kutolo aghi no ampe kutomo xünamu, pa küxü lo alokivi thimeqo shou alokiqi küha, eno akivishi pa sükumo shiqholu kepu shimo aye, I no pi anike anga akithi shi ghi punu keu huno pa nguno akiviue.

⁴ Kughengu anga tipau ye adou lono punu eno aküzü lo hailove cheni, eno tilauno qhoi kümsümave cheni.

⁵ Tinguno alau, anga huye khetsünhe küvü ithumla, momu kiumu mthae, ikeghi kinimi nguno pau no akulho qhilue.

⁶ Ikehu pa no ampe 2,000 kutolo xükepu shi namu, akivi kiumu ithulumo aye, kiu ala ania, timi kümtsü a-a aphiphi lo wuve nanike kumo keshea?

⁷ Timi no mla chekeu ye achuqupu ghenguno ke, ikemu pa müzü tüghü ghapiqilu chemoe.

⁸ Alokütsümi ye anikhami nguno kiu akiviu ani kea? Kumlhomi lakhi ye aküxü lo kishi xükepu keno ithi keu likhi no pa kivipu kiu shiluni kea?

⁹ Anhethi no ithulu akeu no aposünhei niye itsü chekeu nguno akiviu ke. Hi ghi adou eno amülhü küghaju püha keu paphi ke.

¹⁰ Kiu kiumu lho ipeghive keqo thaqhü ye azüuno aje tsüvae, eno timi ye kiu qhemi keno ithivae; pa nguno akumtou akeu sasü kütsala mlae pikeu ghi ithivae.

¹¹ Atsa khije alau pi keno tijehi adoue, tino kiu timi la shitsü ani kea?

¹² Kughengu timi lakhi no aküxü ikhonhei xüno yekükhü toi hecheve chekelo, khuu no pa ghenguno akiviu ye kiu keno ithi nani kea? Milakhi no thive kethiu khuu no pa vilo kiu shive nani keno piluni kea?