YETSAPIU 5 - Sumi Naga CL (Re-edited) Bible (BSI)

Alhou Msalo

¹ Achineki lo wu kelo kutokupui shilo. Tile shika luniye wu keu no mbomzümi ghakishi nguno akiviue, kughengu panongu ye axine shi anie pi mthae.

² Nono pimphi lono kümsüju paghilo, eno kümsülu khavi Alhou vilo piqhi kevilo, kughengu Alhou ye kungugha lo ani eno nono ayeghi lo ani kehu o tsapi kümghü lo.

³ Chilo kütakihi kelono asamo pumo cheni, eno atsa kutomo piuve kelono anikha kepi ithive cheni.

⁴ Kughou nono Alhou lau tushoqhini keno, ti shikupu nike süpushu kevilo. Pa ye anikhami shou amlo kiqi kühae. Nono piqhive keu shikupu lo.

⁵ Piqhive no shimove keu ye piqhi move keu pavie.

⁶ O tsa no o sasü axine lo ilovepe kevilo eno hithiuno Alhou chinemi vilo nono pimive keu pi kevilo. Kushiye Alhou pelo o shou amloide no o u no mlapüa keqo kütsapinyive apeni kea?

⁷ Kughengu kughou asamo eno atsa no kutomo shiveni keno adou shive cheni, ikemu nono msa masakeu ye Alhou ke.

Küakini ngo Ajuaje ye Adou

⁸ Yepeka no kumlhomi nedaqoda eno kuchou xakütha ngo achipiu hexave keu nono ithulu kelo akümza kevilo, kughengu kijemi tipau ye pa nguno akijeu no pa juani, eno panongu shou itaghi akijeu aphike.

⁹ Ikemu akükau no alukichi lo amlotsü aghi keu no aghakhu ghenguno thokha lo alake.

¹⁰ Khuu no pisa kimiye cheni keno, pa ye pisa shou aghaqimo nani, titoi küakini mine chekeu ye paw ilokighi jupe lukümkha shimo nani; hi ghi adoue.

¹¹ Kughou akini no ala shikeno, chuni kemi ghi kutomo shive cheni, eno ampeu huye anhethi no tipaqo juni keu nguno alau ye kiu shiluni kea?

¹² Akümlau ye aghulo chuna kutomo chunamu akivishi zühulu cheni, ikemu kinimi ye akive chhitoi chupusü zühulu chemoe.

¹³ Khetsünhe qholo ighono alhoksa hipau I no ithulue: ampemi no küakini kike cheni eno tino pano mlo kütakihi tsücheni,

¹⁴ akini tipaqo ye anguküsa lono puwove cheni. Eno pa ye anu ani kemu kiumu pesü pa nu qhitsü kepu kühave cheni.

¹⁵ Aza po lono pa ye kishi ighi keno titoi itaghi aphi kümsa idewove nani; aphikümsa ighike toi pa ye akaghashi mlache no kiumu pemono au kümsa wove nani.

¹⁶ Hi ghi ighono alhoksa lakhi: pa no kiutoi ighi keno titoi wove nani, amülhü ghenguno ichheime chekeu ye kiu ala ani kea?

¹⁷ Tinguno alau pa küxü tivilo pa ye aküzü lono amlo ime, küsükini shi, eno amloide ghi chucheni.

¹⁸ Julo, I no kiu phulu keno hike; thime kümtsü nguno akiviu timi no shi kepushi akeu ye Alhou no aküxü ikhonhei pa tsü püake dolono chusho no pa no mlalu keu lo aghaqilu kepue; kughengu hi no pa sajeke.

¹⁹ Alhou no küakini ngo tinhemgha tsüno tipaqo peithalu penike aküka tsü keqo ghi, pano makho ikhilu no pano kümla lo alovi kepue, hi ye Alhou launo agho ke.

²⁰ Pa ye pa küxü kughukho tsala hoilo kümsü monani, kughengu Alhou no pa mlo lopivitsü anani.