YETSAPIU 4 - Sumi Naga CL (Re-edited) Bible (BSI)

Khetsünhe Qholo Alhoksa

¹ Itaghi ayeghi lo nedaqoda keu kümtsü I no ithulue. Nedaqodape akeqo nhezü julo, pano gho shitsüni kemi kühae! Kughengu aküka ye pano qhasü akemi gholo ani kehu khunomu pano lokughuno tsüni kemi kühae.

² Ikehu kithimi thive keqou no itehi xü akemi nguno angukivi shivae pi I no kümsülue.

³ Ikemu hi küma nguno akiviu no punu mono akeqou noke, panongu ye khetsünhe qholo alhoksa kümla ithulu mphie.

⁴ Itaghi I no ithulu keu no timi lakhi no akaghashi mlakeu eno akümla lo shitsa shikeu kümtsü pa kisüghüu jumine kelau noke. Hi ghi adou eno amülhü küghaju püha keu paphie.

⁵ Mbomzümi ye pa u kumshope ngoa no pa ampi chuve cheni.

⁶ Au kichhi lakhi pesü iqünhei akeu huno au putoputo pesü aghime shi amülhü küghaju püha chekeu nguno akiviue.

⁷ Itaghi I no khetsünhe qholo adou vehu ithulu:

⁸ thilimi lakhi anu mu athiküzümi mu kühano ache, ikeghi tamono akaghashi mlache eno pa ye küakini jupe aghaqimo kelau ishi pijumoe “Ni ye khuu ghenguno akaghashi mla eno I lopivini keu milive acheni kea?” Hi ghi adou eno alokivi vehu kumoe.

⁹ Kini no lakhi nguno akiviue, kughengu pama no ime mlakeu lo asaxü kivi ani.

¹⁰ Lakhi no ikiqive aye, lakhiu no sünhe pukulu nani. Ikemu khuu no lüthüshi ani keno ahasapue, kughengu pa no ikiqive kelo pa sünhe puthuni kemi kühae!

¹¹ Itaghi mikini kümtsa zükeu no lüvüilu cheni, ikemu lakhi likhi ye kishino lüvüi luni kea?

¹² Milakhi no lüthü shi akeu theqhi luve aghi namu mikini huno pa mhoqhive nani, akighi ala küthü piliküqha keu ye mlalei süthave mlae.

¹³ Kumlhomi eno alokütsüu lhothemi huno velami mbomzü kükau, kütami kükümsü lu mthave keu nguno akiviue.

¹⁴ Kughengu alhotheu huye pa ghakhu lo kumlhomi shi punu kemu akughuki lono kükalakhü lo ikuve.

¹⁵ Khetsünhe qholo aküxüküa kümtsü no hu alhotheu akükau-a lo ngoniye akeu pape cheghi keu I no ithulue.

¹⁶ Pa no timi kihikhakümla sapheche. Ikeghi khunono pa thiuno ighi nani keno, tipaqo ye pa kümla jupe alovini chemoe. Mtsüqheino hi ghi adou eno amülhü küghaju püha keu paphike.