YETSAPIU 3 - Sumi Naga CL (Re-edited) Bible (BSI)

Thokha Ghenguno Ado

¹ Thokha ghenguno atusho acheni, eno atsütsü qholo avehu kümtsü ghenguno ado acheni:

² punu kepu do, eno thive kepu do; shosü kepu do, eno nhü kepu do;

³ pithi kepu do, eno shipivi kepu do; hephove kepu do, eno shiqhe kepu do;

⁴ qa kepu do, eno nu kepu do; mlo kepu do, eno ilhe kepu do;

⁵ atu peve kepu do, eno atu pekütsü kepu do; küvape kepu do, eno küvapemo kepu do;

⁶ phukepu do, eno pühave kepu do; hekütsü kepu do, eno peve kepu do;

⁷ süxü kepu do, eno pukho kepu do; inaqhoive kepu do, eno atsa pi kepu do;

⁸ kimiye kepu do, eno mithi kepu do; aghüshi kepu do, eno alashi kepu do.

Alhou no Tsükeu Kümlapu

⁹ Akümla kishiu ye pa ghime lono kiu ala shicheni kea?

¹⁰ Alhou no timi pelo mighimghai apeniye akümlapu tsükeu I no ithuluvae.

¹¹ Pa no thokha kümtsü pütüta ghuloki lo jukivishi mlavae. Pa no timi mlo lo lhokta sütsüe, tishi keghi Alhou no abothu lono ashekha kutolo kiu mla keno timi pelo ithi pemoe.

¹² I no pimhelu keu no timi ye xüake tivilo alokivishi eno akivi kümla shikeu nguno akiviu kiumu kühae;

¹³ itaghi kümtsü no chusho no pütüta kümlapu lo alokiqipu shimasae. Hi ye Alhou no timi tsükeu gho ke.

¹⁴ I no ithi anike Alhou no mlakeu kümtsü alholo ache nani; tipau lo kiumu süküpha mla, momu kiumu ikhive mlae. Alhou no hi shitsü keu ye timi pelo Pa zülo ighüqhiyi apeniye ke.

¹⁵ Khikhi shive akeno, ti ye inahuu no shivae, khikhi shiniye ani keno, tighi shivae; kiu shive akeno Alhou no kihikülai nani.

Ayeghimkhu lono Ayeghimkhu

¹⁶ Tinguno alau, khetsünhe qholo I no hi ghi ithulue, achipiu-a lo, kixikila ghi aghi, eno kuchou-a lo küsakügha ghi aghie.

¹⁷ I mlo lono I no pi, Alhou no amikuchomi eno kixikilami shou küghatha nani, kughengu avehu eno akümla kümtsü ghenguno ado anike.

¹⁸ I no timi vehulo I mlo lono pi, ti ye Alhou no panongu peju ani, tishianguno pano pelo panongu ye tüghashi nguno kütau kumoe pi ithi peniye ke.

¹⁹ Kughengu timi lau kiu shi keno tüghashi lau ghi athoshi cheni; lakhi no thive ketoi lakhiu ghi thive nani. Pama gha atuthu aphiphi, eno timi ye tüghashi nguno akiviu ke kumoe, kughengu kümtsü adoue.

²⁰ Kümtsü a-a lakhi lo wuve cheni. Kümtsü ayeghimkhu lono ighi, eno ayeghimkhu lo idewove cheni.

²¹ Timi ghungu no kunguu ikuve cheni eno lhoxü ghungu no aqhou ayeghi lo iqive chenie pi khuu no ithi ani kea?

²² Ikehu I no ithilu keu no timi ye pa no mlalu keu lo alovilu keu nguno akiviu kühae, kughengu tino pa saje ke. Kughengu pa no thive kethiu khuu no pa saghilu no ithulu peni kea?