YETSAPIU 2 - Sumi Naga CL (Re-edited) Bible (BSI)

Alikhi Ampi Pulou ye Adou

¹ I mlo lono I no pi, “Itehi ighilo, I no aghakiqipu pesü o pejuni; o lopivi lo.” Ikemu highi adou shi aghi.

² Akunupu tsa lo I no pi, “Ti ye anikhae,” eno aghakiqipu tsa lo pi, “Ti ye kiu ala ani kea?”

³ I no I mlo tsüqhiyi aji pesü I phimpi lopivitsü jue—ti ye alokütsü no I mlo kichepiye ghi shike—eno kishi mbomzü shi xüni keno tighi phujue, tishikeu lono ado ikhonhei atsütsü qholo xü akelo, timi ye kiu mlakeu no akivi keno ithi niye ke.

⁴ I no akümla kije shijue. I no I sala aki shipe qhino atsailu ghi chijue.

⁵ I no I sala aghutu, aghili-a eno axathili shino tipaqo lo axathibo jeli shosü.

⁶ I zükhe mla no tipau lono asübo thuwu akeqo lo azü sükepu shi.

⁷ I no aqüaxemi kutomo qhüe, I ki lono punu kemi aqüaxemi ake. Jerusalem lo I züumi khunomu I jehi atsü-aqü pighimoe.

⁸ I no ameshoyi ngo ghükayi pekütsüpe qhino I küka bocho lo kükami kinikhuki kümtsü hekütsüpe qhie. Ni ye I lopivi tsüni kemi kiptimi totimi alephemi ache, eno anipu amishimi ache.

⁹ Ikehu ni ye shishe kije shive eno Jerusalem lo I züumi kümtsü nguno akiqheu shive. Eno alokütsü no I lolo ake.

¹⁰ I nhethi no kiu pulo keno ti kümtsü I no ithulue. I mlo no kiu pulo keno lakhimu milive moe, kughengu I mlo no I kümla kümtsü lo aghakiqi shi, eno tino I saxü ke.

¹¹ Tishino I no I u no mlaqhilu keqo ngo akaghashi mlakeu kümsükuto jukelo, ti kümtsü adou shi aghi eno amülhü küghaju püha ketoive. Khetsünhe qholo kiumu ala shilu kepu kühae.

Alokütsü Küxü ye Adoue

¹² Ikehu I no alokütsü ngo mbomzü eno anikha kümsükuto jue. Kughengu akükau thisülu akeu huye kiu shiluni kea? Pa ye azüuno kiu shive akeno ti likhi shilu nani.

¹³ I no ishi ithilu, aküvü no aküzü nguno ala aketoi alokütsü huno anikha nguno ala anie.

¹⁴ Alokütsümi nhethi ye pa kütsü lo acheni, ikemu anikhau ye aküzü lo checheni. Ikeghi I no pimhelu keu ye kümtsü lau ado aghuloki atho ighi cheni.

¹⁵ I no I mlo pütsa, “Anikhau lau kiu shive keno, ti atho I lau ghi shi nani. Imaye ni ye kushiye ighono alokütsü shi ani kea?” I mlo lono I no pike, highi adou kena.

¹⁶ Khunomu alokütsümi na anikhami namu kümsü luni chemoe, kughengu ighini keu tsala loye kümtsü kümsüma khave nani. Alokütsümi ghi anikhami toi kishi thive cheni kelae!

¹⁷ Ikehu ni ye aküxü azüzüve, kughengu khetsünhe qholo kiu shi ani keno aveküsapu ke. Hi kümtsü adou eno amülhü küghaju püha aketoi ke.

Ime Mlakeu ghi Adou

¹⁸ I no aghimeshi mla chekeu kümtsü azüküzüe, kughengu ni ye ti kümtsü I thiu ighini ye akemi sala qhivetsü masa nani,

¹⁹ pa ye alokütsümi momu anikhami shiaghi luvike khuu no ithi ani kea? Ikeghi I no I lokütsü lono mlaqhi keu kümtsü shou pa no ampeu shive nani. Hi ghi adoue.

²⁰ Ikehu ni ye kushiye khetsünhe qholo ighono akaghashi mla chekela pi I mloküsa shi ani,

²¹ kughengu khaniloye timi khuu no alokütsü ngo akighithi eno shitsa peitha no akaghashi mlache keno, pa ye ti kümtsü pesü imemo kemi pelo alokughuno shi peitha penike qhivetsü masave cheni. Hi ghi adou eno amhekiqipu kije ke.

²² Khetsünhe qholo akaghashi mla apüzü timi ye kiu ala shilu cheni kea?

²³ Kughengu pa küxü tivilo amlo ghuju likhi eno pa kümla kümtsü lo aveküsapu likhie. Putho lo ghi pa kükümsü ye akulho qhimlae. Hi ghi adou ke.

²⁴ Timi lakhi no pa ghime vecheo alopivi luno chusho akeu nguno akiviu kütau kiumu kühae. I no ithi keu no hi ghi Alhou launoe,

²⁵ kughengu Pa launo kumo aye khuu no chulu momu alopivilu nani kea?

²⁶ Kughengu khuu no Pa pulou shi keno Alhou no alokütsü, akighithi, eno alokiqi pesü tsü cheni, ikemu Pa no axinemi pelo hekütsü eno kikepe qhino Alhou lopushi chekemi tsüvepe cheni. Hi ghi adou eno amülhü küghaju püha chekeu ke.