YETSAPIU 12 - Sumi Naga CL (Re-edited) Bible (BSI)

O Lhothe lono O Lhoküsüu Kümsülu lo

¹ Nono lhothemi shiaphi lono, aküzü tsalaqo sholu mphi lono, eno nono, “Ni ye aküxü azüzüvae,” ipiuve kepu ghuloki ighi mphi lono o Lhoküsüu ghi kümsülu lo,

² ti ye khetsünhe ngo aqhi eno ayepuqo no züchiyive mphi lono eno khüngküsü no tsütsüghu shelo shi ighi mphi lono tishilo,

³ tipa tsala lo aki khemi no khokho shive nani, akumtomi no miqemleive nani, athi sheküsümi no timi mikhe kehu shesü move nani, eno alashe lono jupipe chekemi no zamemeive nani,

⁴ alaghila lo ahukikhaqo khave nani, athi kütsüghü ghügha chiluzü nani, eno aghau ghügha no timi küda nani,

⁵ panongu ye qhemghai ke-a jupe msa nani, alaghi lo aküighüpu ithulu nani; almond sübo no puyelei, atikha no asheshi no pükawu nani, eno akiminepu kühave nani, kughengu timi ye paw lhokta kilo wocheae eno mloqa kemi no alaghila lo itsü chenie.

⁶ Ghükayi kighi itamphi lono, ameshoyi khu kubo mphi lono, alikoli no azüpuki lo hephoqhi mphi lono, momu kuluho no atughuko lono kubo mphi lono Alhou kümsülu lo.

⁷ Ayeghimkhu no atüghü lo toi ayeghi lo idewove nani, eno aghungu no Alhou lau idewove nani.

⁸ Yetsapiu no pi, adou mu adou. Hi kümtsü adoue.

Alhou Msalo eno Pa Zakütsüqo Pelulo

⁹ Alokütsü shikeu gholono Yetsapiu no no tsaqütsalei aholetsa huju, phikutho, eno pekithipe akighithi timiqo tsüe.

¹⁰ Yetsapiu no azüküvüpu tsa phu, eno süchou no kuchou tsaqo yepe qhie.

¹¹ Alokütsümi tsa ye ambekhemi küsü lo ayi mtsüsüi keu toike, ahole pekütsü püakeu ye ayishu tsatsai yesü püake toike. Tipaqo ye Ambekheu lakhi launo ighie.

¹² I nu, hipaqo nguno alau ye kiukiu aghi namu kutokupui lo. Kaku kutomo yepheni keu ye ashekha kühae, eno chilo phikutho keu ghi aphimpi ghenguno akulho kishie.

¹³ Avehu kümtsü chiluve kethiu ashekha lo hi ani: Alhou msa lo eno Pa zakütsüqo pelulo, kughengu hi no timi kümtsü kümlapu ke.

¹⁴ Kughengu akivi na aküsa namu timi kümla kümtsü, tuqhou no mla püakeqo ghi, Alhou no küghakütha lo süghi nani.