YETSAPIU 11 - Sumi Naga CL (Re-edited) Bible (BSI)

Asho pesü Azü lo Vesülo

¹ O sho pesü azü lo vesüve lo, nono atsala kutomo thiuno ala pekütsülu nani.

² Ayeghi lo kiu nguküsa tsala ighini keno mtha kehu o chuqupu saje pesü timi tsüni momu tache mu tsülo.

³ Khüngküsü no azü likhive aye, ayeghi shou ghuqhive cheni, asübo ye apeu ilaqi na ahuu ilaqi namu tipa-a lo likhi anani.

⁴ Khuu no amülhü jukuto cheni keno shosü mla nani, eno khüngküsü jukuto chekeu ye ghile humla nani.

⁵ Totimi no mishipu akelo kishino anga philo aghungu ighive cheni keno ithikuthu mla ketoi, no ye Alhou no thokha mla püakeu ithini chemoe.

⁶ Inaqhe no apiti yisüve no avelau ye akümla lono o u süchileve kevilo, kughengu no ye hiu no keo huu no akivishi thuwu nani keno mthae, momu kinikujo mu akivi shive luvi.

⁷ Aküvü ye alokepue, eno anhethi no khetsünhe ithulu keu ye aghakiqi ke.

⁸ Timi lakhi no ampe kutomo xülu aye, pa ye amlo kiqishi amasae; ikemu aküzü tsala no tinguno akushuu kepi ithi pelo. Tithiu ye kümtsü adoue.

⁹ O lhothemi, o lhothe lono alovi alo, o lhothe tsala lo o mlo no o lopivitsü apelo. O mlo eno o nhethi no o sache pelo. Ikemu hi kümtsü pesü Alhou no o shou küghathabe nani kepi ithilo.

¹⁰ O mlo lo kütakihi keu ikhive lo, eno o phimpi lono aküsü ikhive lo, kughengu alhothe küxü ghi adoue.