YETSAPIU 10 - Sumi Naga CL (Re-edited) Bible (BSI)

¹ Amiyi kithi no axokütsüngü thazü xo shipüsave tsü cheni; titoi anikha kitila no alokütsü ngo ajekipi pühave tsü cheni.

² Alokütsümi mlo no ajeu küdau pa sawu cheni, ikemu mbomzümi mlo ye piyiu tsüghüve cheni.

³ Mbomzümi ye ala lo chekelo ghi pa nikha piye cheni, eno kümtsü pelo pa ye mbomzümi kepi ithipe cheni.

⁴ Yepeu no o shou amloide aye, o-a qhive kevilo, kughengu iqünheive keu no akipimi kije qhivetsü nani.

⁵ Alhoksa lakhi ayeghi lo I no ithulu püani, yepemi no küqüve keu:

⁶ mbomzümi pesü akuchuqu-a kutomo lo qhive no kinimi pesü akuchuni-a lo qhive.

⁷ Aqüaxemi no khurshi sacheghi, eno sakiphemi no aqüaxemi toi apukhu lono cheghi keu I no ithulu püani.

⁸ Khuu no aqo chhu keno pa no tile ikiqi ilove nani; khuu no akupuwu vexü ilo keno, apighi no mighi nani.

⁹ Khuu no atu chhuke-a lo mla keno, atu no ghüza cheni, khuu no asü shokho cheni keno, tileno izalu cheni.

¹⁰ Ayi no kokoi eno chighimo aye ti peitha nike aküka ala sümasa nani, ikemu alokütsü no tolu penike kuphu cheni.

¹¹ Apighi paghino mighive aye, apighi zükulumi ye kiumu ala shilu moae.

¹² Alokütsümi tsa no agigihupu pa lau süghilu cheni, ikemu mbomzümi tsapi no pa kütsave cheni.

¹³ Pa ye anikha tsa pithu püzü aghüzü tsa no kishekha cheni.

¹⁴ Khunomu kiu shive nani keno mtha keghi, mbomzümi no atsa kighishe cheni, khuu no thive kethiu kiu shive nani keno pilu nani kea?

¹⁵ Mbomzümi no mlaitha keu ye alau pa ghimeve cheni, kughengu pa ye aki lo idewoni keu laghi mthake.

¹⁶ O aghakhu, o kükau no itimi shi aghi, eno ow yepemi no inaqhe no tule-pele chusho thuve aye o hasapue!

¹⁷ Ikemu o kükau no ghenimi nuli shi aghi, eno ow yepemi no shomzü niye kumono ashiaji mto niye ado achipi lono aghulhu shi aye, o lokivipue.

¹⁸ Akipichi vecheo aki lo azü iloghive no aki ilaqive cheni.

¹⁹ Achuqupu ye aghapiqi nike ghenguno mlae, atsaizü no aküxü lopivitsü cheni, pisa no thokha khochile tsü cheni.

²⁰ O kükümsü lonomu akükau ghusho kevilo, momu o chebo lonomu kinimi ghusho kevilo, kughengu aghau ngo achishibo kupu lhoxü no o tsa pesü pive tsü nani.