YETSAPIU 1 - Sumi Naga CL (Re-edited) Bible (BSI)

Aküxü ye Adou

¹ Hi ye Yetsapiu tsa, pa ye David nu Jerusalem lo akükau.

² Adou mu adoue, Yetsapiu no pi, adou mu adoue! Thokha kümtsü adou ke.

³ Timi lakhi ye khetsünhe qholo akaghashi mlakeu lono kiu ala shicheni kea?

⁴ Tiqheli ighi no wove ani ikemu ayeghi ye alhokupuju patho lo acheni.

⁵ Khetsünhe no ipeghi no ilove cheni, eno itaghi ipeghike-a lo mighimghai idewove cheni.

⁶ Amülhü no apeu mülhü iqi no homxasü ahuu iqhove cheni, pa laghi züsü homxa acheni.

⁷ Aghoki kümtsü azüghi lo qoilo cheni ikemu azüghi chhive chemoe; aghoki no huthu keu-a lo ideighi no huthu kithe cheni.

⁸ Thokha kümtsü angaghai ke; ti ye timi no piphe khamlae; anhethi ye khilemu ju aghaqive keu kühae; akini ye khilemu chilu khave chemoe.

⁹ Kiu ache akeno tishi ani aphi, püzüu kiu shive akeno itaghi atho mla ani aphie, ayeghi lo kiumu akithe kühae.

¹⁰ “Julo, hi ye akithe,” ipi kepu kiuala thime ani keshea? Hi kümtsü khaghi ningu züuno acheke toi tishi aphie.

¹¹ Wovekeu ghiliqo kümsü chilelu keu kühavae, titoi hithiumi ghi ighini keu tsala lo kiu shive nani keno, tipaqo kümsüchile lumo nani.

Alokütsü ye Adoue

¹² Ni, Yetsapiu ye Jerusalem lo Israelmi shou akükau ke.

¹³ Eno I no alokütsü shi atsütsü qholo kiu shive ani keno kümtsü phukide juke. Alhou no timi nuliqo pelo mighimghai ape keu ye alokivipu vehu kumoe.

¹⁴ Ayeghi lo shiakeu kümtsü I no ithulu khavae, eno hi ye amülhü küghaju püha cheke toi eno kümtsü adou ke.

¹⁵ Chighichilai keu thime ye shikümzü mlae; eno kühakeu thime ye kihikülailu chemoe.

¹⁶ I mlo lono I no pi, “Ni ye alokütsü shishe kije phuluvae eno I züu Jerusalem lo yepemi kümtsü nguno I no alokütsüu, I mlo no alokütsü ngo akighithi shishe puju shijuvae.”

¹⁷ I no I mlo kuchopu tsü püzü alokütsü ngo mbomzü eno anikha dolo kütüqü keu ithini ye pükapütsa. Ikemu I no phulu keu no highi amülhü küghaju pühake toike.

¹⁸ Kughengu alokütsü alau shikeu lo amloksa alau ani, khuu no akighithi alau ani keno amlo ghime alau ani.