YEKIKITHI ATUGHIU 5 - Sumi Naga CL (Re-edited) Bible (BSI)

Reuben Kughuko

¹ Israel nu anoghiu Reuben kughukomi (pa ye Jacob nu anoghiu kemu papu nipu amishiu shipüthave kelono pa mheghi pesü Joseph nuliqo tsüve, tishike lono pa ye anoghiu kepi yekikithi lo sümlave;

² Judah lagha no mtotoi shi pa thiküzümi ghüsü luno atou ghi ipeghi kemu anoghiu mheghiu no Joseph sala shive aghi),

³ Reuben, Jacob nu anoghiu nuliqo: Hanoch, Pallu, Hezron eno Carmi.

⁴ Joel nuliqo: Shemaiah, Gog, Shimei,

⁵ Micah, Reaiah, Baal,

⁶ Beerah khuu Assyriami kükau Tiglath-pileser no haphe sawuve keno, pa no Reuben lagha lo atou ke.

⁷ Ikemu kughou alagha kughuko yekithi keno hitoi kithive: Jeiel no atou, eno Zechariah,

⁸ Bela, Azaz nu, Shema nu, Joel nu, khuu Aroer lo ache keno, pa ye Nebo ngo Baal-meon qha kutolo küghüna wove.

⁹ Pa ye Gilead lo atsü-aqu no küghüsü ikowove kehu ayeghi pükhasü kipelau Euphrates hikukuu asayeqha kutolo xüche.

¹⁰ Akükau Saul ghuloki lo pano lagha no Hagritmi sasü küpüghü no theqhive. Eno panongu ye Gilead kipela qha kümtsü aphiki lo xüche.

Gad Kughuko

¹¹ Gad laghami ye Reubenmi nguno ahuu Bashan yeghi lono kipelau Salecah kutolo ache:

¹² Joel no atou shi, Shapham no akiniu, Janai ngo Shaphat no Bashan lo atou ishi ache.

¹³ Pano lagha lo abolomi hitoi ache: Michael, Meshullam, Sheba, Jorai, Jacan, Zia eno Eber, pano tsüni.

¹⁴ Hipaqo no Abihail nuli, Abihail no Huri nu, Jaroah nu, Gilead nu, Michael nu, Jeshishai nu, Jahdo nu, Buz nu.

¹⁵ Ahi, Abdiel nu, Guni nu, huno pa limitou,

¹⁶ panongu ye Bashan eno Gilead ngo tipa kümxa lo mishiphuqo lo eno Sharon lo achu kümza-aqo kümtsü lo xüche.

¹⁷ Hi kümtsü Judah kükau Jotham eno Israel kükau Jeroboam ghuloki lono yekithipe qhilue.

¹⁸ Reuben, Gad, eno kipelau Manasseh laghami dolo shitsami azüto, azüta, eno asüzü pekithimi pano qhethonhe lhobidi-bidi aqhe tsüni no lhotsügho aghüshi lo wuluni kemi ae.

¹⁹ Panongu no Hagritmi, Jetur, Naphishmi, eno Nodabmi, sasü aghüshi.

²⁰ Panongu no Hagritmi ngo pano gholo akemi shou toluve, kughengu panongu no aghüshiqa lono Alhou lau pükhübe no kuphu penike khekulhoshi khu kelo Alhou no chilu tsüno aghümi pesü pano u lo sütsüe.

²¹ Panongu no aghümi tsü-aqu sayeshi qhethonhe lhopungu, ambe lakh kini no qhethonhe lhopungu, khurha 2,000, eno timi achili aghi kemi lakh lakhi hakholuve tsü.

²² Tile aghümi kutomo ikiqive, kughengu aghüshi tipau ye Alhouw ke. Tithiu panongu ye haphe sawuve moke kutolo tile acheuve.

Kipelau Manasseh

²³ Kipelau Manasseh lagha ye Bashan yeghi lono wo ahuu Baal-hermon, Senir, eno Hermon To kümtsü lo ikowove.

²⁴ Hipaqo no alaghatomi: Epher, Ishi, Eliel, Azriel, Jeremiah, Hodaviah, eno Jahdiel, panongu ye aghü kivimi, aju-aje kipimi, pütüta lagha lo atomi.

²⁵ Ikemu panoqo ye pano puasü Lhou lau aküpülü achekeu kubove, eno Alhou no pano züuno kütsave keu inaghami lhouqo papewu khave.

²⁶ Tighenguno Alhou no Assyriami kükau Pul, Assyriami kükau Tiglath-pileser ghungu xukuthothu, eno Reuben, Gad, ngo Kipelau Manasseh laghami pa no sasü pano yeghi lo wuve no tilau Halah, Habor, Hara eno Gozan ghoki qhalo alhokuthu ghenguno acheuvepe.