YEKIKITHI ATUGHIU 29 - Sumi Naga CL (Re-edited) Bible (BSI)

Achineki Ghenguno Akümllagho

¹ Tithiu akükau David no kuho akemi kümtsü vilo pi, “I nu Solomon khuu Alhou no kisheluve akeno, pa ye alhothe eno puju-peju keu küha aphi püzü akümlapu no ighono kije shi ani, kughengu aki hi ye timiw kumono Ampeu Alhouw ke.

² Ikehu ni ye I Lhou ki ghenguno tinhemgha hipaqo, ameshoyi nhemgha mlani ke ameshoyi, ghükayi, alazayi, ayi, eno asüpa ghenguno asü, tinguno alau amekusho eno akughupu tu alabe kütüta eno tünananu shikepu tu phuphushi keu kümtsü I no toluke qhemi kütsasa ikhipe tsüvae.

³ Akimthe ki ghenguno tinhemgha tsüve keu gholo itaghi I no I Lhou ki kishilo amlo tsüqhiyi chekeu ghenguno Iw lüthü kinibo lono ameshoyi ngo ghükayi hitoi tsüve ani:

⁴ achineki alou dakepu no Ophir lono süghikeu ameshoyi ahu lakh lakhi shou, eno thakütsüghüve keu ghükayi no ahu lakh kini qhethonhe shighi shou,

⁵ hinguno alau ghi ameshoyi ngo ghükayi kümlami no ala jeli lono kütshakügha shi mlasü peniye ke. Tishiaye ishi, khuu no pa ampi kishekimthe keu shi puloniqhiyi Ampeu lau akümllagho tsünishi ani kea?”

⁶ Ikelo tile ali eno alagha lo sakiphemi, qhethonhe eno aqhe zatsümi, eno akükau kümla lo hiyampemi kümtsü no pütüta pulou lono akümllagho pesü tsü.

⁷ Panoqo no ameshoyi ahu lakh lakhi qhethonhe lhotsüni, ameshoyi pisa muno qhethonhe chighi, ghükayi ahu qhethonhe shighi bidi, alazayi ahu lakh tsügho qhethonhe chighikini, eno ayi no ahu lakh shighi bidi, pesü Alhou ki kümlapu ghenguno tsü.

⁸ Khukhumu akughupu tu aghi keu ye pewo Gershon laghami Jehiel no jukütsü chekeu kinibo lo süvepe.

⁹ Panongu no amlo kümtsü süno puloniqhiyi Ampeu tsülu ke ghenguno alokivi shive. Eno akükau David ghi ighono alokivi shive.

David no Aqo Zülono Inikhu

¹⁰ Tighenguno David no aqo küa lono Ampeu sheqhe ghi pi, “Alholo eno pülhapuju ni puasü Israel Lhou, O Ampeu, No ye sheqheküzüe.

¹¹ Aküka kumto kuloghi, ajuküvü, tokulu, akükanguagha ye Ow ke, O Ampeu, kughengu atsütsü eno ayeghi lo akeu thime kümtsü Ow ke. Ayekipe ghi Ow, eno O pesü kümtsü shou yepeu shiküzüe.

¹² Küakini eno agigihu kinikujo O launo ighi cheni, eno Nono kümtsü shou ayepe ani. Aküka eno akumto ye O u lo ani, eno O küka lono khukhumu kije eno akumto shivetsü cheni.

¹³ Itehi, ningu no O shikimthi eno O je kughushu sheqhe ani O ni Lhou.

¹⁴ “Ikemu ni ye khuue pi eno Iw timiqo ye kiue pi ningu no hi kutolo puloniqhiyi O mlla kulupu shi kea? Kughengu thime kümtsü O launo ighi cheni, eno ningu no Ow pesü O tsüchileve ani.

¹⁵ Kughengu ni puasüqo no inami eno kupokichemi shi ighi ketoi ningu ghi O zülo titoi kemie. Ayeghi lo ni tsala ye yekükhü toi wove cheni eno lakujupu kühae.

¹⁶ O Ampeu, ni Lhou, ningu no O kimthe je ghenguno O sala aki shitsü nike hi kümtsü kupukuno shi ikhiphepe tsü akeu ye O u ghü lono ighikeu eno kümtsü Ow ke.

¹⁷ I no ithi anike No ye timi mlo piliju cheni eno akikhi shikeu lo O züküvü shicheni, I Lhou. I mlo lono akikhi shi thime hi kümtsü süchile mono pesü tsüvae, eno itehi ye Ow timi khunoqo no süchile mono aloviqhiyi akümllagho pesü O tsü ani keno, hile akemi kümtsü I no ithuluvae.

¹⁸ O Ampeu, ni puasü Abraham, Isaac, eno Jacob Lhou, hitoi keu kimji eno akükümsü pesü pülhapuju Ow timiqo lolo qhi püatsü eno panongu mlo pesü O phivilo qhi püatsü lo.

¹⁹ I nu Solomon pelo amlo tsüqhiyi O zakütsü eno ayezah kümtsü pekupulu pelo, tishianguno aki khipau shinike I no kutope qhivetsü akeno, pa pelo ti shiqhilu penike pulo tsülo.”

²⁰ Tishino David no aqomi azah tsü, “Ampeu nongu Lhou sheqhelo!” Eno kümtsü no pano puasü Lhou, Ampeu sheqhe, eno agigihu michishi panongu kütsü pishiqhope Ampeu ngo akükau tsü.

²¹ Panongu no Ampeu lau aghakishi kümllagho tsü, eno tishiwo thoghiu no amshitsü, ambetsü, eno ambeti qhethonhe lakhikhi pesü akipti kümllagho shi ghi atsaiji kümllagho gholono Israelmi kümtsü ghenguno mllae.

²² Tipa tsalani Ampeu zülono panongu no shishe alokivishi chushove. Tishino panongu no David nu Solomon pesü akükau shi ghuthu akiniu veküpha, eno Ampeu ghenguno yepeu kepi pa nukishe, eno Zadok pesü achineu shive.

Solomon Nukishepe Akükau Shi

²³ Ikehu Ampeu no puthuphe tsükeu kükalakhü lo Solomon no papu David-a lo akükau shi iqave. Eno pa küka ye ikoishe wove no Israelmi kümtsü no pa gholu.

²⁴ Sakiphemi, ghüshitomi, eno akükau David nuli kümtsü no akükau Solomon gholo kutuponi keu shi puloluve.

²⁵ Ampeu no Solomon pesü Israelmi kümtsü zülo ighono kije shitsü eno pa züu Israel lo kükami khuu laumu tsüjumo keu kükanguagha pesü pa shou betsü.

David Kithi

²⁶ Jesse nu David no hitoi Israel kümtsü shou ayepelu.

²⁷ Pa no ampe 40 Israel shou ayepe kelo Hebron lono ampe 7 eno Jerusalem lono ampe 33.

²⁸ Pa ye axükushu shi ayeghi lo kinikülü eno agigihu kutomo ithulu no thive. Eno pa nu Solomon no pa-a lo kaluve.

^29-30 Akükau David kümla küghütha abothu lono ashekha kutolo, tipau gholono pa yekipe ghili, pa kumto, eno atüqhüdo kivi-küsa pa shou eno Israelmi ngo acheaxü ghakhuqo shou ikughi keu kümtsü tungkupu Samuel, Nathan, eno Gad noqow yekikithi lo ani.