YEKIKITHI ATUGHIU 28 - Sumi Naga CL (Re-edited) Bible (BSI)

Israelmi Lau David Zakütsü

¹ David no Israel lo kijemi, alagha lo sakiphemi, amqo jeli lo atomi, qhethonhe eno aqhe zatsümi, akükau ngo pa nuli gholo kükaki lo ampemiqow tinhemgha eno pichepighi jukükütsümi, akumtomi eno aghükivimi, kümtsü Jerusalem lo kukumqo.

² Pa no puthugho no pi: “I thiküzümi eno Iw timiqo, I tsa inilo. Ni Lhou pukhu kinepu-a eno Ampeuw Puloshoqhi Bohu kiqhipu-a ghenguno ni ye aki lakhi mlanie pi I mlo lo ache, eno tighenguno thokha kutope qhie.

³ Ikemu Alhou no I vilo pi, ‘I je lono aki shini keu ye no kumoe, kughengu no ye ghüshimi eno aji peleve kemie.’

⁴ Ikeghi Ampeu, Israel Lhou no ni lagha lono alholo Israelmi shou akükau shi penike I kishelu. Kughengu Pa no Judah lagha pesü sakiphemi shi kishelu püzü Judah lagha lono ni limi kishelu, eno ni limi dolo ghi Pa no I pelo Israelmi kümtsü shou akükau shipenike Pa züküvü shike.

⁵ Eno I nuliqo dolo (kughengu Pa no anuli kutomo pesü I kümghatsü kehu) Solomon pesü Ampeu kükalakhü lo iqa no Israelmi shou ayepe penike kishe luvae.

⁶ Ampeu no I vilo pi, ‘Solomon, khuu o nu keno, pa no I ghenguno aki shitsü nani, kughengu pa ye I nu shi penike I no kisheluvae, eno I no papu shi nani.

⁷ Tsala pa no ishi toi akumtoshi I zakütsü eno I yezahqo peche aye, I no alholo pa kükaqha iqhikumto tsü anani.’

⁸ Tighenguno itehi Israelmi, Alhouw timi Ampeu zülo kumqope akeqo, Ampeu nongu Lhou zakütsü kümtsü papelu kepushi phulo, tishianguno nongu no alhokupuju ghenguno ayeghi kivi hipau pükhape athiu no tianuliqo lau amheghi shi qhitsülu nani.

Solomon Lau David Zakütsü

⁹ “I nu Solomon, amlo kümtsü süno puloniqhiyi keu kükümsü xapu o pu Lhou ithilo, kughengu Ampeu no timi mlo lheju no alolo kughu eno kümsüpu akeu kümtsü ithi achenie. Nono Pa phuju aye phulu nani, ikemu nono Pa qhive aye Pa ghi alhokupuju ghenguno o qhive nani.

¹⁰ Itehi tsaqütsalei shilo, kughengu o pelo akimthe chineki mla penike Ampeu no o kisheluvae; ikehu akumto shino mla thulo.”

¹¹ Tishino David no pa nu Solomon lau achineki kukughu shipe tsü, akikhala, aki alou chebo, achineki kinibo, akümllagho thimeqo kinibo, kunguu ngo alou chebo, eno küpükini lakhü qhikepu chebo;

¹² hipaqo ghenguno pa mlo lono kughupe achekeu kümtsü pesü Solomon tsüve.

¹³ David no Ampeu kilo achinemi ngo Levimi eno kütau kümla lo hukuthumi ngo akhu ajukhu peithani kemi ghenguno akümla kughupe Solomon tsü;

¹⁴ ameshoyi eno ghükayi khu-ajukhu mlanike ghenguno ahu;

¹⁵ ameshoyi eno ghükayi kulu kibepu ngo akulu;

¹⁶ Ampeu zülo asho qhitsü kepu ameshoyi ngo ghükayi kibepu;

¹⁷ ameshoyi kütsüghü pesü alisa, ali, eno ajukhu mla kepu;

¹⁸ thakütsüghüve keu meshoyi pesü axokütsüngü kiptia mla kepu; eno cherubim no ameshoyi khurkulu lo pa chishibo sükhope Ampeuw Puloshoqhi Bohu khonhape akeu mla kepu kughupe Solomon tsüe.

¹⁹ David no pi, “Hi kümtsü Ampeu no Pa u lono yepe I lau mtsümishei pithi tsüke.”

²⁰ Tithiu David no itaghi pa nu Solomon vilo pi, “Mtotoi amlo loghi no mlalo. Msa kevi eno aghüthisü kevilo, kughengu Ampeu Alhou, I Lhou, no o gholo ani. Ampeu huthuni ke ghenguno akümla shiqhi moke kutolo Pa ye o qhivemo momu o phevemo nani.

²¹ Ampeu hukuthu kümla lo achinemi ngo Levimi kümlapu kijeve tsüae pi ithilo, o gholo kütshaküghami azükini eno puloniqhiyi mlanishi kemi kutomo anani, titoi sakiphemi eno timi kümtsü no o zakütsü qhoi ikhilutsü nanie.”