YEKIKITHI ATUGHIU 23 - Sumi Naga CL (Re-edited) Bible (BSI)

Levimi Kümla Kughutsü

¹ Kughou David no muchomi shi xükülayeve keno, pa no pa nu Solomon pesü Israel kükau shivepe.

² David no Israel lo sakiphemi eno achinetomi ngo Levimi kümtsü kukütsü sawo qhi.

³ Levimi kiptimi ampe shighi nguno kunguu kihiju kelo pano qhethonhe shighi tache aghi.

⁴ David no pi, “Hipaqo dolo qhethonhe muku bidi no Ampeu ki kümla lo jukükütsümi shini, 6,000 no hiyampemi eno xaküthami shini,

⁵ 4,000 no khagho khemi, eno 4,000 no alebo I no Ampeu sheqhe nike ikhiphetsü keqo pesü Ampeu shipilini.”

⁶ David no Levi lagha lo alimi hipaqo Gershon, Kohath, eno Merari kiqi lono kophave tsü.

⁷ Gershon nu no Ladan ngo Shimei pama.

⁸ Ladan nu pano küthü: atou Jehiel, Zetham eno Joel.

⁹ Shimei nuliqo: Shelomoth, Haziel, eno Haran pano küthü.

¹⁰ Itaghi Shimei nuli: Jahath, Zina, Jeush eno Beriah.

¹¹ Jahath no atou eno Zizah no akiniu, ikemu Jeush ngo Beriah pama ye anuli kutomo shimove ke ghenguno ali lakhi kiqi lono kihive.

¹² Kohath nu pano bidi: Amram, Izhar, Hebron eno Uzziel.

¹³ Amram nu Aaron ngo Moses pama. Aaron ye shishe akimthe kümlapu lo peithani ke kishekimtheve, tishikeu lono pa ngo pa laghami no alhokupuju Ampeu zülo akümllagho süghi no Pa huthu eno Pa je lono kükümgha betsü peniye ke.

¹⁴ Ikemu Alhou timi Moses nuliqo ye Levi laghami gholo kihisüve.

¹⁵ Moses nu no Gershom ngo Eliezer pama.

¹⁶ Gershom nu no atou Shebuel.

¹⁷ Eliezer nu no atou Rehabiah. Eliezer ye anu kütami kühave kemu Rehabiah philono kutomo ikowove.

¹⁸ Izhar nu no atou Shelomith.

¹⁹ Hebron nu no atou Jeriah, Amariah no akiniu, Jahaziel no aküthüu, eno Jekameam no abidiu.

²⁰ Uzziel nu no atou Micah ngo Isshiah pama.

²¹ Merari nu no Mahli ngo Mushi. Mahli nu no Eleazar ngo Kish pama.

²² Eleazar ye totimi likhi thono kiptimi kühano thive, pano limi Kish nuliqo no panongu sasü külave.

²³ Mushi nu no pano küthü: Mahli, Eder eno Jeremoth.

²⁴ Ampeu ki shinike ghenguno apunu mpe 20 nguno kunguu thaqhü khuu no kiu mla kepu keno, lüthü lakhikhi je yekithipe qhikeu kiqi lono hipaqo no Levi lagha lo pütüta limi eno akibo shou akütsü ke.

²⁵ David no pi, “Ampeu, Israel Lhou no aloino keu pesü Paw timi tsüno Pa ghi alhokupuju Jerusalem lo auvae.

²⁶ Tighenguno itehi Levimi ye Ampeu Phiki momu akümlla lo akimthepu thimeqo pesü iqhoiqi moae.”

²⁷ Davidw kishekha tsa kiqi lono Levi laghami apunu mpe 20 nguno kunguu thaqhü ye aje kihilu khave.

²⁸ Kughengu panongu kümlapu ye Aaron laghami kuphu ghi Ampeu kilo hukuthu kümla shini keu, aki khala eno alou acheboqo jukütsükiyi, akimthepu thimeqo shikimthe, eno hukuthu kümla kiu kiumu shini keu ke.

²⁹ Itaghi akümlapu jeli: Ampeu zülo asho qhitsüni keu, athi kümllagho ghenguno ashomkhu, kholaqhi sümono zümzümüi keu sho, püghakeu sho, thazü pesü kunukeu sho, eno akümllagho mighi-huju tsüni keu, hi kümtsü lo kuphutsü penike panongu pichebe.

^30-31 Tinguno alau kugho kughomu Sabbath tsalaqo lo, momu aqhi kithe eno ampe lo tiqhetiniqo lo akipti kümllagho pesü Ampeu tsü kelo, timi khije avehupu shini keno tipau kiqi lono panongu kümla ye ina-kijili atsütsü Ampeu zülo puthugho no shikimthi eno sheqheni keu ghike.

³² Ikehu panongu pelo hipa gholau no kuposhukulu phiki ngo akimthe-a jukuto penike, eno Aaron laghami kuphu ghi Ampeu kilo mla penike pichebe tsüe.