YEKIKITHI ATUGHIU 22 - Sumi Naga CL (Re-edited) Bible (BSI)

¹ Tishino David no pi, “Hileno Ampeu Alhou ki shini, eno Israelmi ghenguno akipti kümlla khache hile shini.”

Achineki Ghenguno Kuto

² David no inaghami khunoqo Israel yeghi lo ache keno kukütsü penike azah tsü, eno pa no atu heküthami pelo Alhou ki shikepu tu chhutha penike akümla kughutsü.

³ Pa no ahukikha ghenguno ayishu ngo akütsapu mla kepu yi eno alazayi ahu shikhakümla pesü tsü,

⁴ eno Tyre ngo Sidonmi no cedar süpa kütsasa David lau süghitsü keu pa no kihimo no ikhiphe tsü.

⁵ Kughengu pa no ishi kümsü, “I nu Solomon ye alhothe aphi eno puju-peju mphi, eno Ampeu ghenguno aki shiniye akeu ye akuaqha kümtsü lo ajuaje küghakichepu shi ighono juqhekulho shimasa ani. Tighenguno I no kutope qhive tsüni.” Ikehu David no pa xü lono tinhemgha jeli kütsasa ikhiphepe qhivetsü.

Achineki Shinike Solomon Pichebe

⁶ Tithiu David no pa nu Solomon ku puwu no Ampeu, Israel Lhou ghenguno aki shitsü penike pichebe.

⁷ Pa no Solomon vilo pi, “I nu, ni ye aki lakhi shipe Ampeu I Lhou lau ikhiphe tsünishi keu I mlo lo ache.

⁸ Ikemu Ampeu tsa no I vilo ishi pi ighive, ‘No ye I ghenguno aki shimo nani, kughengu no ye I zülono ayeghi lo aji kutomo pelevae eno ihulo aghü küpüghüvae.

⁹ Julo, anu lakhi khuu vecheo iqüghai keu yekipe süghi nani keno, o lau punutsü nani. Pa hokümxa lo aghümi akemi kümtsü launo I no pa lokughunotsü nani. Kughengu pa je ye Solomon ipi ku nani, eno pa ghuloki lono I no Israel lo külakishi ngo iqüghai keu süghitsü nani.

¹⁰ Pa no I ghenguno aki shitsü nani. Pa no I nu eno I no pa Pu shi nani, eno I no alhokupuju ghenguno Israel lo pa kükalakhü iqhikumto tsü nani.’

¹¹ “Ikehu I nu, Ampeu no o gholo apeni, tishianguno Pa no o ghenguno piqhi püake toi o pelo Ampeu o Lhou ghenguno aki shiqhilu penie.

¹² Kütau nguno alau, Ampeu no alokütsü ngo vethakulu pesü o kümghatsü peni, tishianguno kughou nono Israel yepeu shini keno, o pelo Ampeu o Lhou yezah pelu penie.

¹³ Tsala Ampeu no Moses vecheo Israelmi tsükeu khuaye eno pimheyeqo nono tsaqütsalei pelu aye, no ye ikoishelu nani. Akumto shino amlo kuloghi shilo. Msa kevi; alomtshüve kevilo.

¹⁴ Ni ye shishe avesa anamu Ampeu ki ghenguno ameshoyi ahu lakh shighi bidi, ghükayi no ahu asale shou eno alazayi ngo ayi kütau no ahu kihikhakümla pesü tsüvae, tinguno alau asüpa ngo atuqo ghi kutomo tsüve ake nono hipaqo gholo süküpha lulo.

^15-16 No ye kupukuno shi atu heküthami, akikishimi, asü kümlami, eno akümla jeli shikithimi, kütshakügha shi ameshoyi, ghükayi, alazayi, eno ayi kümla shikithimi kihikhakümla ani. Ithu no mlalo! Ampeu no o gholo apeniu!”

¹⁷ David no Israel lo sakiphemi kümtsü vilo pa nu Solomon kuphu penike ishi azah tsü,

¹⁸ “Ampeu nongu Lhou ye nongu gholo küha keshea? Pa ye ala jeli lono aloino keu pesü nongu tsüke kumo? Kughengu Pa no hipa cheaxü lo ache kemi pesü I u lo sütsü no Pa eno Paw timiqo zülono ayeghi hi qhasülue.

¹⁹ Ikehu nongu mlo kükümsü kutope Ampeu nongu Lhou phulo. Ithu no Ampeu Alhou je ghenguno achineki shilo, tishianguno Ampeuw Puloshoqhi Bohu ngo akümlla lo akimthe liqo pewo tile qhikepu shinike.”