YEKIKITHI ATUGHIU 21 - Sumi Naga CL (Re-edited) Bible (BSI)

Timi Kikihi eno Püsa

¹ Tithiu Satan no Israelmi ghobide ithughive eno David pelo Israelmi kihiju peniye xukutho.

² Ikehu David no Joab ngo zatsümi vilo pi, “Beersheba lono Dan kutolo wuno Israelmi kihiju lo, eno I pelo ithipe kepushi tipau pewo I pithilo.”

³ Joab no khochile, “Ampeu no Paw timi itehi akeqo nguno ghuthu aqheno küghüsü küphatsü peniwa! Ikemu I mpeu akükau, panoqo ye kümtsü o qemike kumo? Imaye kushiye I mpeu ye hi avehupu shive ani kea? Kushiye hipau lono Israelmi pelo pimive apeni kea?”

⁴ Ikemu akükau tsa no Joab ghüsüve. Ikehu Joab no Israel qha kümtsü lo wuno itsüsü Jerusalem lo ideighi.

⁵ Pa no hitoi timi kihikülai pe David pithi, Israel qha kümtsü lo azütakikihi pekithimi no pano lakh chighiqhaqhi, eno Judah lono pano lakh bidi qhethonhe lhotsüni.

⁶ Tishimu Joab no Levi ngo Benjamin lagha ye akikihi lo sümove, kughengu pa ghenguno akükau zakütsü ye aphikümqhüpu lakhi shiveke.

⁷ Alhou no hipau jupe alokiqi kühave no Israel ghimeve.

⁸ David no Alhou vilo pi, “I no hipau shikeu lono axine kije shivae. Ikemu itehi ye kimiyeno O qeu kutokumo peve tsülo, kughengu ni ye ighono mbomzü kümla shivae.”

⁹ Tileno Ampeu no Davidw tungkupu Gad pütsa no pi,

¹⁰ “Wuno David vilo pilo, ‘Ampeu no hi piani, I no thime küthü o tsü anike lakhi kishelulo; eno ti o lau shitsüni.’”

¹¹ Ikehu Gad no David lau ighi no pi, “Ampeu no hitoi piani, ‘Khikhiu luni keno nono kishelulo:

¹² ampe küthü püqümiye keu, aqhi küthü o ghümi zütakikihi no qhasüpe kütsakungoni keu, momu atsala küthü Israel qha kümtsü lo Ampeu zütakikihi puku no Paw kungumi vecheo püsa jeli süghini keu.’ Itehi ni ye kiu khokichile pesü I puwu keu lau idewoni keno xathalulo.”

¹³ Tile David no Gad vilo pi, “Ni ye shishe avesavae. Ikemu ni ye timi u lo kumono Ampeu u lomu ikiqi iloni, kughengu Paw kimiyekini ye ighono kije ke.”

¹⁴ Tighenguno Ampeu no Israel lo püsa puwu, eno timi qhethonhe lhotsüni thive.

¹⁵ Pa no Jerusalem kütsave penike kungumi hapuwuve, ikemu tishi mphi lono Ampeu no ithuluve no küsakusho süchileve. Pa no kütsakungo akeu kungumi vilo pi, “Tino lumkhavae, itehi ye o u süchilevelo.” Kungumi huye Jebusimi Ornan niqa lo puthugho ae.

¹⁶ David no Ampeuw kungumi atsütsü ngo ayeghi dolo puthugho no pa u lo azütakikihi süjope Jerusalem küdau chhopuwo aghi keu ithulu. Ikehu David ngo layemiqo no yeqhiyephi pepusü itsaqive.

¹⁷ Eno David no Alhou vilo pi, “Timi kihiju penike azah tsükeu huye I no kekumo keshea? Axine shive no alhoksa kije mlave keu huye I no kethono ambe hipaqo ye kiu shive kea? O Ampeu, I Lhou, kimiyeno ni eno I kibolomi shou mu O u beni thono Ow timiqo shou püsa pukutsü kevilo.”

David no Akümlla-khache Shiqhe

¹⁸ Tile Ampeuw kungumi no Gad vilo David ye iqho Jebusimi Ornan niqa lo Ampeu ghenguno akümlla-khache shiqhe masae pi kütüghü penike azah tsü.

¹⁹ Ikehu Gad no Ampeu je lono pive keu tsa lono David no iqho.

²⁰ Ornan no ashothi munu ghi pishipuwo kungumi ithulu, ikelo pa nuli bidi pa gholo akeqo ye itshü khave.

²¹ Tishi akelono pa no David cheghi keu ithulu kehu aniqa lono poipe David zülo itsaqi agi no ayeghi daluve.

²² David no pa vilo pi, “O niqa hipau khije me shinani keno tipa tholono I tsüvelo, tishianguno I no Ampeu ghenguno hile akümlla-khache shiqheni, eno tipau vecheo timiqo launo püsa süchileve tsüpenie.”

²³ Ornan no pi, “Tishilo! I mpeu akükau no kiu pulo keno luni thono. Eno akipti kümllagho mishitsü, süküghüpu sü shikepu amishi kuokhasü ngo athi kümllagho ghenguno ashothi ye kümtsü I no tsüni.”

²⁴ Ikemu akükau no pi, “Moe, I no ame tholono tipaqo qhüni. Ni ye Ampeu tsünike ghenguno kiu ow keno I no luve tsümlae, tike kumono ame tsümo keu kipti kümllagho mu shivemlae.”

²⁵ Ikehu pa no aniqa ghenguno ameshoyi ahu 600 shou pesü Ornan tsüve.

²⁶ David no tilehi Ampeu ghenguno akümlla-khache shiqhe eno akipti kümllagho ngo külakishi kümllagho pesü tsü püzü Ampeu qhüiniju kelo Pa no khochiletsü ghi kungugha lono akümlla-khache shou ami piqitsü.

²⁷ Tishino Ampeu no kungumi azah tsüno pa zütakikihi chhepu luvepe.

²⁸ Kughou David no Ampeu ye tipau süchedo eno aniqa tipau lono pa khochileve tsüe pi ithi keno, pa no tileno aghakishi kümlla shie.

²⁹ Kughengu hipa ghuloki kutolo Ampeu phiki eno akümlla kiptia khikhi Moses no asaye yeghi lono mla keno, ti ye Gibeon lo akiqhe-a lo acheke,

³⁰ ikemu David ye Ampeuw kungumi zütakikihi msa akehu tilau wuno Alhou vilo iniju mlaveke.