YEKIKITHI ATUGHIU 20 - Sumi Naga CL (Re-edited) Bible (BSI)

Rabbah Hakhokulu

¹ Alhoaye lo kükamiqo ye ghixu ghuloki lono aghüla wuche kehu David ye Jerusalem lo ngoa kemu Joab no ghüshimi sasü wuno Ammonmi ghakhu kütsave tsü, tishino wo Rabbah boluve no leilo mukhumuno shivetsü.

² David no Ammonmi kükau kütsü lono kükakütsüqho luvetsü, tipau ye ameshoyi ahu 34 qhemi eno tipau lo akughupu tu dapüaghi keu ye pewo David kütsükuqho lo süvetsü. Pa no aphughi lono thime jeli kütsasa hakholuve tsü.

³ Pa no tile xüküami pesü asü küküxü, akuphu, eno amüghü kümla shipe. David no Ammonmiw mishighüna kümtsü lo hitoi shivetsü. Tishino pa ye Jerusalem lo paw timiqo sasü idewove.

Philistiami Sübosüghimi Heqhi

⁴ Hipa thiu Gezer lono Philistiami sasü aghü küpüghü kepu ipeghi. Tile Hushathmi Sibbecai no sübosüghi laghami lakhi Sippai ipikeu ghiqhive, eno Philistiami mhoqhive.

⁵ Tithiu itaghi Philistiami sasü aghü shikelo Jair nu Elhanan no Gathmi Lahmi, Goliath thiküzüu, ghiqhive tsü, Lahmi ngupa ye ighono kije eno aghüqasü toi shishoi ke.

⁶ Ado hami thiu itaghi Gath lo aghükishi ipeghi, tile sübosüghi lagha lono ighi kemi khuu auloti tsüghogho eno apukhuloti tsüghogho, küqha kelo 24 puche keno timi lakhi ache.

⁷ Kughou pa no Israelmi cheqhi keno, Shimea nu Jonathan, David thiküzüu no pa ghiqhive.

⁸ Timi hipaqo ye Gath lo sübosüghi laghami ke, ikemu panongu ye David ngo paw timiqo u lono ikiqive.