YEKIKITHI ATUGHIU 19 - Sumi Naga CL (Re-edited) Bible (BSI)

Ammonmi no David Timi Thaigha

¹ Tithiu kughou Ammonmi kükau Nahash no thive keno, pa nu no pa-a lo kaluve.

² David no pi, “Ni ye Nahash nu Hanun sasü akivishi xüni, kughengu papu no titoi I sasü xüe.” Tighenguno Hanun no papu ghenguno mlo akelo pa lovekughuno tsüniye David no pa tsapemi puwu. Ikehu panongu no akükau lovekughuno tsüniye Ammonmi yeghi lo ighie.

³ Ikemu Ammonmi kijemiqo no Hanun vilo pi, “David no o lau shikumto kütsümi puwu keu ye o pu gihuke ghenguno kepi no ye kümsü anio? Pa ghinimi hipaqo ye o peqhive nike pukujumi shisü xuju ighi anike kumo?”

⁴ Ikehu Hanun no David ghinimiqo küghape amkhümhi miyeve tsü eno panoqo phiküzü achita lono tsathave tsüno puwuve,

⁵ eno panongu ghi tipa-a lono cheve. Kughou hipau vehu pesü David vilo pi keno, pa no tsapemi hape panongu lau puwu, kughengu panongu ye shishe kujoqhiyi ake. Akükau David no ishi pi puwu, “Nongu mkhümhi no ipeghi moke kutolo Jericho lo ngo aghi no tithiu no ighilo.”

⁶ Kughou Hanun ngo Ammonmi no panongu ye David lau kumthu-kümna shivae pi vethalu keno, panongu no Mesopotamia, Aram-maacah, eno Zobah lono khurkulu ngo khurshimi piqe nike ghükayi ahu qhethonhe shighi-bidi qhalo pesü tsüpuwu.

⁷ Panongu no khurkulu qhethonhe shighi-kini eno Maacah lo akükau ngo paw ghüshimi ishi piqeve, eno tipaqo no Medeba ghüngü lo wo aghazü shipe ngove. Ammonmi ghi aghü shinike panow mishighünaqo lono timi ghakuto saghive.

⁸ Kughou David no ti chilu keno, pa no Joab ngo aghütomi ghüshimi kümtsü aghüla lo puwuve.

⁹ Ammonmi no shekujo aghü küpüghüni keu kikithi shipe aphughi khagho lo ipeghive, eno kükami khunoqo ighi keno pano mqo kütashi aghüngü lo ngoa.

Ammonmi ngo Syriami Theqhive

¹⁰ Kughou Joab no aghümi ye agizüu eno athiu no pa leniye anipi ithive keno, pa no Israelmi aghütomi khami kishepe Syriami küdau ngovepe.

¹¹ Eno achili thaqhüno pa thiküzüu Abishai zakütsü qholono Ammonmi mjochile peni keu shive.

¹² Pa no Abishai vilo pi, “Tsala Syriami no I nguno akumtou shive aye, nongu no ighi no I kuphuni, ikemu tsala Ammonmi no nongu nguno akumtou shive aye I no nongu kuphuni.

¹³ Akumto shilo, ningu niw timi eno ni Lhou phughi ghenguno akumto pepheni, eno Ampeu pelo kiu no Pa lopu keno tishilu peni.”

¹⁴ Tishino Joab eno pa gholo kichemi no aghü shinike Syriami ghazü kupunu wu keloye pa zülono pokhave.

¹⁵ Kughou Syriami no pochekeu Ammonmi no ithulu keno, panongu ghi titoi Abishai zülono aphughi lo pochile ilo khave. Tithiu Joab ye Jerusalem lo idewove.

¹⁶ Ikemu kughou Syriami no panongu ye Israelmi tomove akepi ithi keno, panongu no Euphrates kipelau pano timiqo lau tsapemi puwu no Hadadezer ghüshimiqo zatsüu Shophakh no sasü ighipe.

¹⁷ Hipau tsa pesü David vilo pi kelo pa no Israelmi kümtsü hekütsü sasü Jordan katha ikuve no ghüshimi tipaqo küpüghü niye kithepe ngove. Eno David no kughutsü ketoi paw ghüshimi no pa gholono Syriami mjochile.

¹⁸ Ikelo Syriami no Israelmi nhethe lono pokhave, eno David no ghüshimi khurkulu lo kichemi 7,000, apukhulo kichemi no qhethonhe lhobidi, eno panow zatsüu Shophakh ghi ghiqhivetsü.

¹⁹ Kughou Hadadezer papemi no panongu ye Israelmi tomove akepi ithi keno, panongu no David sasü visho mlave no pa qholo auve. Ikehu tithiu Syriami ye khilemu Ammonmi kuphu nike pulo move.