YEKIKITHI ATUGHIU 18 - Sumi Naga CL (Re-edited) Bible (BSI)

David no Pa Ghümi Theqhive

¹ Hipa thiu David no Philistiami theqhive no panongu ghüsüve, eno pa no Gath ngo tipaqha lo aphu akeqo kümtsü Philistiami u lono luvetsü.

² Pa no Moabmi ghi theqhive, eno panongu ye David qemi shive no asüqha pesü pa tsüuve.

³ David no Euphrates ghoki lo pa thigho shiqhe niye wuche kelono Zobah-Hamath kükau Hadadezer ghi theqhive.

⁴ Eno pa launo khurkulu 1,000, khurghüshimi 7,000, ghüshimi qhethonhe muku luvetsü. Pa no khurkulu 100 qhalo salu kepu khurshi qhivetsü no kütau ye kümtsü akhonhe hechheve tsü.

⁵ Kughou Damascus lo Syriami no Zobah kükau Hadadezer kuphu niye ighi keno, David no pano qhethonhe muku-kini ghiqhivetsü.

⁶ Tishino pa no ghüshimi amqo kije Syria lo aghazü shipe qhive, eno Syriami ghi David qemi shive no asüqha pesü tsüuve. David no khile khile wumu Ampeu no tokulu pesü tsüe.

⁷ David no Hadadezer qemi no pechekeu ameshoyi zütoqo pewo Jerusalem lo qhive.

⁸ Pa no Hadadezer phughi Tibhat ngo Cun lono alazayi kutomo luvetsü. Athiu ye Solomon no tipau pesü azü tughuko kuloghi eno achineki kulaghi lo atsükucho ngo akümlla lo akhu-ajukhu peitha kepu mlave.

⁹ Hamath lo Akükau Tou no kughou David no Zobah kükau Hadadezerw ghüshimi qhoi theqhive keu chilu keno,

¹⁰ pa no Akükau Davidw tokulu ghenguno toshe pa tsü penike pa nu Hadoram puwu, kughengu Hadadezer ye ghuthu kutomo Tou sasü aghüshi cheke. Tou no ameshoyi, ghükayi, eno alazayi nhemghaqo pesü David tsüpuwu.

¹¹ Akükau David no thime hipaqo gholo Edommi, Moabmi, Ammonmi, Philistiami, eno Amalekmi launo ghükayi ngo ameshoyi luve keqo ghi küqhano Ampeu lau ikhiphetsü.

¹² Zeruiah nu Abishai no Amti Khila lono Edommi qhethonhe chighitache ghiqhive tsü,

¹³ eno ghüshimi amqo kije Edom lo qhive, eno Edommi kümtsü no David qemi shive. David no khile khile wu namu Ampeu no tokulu pesü pa tsüe.

Davidw Hiyampemi

¹⁴ David no Israel kümtsü lo ayepe, eno pa no timi kümtsü lau achipiu eno aghibiu lono ayepe.

¹⁵ Zeruiah nu Joab no ghüshimi shou zatsüu shi; eno akiyeu Ahilud nu Jehoshaphat;

¹⁶ Ahitub nu Zadok eno Abiathar nu Ahimelek pama pesü achinemi shi, akiyeu no Shavsha;

¹⁷ eno Jehoiada nu Benaiah no Kherethmi ngo Pelethmi shou sakipheu shi; eno David nuliqo pesü akükau kümlapu lo hiyampemi shivepe.