YEKIKITHI ATUGHIU 17 - Sumi Naga CL (Re-edited) Bible (BSI)

Ampeu no David Sasü Puloshoqhi Shi

¹ Ghuthu lakhi David no pa kilo akelo tungkupu Nathan vilo pi, “Julo, ni ye cedar no mlakeu kilo acheni, ikemu Ampeuw Puloshoqhi Bohu ye aphiki qholo anie.”

² Nathan no khochile, “O mlo lo kümsüpu akeu kümtsü shilo, kughengu Alhou ye o gholo ani.”

³ Ikemu tipaji Nathan lau Ampeu tsa lakhi ighi,

⁴ “Wulo, eno I qeu David vilo pilo, ‘Ampeu no ishi piani: I kungoki mla tsüni keu ye nono kumoe.

⁵ Kughengu Egypt lono Israel saipeghi ke tsala lono Ni ye ishi kutolo aki lo ngoju mphi, ikemu aphiki lo ngono a-a lakhi lono lakhiu lo iqesü chephi.

⁶ I no Israelmi kümtsü sasü khile wukeno, a-a kümtsü lo I no Iw timiqo khemi shi penike Israel lo xaküthami süsü keqo vilo Ni ye ishi pi keshea, “Nongu ye kushiye I sala cedar no shikeu ki mla tsümphi kea?”’

⁷ Tighenguno itehi ye nono I qeu David vilo ishi pini, ‘Aqokitikhi Mpeu no piani, Iw timi Israelmi sakipheu shi penike aluza lo nono ambe jukuto akelono o kulu keu huye I no ke,

⁸ eno nono khilekhile wumu I no o gholo wuno o zülono o ghümi kümtsü heqhive tsüke. I no aje kije pesü o tsüno o pelo ayeghiqha lo aju-aje küami toi shipeni.

⁹ I no Iw timi Israelmi ghenguno a-a lakhi kishe no panoqo pesü tile shosüni, tishianguno panongu no akütsa shi tile ngono khunomu pano pünaqhi pemoni. Alhoksami pelo panongu shipüsa pemoni,

¹⁰ ti ye püzüu I no Iw timi Israelmi jukütsü penike xaküthami süküsü shike ghuloki lo toi pemonie. I no o ghümi kümtsü qhasüve tsüni, tinguno alau I no o lau shuphe anike, Ampeu no o sala aki shitsü nani.

¹¹ Kughou nono o puasüqo gholo wuve kepu tsala ighini keno, I no o polo kughukomi dolo o nu lakhi saputhu nani, eno pa kükaqha iqhikumto tsünani.

¹² Pa no I ghenguno achineki shitsü nani, eno I no alhokupuju pa kükalakhü iqhikumto tsü nani.

¹³ I no Papu shini, eno pa no I nu shini. I no o züu Saul launo Iw iqemokeu kikimiye luvetsü keshi Ni ye pa launo ti luvemo nani,

¹⁴ ikemu I no pa pelo alhokupuju I kibolomi eno I kükaqha lo yepeu shipeni, eno alholo pa kükalakhü iqhikumto tsüni.’”

¹⁵ Nathan no kungunhetsü ithulu keu kiqi lono atsa hi kümtsü pesü David vilo pive.

David Kighini

¹⁶ Ikehu Akükau David no ilo Ampeu zülo iqa no pi, “O Ampeu Alhou, ni ye khuue pi eno I laghami no kiue pi Nono hi kutolo I saighi kea?

¹⁷ Ikeghi O Alhou, O nhethe lo hi ye tülalo aghi kepu toi Nono ighini keu lo ghi O qeu laghami ghenguno atsa kije pive tsüae, eno akiqheu timi toi ni ikhilu tsüke O Ampeu Alhou!

¹⁸ Nono O qeu David gihuve keu lo hinguno alau O vilo kiu pikulupu ani kea? Kughengu Nono O qeu ithi anie.

¹⁹ O Ampeu, O qeu ghenguno eno O pulou kiqi lono Nono akighiche kümla hi kümtsü ithi peniye mlave tsüae.

²⁰ O toi kemi lakhimu kühae, O Ampeu; eno ni kini no chiluve ake O nguno alau Alhou kütau ye kühae.

²¹ Ow timi Israel toike khuu ania? Ayeghi lo shiye lakhi pesü Ow timi shiniye No Alhou ampi no khunoqo Egypt lono xaphelu keno, panongu zülono Nono O jekipipu eno akümzapu shi shiyeqo hapheve tsüke.

²² Tishino Nono Israelmi pesü alholo Ow timi shivepe, eno Nono panongu Lhou shike, O Ampeu.

²³ Itehi ye, O Ampeu, Nono O qeu eno pa laghami ghenguno pivekeu tsa kiqi lono alholo shikupu tsülo,

²⁴ eno O je ye pülhapuju kije shikithe hitoi pi cheniae, ‘Aqokitikhi Mpeu, Israelmi Lhou ye kuchou no Israel Lhoue,’ eno O qeu David laghami yekipe ye Nono iqhikumto tsü anani.

²⁵ Kughengu I Lhou, Nono O qeu laghami kughuko tsünie pi pephe piyevae. Tighenguno O qeu ye O lau inikhu lukepu mlo kumto ithuluvae.

²⁶ Ikehu O Ampeu, No ye Alhou ke, eno Nono thime kivi hipau pesü O qeu lau piqhive tsüae.

²⁷ Nono O qeu laghami pelo alhokupuju O zülo ache penike amlokiqi shi kümgha tsüke, O Ampeu, kughengu Nono kiu kümghave tsü keno ti ye alholo kükümghau shivae.”