YEKIKITHI ATUGHIU 16 - Sumi Naga CL (Re-edited) Bible (BSI)

Aphiki lo Puloshoqhi Bohu Qhive

¹ Panongu no Puloshoqhi Bohu pewo David no tshü püakeu phiki alou ghove, eno akipti kümllagho ngo kuposhukulu kümllagho pesü Alhou zülo qhitsü.

² Kughou David no akümllagho tsüve keno, pa no Ampeu jelono timiqo kümghatsü

³ no asho, ashi, eno atsaikipki sho pesü Israelmi kiptimi totimi kümtsü aküphashi kijetsü.

⁴ Tishino pa no Levimi khami pelo Ampeuw Puloshoqhi Bohu zülono Israelmi Lhou Ampeu kusü, shikimthi, eno shipili penike süküsü shi.

⁵ Asaph pesü atou shi, akiniu no Zechariah, Jeiel, Shemiramoth, Jehiel, Mattithiah, Eliab, Benaiah, Obed-edom, eno Jeiel, panongu ye akighilebo ngo aheo ghi küighani kemike; eno Asaph no küghapayi küighani keu shie,

⁶ achineu Benaiah ngo Jahaziel pama no alhokuthu Ampeuw Puloshoqhi Bohu zülono afuko küighani keu shi.

⁷ Eno tipani David no Asaph ngo pa thiküzümi paghi Ampeu lau shikimthikütsü le phe penike pichetsü.

Davidw Shikimthikütsü Le

⁸ O Ampeu shikimthilo; Pa je kulo; ashiayeqo pelo Pa kümla ithi pelo!

⁹ Ale phepe Pa shipili sheqhelo; Paw akümzapu kümla pesü pilo!

¹⁰ Pa kimthe jelo ajuküvüpu shilo; Ampeu phukemi no alovilo!

¹¹ Ampeu phulo, Pa kumto phulo; Pa gholo ngoni ke müamzü lo!

^12-13 O Israel kughuko Alhou qemi, Jacob laghami, Paw kishekipheqo, Paw akümzapu eno mzamghalei keu kümla eno küghakütha tsa kümtsü kümsülu lo!

¹⁴ Pa ye Ampeu ni Lhou; Paw küghakütha ye ayeghiqha kümtsü ghenguno ke.

¹⁵ Tiqheli qhethonhe ghenguno Pa no azah tsükeu, puloshoqhi alholo kümsülu lo,

¹⁶ Abraham sasü puloshoqhi shikeu, Isaac lau pikiqhi shoqhi shikeu,

¹⁷ tipau iqhikumto ghi Israelmi lau lhokta puloshoqhi khikhi Jacob lau xaküthaza shi tsü keno,

¹⁸ ti ye hike, “I no Canaan yeghi pesü amheghi shi o saje shitsüni.”

¹⁹ Kughou panongu no amsa loji, mpimghiyi eno kupokiche shi,

²⁰ aghakhu lakhi lono lakhiu lo, kükaqha lakhi lono lakhiu lo itsüche keno,

²¹ Alhou ye khuu pelomu pano nedaqoda pemoe; panoqo züqhushi Pa no kükamiqo sakiyi ghi

²² pi, “I no nukisheve kemi bukevi, Iw tungkupmi ghime kevilo!”

²³ Ayeghiqha kümtsü no Ampeu lau ale phelo! Tsalakipe Paw xakulu ghili pilo.

²⁴ Shiyeqo gholo Pa jekipi shuphe tsülo, ashiayeqo gholo Pa kughushu kümlaqo shuphelo!

²⁵ Kughengu Ampeu ye kije eno shishe sheqhe küzü, eno alhou kümtsü nguno akiqheu shi sümsa kepue.

²⁶ Kughengu ashiaye lhouqo ye ameküküha julho likhie, ikemu Ampeu no atsütsü pulhosü.

²⁷ Agigihu eno kükanguagha no Pa sühope ani; akumto eno alokivi no Pa kilo ani.

²⁸ Ashiayeqo, Ampeu akishe tsülo, ajekipi eno akumto pesü Pa tsülo!

²⁹ Ampeu no ithulu küzüpu jekipi pesü Pa tsülo; akümllagho pesü Pa zülo ighilo! Jukighilepu shi akimthe lono Ampeu mllalo;

³⁰ ayeghi kümtsü no Pa zülo khokhoshi lo; iyei, ayeghi ye iqhisüvae, ti ye khilemu itha moae.

³¹ Atsütsü no amlokiqi shilo, eno ayeghi no alovi lo, “Ampeu no ayepe ani” ipi shiyeqo gholo pilo!

³² Azüghi eno tipau pichhipe akeu lhoxü kümtsü no ighalo; aluza eno tile akeqo no alovi lo!

³³ Tileno aghasa lo asüboqo no Ampeu zülo alokivi shi ale phe nani, Pa no ayeghi lo ayepe nike ighi nani.

³⁴ Shikimthi keu Ampeu tsülo, kughengu Pa ye aloe; Pa kikimiye ye alholo mtotoi acheni!

³⁵ Itaghi ishi pilo: “Ni xalu lo, O ni xakulupu Lhou, shiyeqo gholono ningu hekütsüpe khaqhiphe tsülo, tishianguno nino shikimthi keu pesü O je kimthe tsüni, eno O sheqhe O jekipipu shini.

³⁶ Israel LhouAMPEU lau pülhapuju lono pülhapuju lo kümgha keu alo!” Tithiu timi kümtsü no, “Amen!” ipi no Ampeu sheqhe.

Puloshoqhi Zülo Akümlla

³⁷ Tishino David no Asaph ngo pa thiküzümi pesü Ampeuw Puloshoqhi Bohu zülono tsalakipetsü hukuthu kümla shipenike tile qhive,

³⁸ Obed-edom eno pa thiküzümi 68 no panongu kukuphuu shi, eno Jeduthun nu Obed-edom ngo Hosah pama no khagho khemi shipenike picheve.

³⁹ David no achineu Zadok ngo pa thiküzümi achinemi pesü Gibeon lo akiqhe-a lo Ampeu pusho akeu lo qhive

⁴⁰ tishianguno panoqo pelo Ampeu no Israelmi lau azah tsükeu kümtsü pape ghi ina-kijili atsütsü Ampeu lau akipti kümllagho tsü peniye ke.

⁴¹ Panongu gholo Heman ngo Jeduthun eno kütami khunoqo pesü akimchi shi kishephe no aje shuphetsü keno, tipaqo ghi küqhano Ampeu sheqhe peni keu shi, kughengu Paw iqemokeu kikimiye ye alholo acheni ke.

⁴² Heman ngo Jeduthun pama ye Alhou kimthe lekiphe lo peitha kepu afuko eno küghapayi peche. Jeduthun laghami pesü khagho kikhelo süküsü shive.

⁴³ Tithiu timi kümtsü pütüta kilo wove, eno David ghi pa kibolomi kümgha tsünike aki lo wove.