YEKIKITHI ATUGHIU 15 - Sumi Naga CL (Re-edited) Bible (BSI)

Puloshoqhi Bohu Jerusalem lo süghi

¹ David no pa Phughi lo aki kutomo pa ghenguno shipe qhi. Pa no Alhouw Puloshoqhi Bohu kiqhi-a kuto eno tipau ghenguno aphiki mla.

² Tishino Levimi kumo aye khunomu Puloshoqhi Bohu pe pemo nike pa no pive, kughengu panongu ye Alhouw Puloshoqhi Bohu jukuto eno pülhapuju Ampeu huthu penike Pa no kishephe ke.

³ David no Ampeuw Puloshoqhi Bohu pewo a-a khile pa no kutopüa keno tile qhive niye Israelmi kümtsü hekütsü sawo Jerusalem lo qhie.

⁴ Pa no Aaron ngo Levi laghami kukumqo:

⁵ Kohath li lono Uriel atou gholo pano 120 hekütsülu;

⁶ Merari li lo Asaiah atou gholo 220;

⁷ Gershom li lo Joel gholo 130;

⁸ Elizaphan li lo Shemaiah gholo 200;

⁹ Hebron li lo Eliel gholo 80;

¹⁰ eno Uzziel li lo Amminadab gholo 112.

¹¹ Tithiu pa no achinetomi Zadok ngo Abiathar, eno Levimi Uriel, Asaiah, Joel, Shemaiah, Eliel, eno Amminadab, ishi kupuwu

¹² no panoqo vilo pi, “Nongu ye Levi lagha lo alimi sakiphemi ake, tighenguno nongu ampi eno no thiküzümi kishekimthe lo, eno Israel Lhou Ampeuw Puloshoqhi Bohu pewo I no kuto püake-a lo qhikepu shilo.

¹³ Kughengu atüghüu loye nongu no tipau pemoke ghenguno, eno ninguu ghi Pa pulou phumove ke ghenguno Ampeu ni Lhou xukighide gha ni shou ikughive ke.”

¹⁴ Ikehu achinemi ngo Levimi no Israel Lhou Ampeuw Puloshoqhi Bohu peighi nike pano ampi kishekimtheve.

¹⁵ Eno Ampeu tsa kiqi lono Moses no azah tsüke toi Levimi no awophe peche keshi abighi lono tipau kuhope.

¹⁶ David no itaghi alokivi ghügha süqheni kehu Levimi sakiphemi vilo pano thiküzümi dolo alephemi khunoqo no alebo jeli, aheo, küghaküsü lebo, küghapayi, küigha cheni keno panongu süsü penike azah tsü.

¹⁷ Ikehu Levi laghami no hipaqo süküsü shi: Joel nu Heman; pa thiküzümi Berekhiah nu Asaph, eno pano bolo Merari lagha lono Kushaiah nu Ethan,

¹⁸ panoqo shelo ajo akiniu lono Zechariah, Jaaziel, Shemiramoth, Jehiel, Unni, Eliab, Benaiah, Maaseiah, Mattithiah, Eliphelehu, Mikneiah, eno khagho khemi Obed-edom ngo Jeiel.

¹⁹ Alephemi Heman, Asaph, eno Ethan no alazayi küghapayi küighani keu shi;

²⁰ Zechariah, Aziel, Shemiramoth, Jehiel, Unni, Eliab, Maaseiah, eno Benaiah no aheo ghügha kunguu no küighani;

²¹ eno Mattithiah, Eliphelehu, Mikneiah, khagho khemi Obed-edom ngo Jeiel, hipaqo no aqhou lono küighani keu shi kithitsü.

²² Levimi alekiphe lo atou Chenaniah, no alephe ghola ithi akehu pa no mije tsüni keu shive.

²³ Berekhiah ngo Elkanah pama no Puloshoqhi Bohu khemi shipe.

²⁴ Shebaniah, Joshaphat, Nethanel, Amasai, Zechariah, Benaiah, eno Eliezer, achinemi hipaqo no Alhouw Puloshoqhi Bohu zülono afuko küighani keu shi. Obed-edom ngo Jehiah pama ghi Puloshoqhi Bohu khemi shipe.

²⁵ Tishino David no Israel lo layemi ngo zatsümi sasü alokivi shi Obed-edom ki lono Ampeuw Puloshoqhi Bohu süghi niye wuve.

²⁶ Levi laghami no Ampeuw Puloshoqhi Bohu peche kelo Alhou no kuphutsü penike panongu no amshitsü tsüni eno ambetsü tsüni ghiqhipe mllave.

²⁷ David ye phepheike phi akivi chijebobo pepusü che, alephemi ngo pano sakipheu Khenaniah, eno Levimi khunoqo no abohu peche keno, panoqo ghi pa toi pepusü che. David ye achinemi phi ephod ghi pucheke.

²⁸ Hitoi shino Israelmi kümtsü no iqhaighu akibo, afuko, küghapayi, aheo, eno küghaküsü lebo ghügha gholono ale phesü Ampeuw Puloshoqhi Bohu peighi luve.

²⁹ Kughou Ampeuw Puloshoqhi Bohu no David Phughi tolu keno, Saul nga Michal no alashe lono pishipipe Akükau David no alovi ilhe cheghi keu ithulu, eno amlo lono pa jukünathave.