YEKIKITHI ATUGHIU 14 - Sumi Naga CL (Re-edited) Bible (BSI)

David Nipu Amishimi eno Atianuliqo

¹ Tyre kükau Hiram no David ghenguno akighiki mla tsüniye asütsa kipemi gholono cedar sübo, atukümlami, eno asükümlami puwu.

² Ampeu no David pesü Israel kükau shino Israelmi ghenguno pa kükaqha pesü nibonilei shitsü keu pa ye ithi ake.

³ David no Jerusalem lo anipu kutomo lu eno kiptimi totimi kutomo kughuko.

⁴ Pa no Jerusalem lono atianuli ithulu keqo: Shammua, Shobab, Nathan, Solomon,

⁵ Ibhar, Elishua, Elpelet,

⁶ Nogah, Nepheg, Japhia,

⁷ Elishama, Beeliada eno Eliphelet.

Philistiami Theqhive

⁸ Kughou Philistiami no David ye Israel kümtsü shou akükau shi nukishevae pi chilu keno, panongu no mtazü pa phuthuve. Ikemu David no ti chiluve no panongu sasü aghü küpüghüni ke kutove.

⁹ Tipau ghuloki lo Philistiami no Rephaim Khila lo akemi leighi.

¹⁰ David no Alhou küsütsaju, “Ni ye Philistiami sasü küpüghü kepu kema? No ye panoqo pesü I u lo sütsü nima?” Eno Ampeu no pa vilo pi, “Wulo, I no panongu pesü o u lo sütsünie!”

¹¹ Ikehu David no Baal-perazim lo iqho no tilauno panongu theqhi khave, eno pa no pi, “Azü khepucho püakeu mpa ipeghi keshi Alhou no I vecheo I ghümi shoxü ilo leluve tsüae.” Tighenguno tipa-a pesü Baal-perazim kuvetsü.

¹² Philistiami no pano lhouqo qhive no pokhave kehu David no azah tsüno tipaqo piti khavepe.

¹³ Tishive kethiu ghi Philistiami no tipau khila leniye ideighi

¹⁴ kehu kughou David no itaghi Alhou sasü küsütsaju keno, Alhou no pa vilo pi, “No ye panongu gizüu no kumono chenabo küdau no homxasü panoqo zübou no lelo.

¹⁵ Kughou asübo kütsüqa küdau nono ghüshimi lache toikeu sütsa chiluni keno, tileno aghüle kuno panongu halelo, kughengu Alhou no O züuno Philistiami ghüshimi heqhi niye wuve ake.”

¹⁶ Ikehu Alhou no azah tsü ketoi David no tishi püzü Gibeon lono Gezer kutolo Philistiami ghüshimi haleve.

¹⁷ David jekipi ye aqha kümtsü lo kügha wove, eno Ampeu no shiye kümtsü pelo pa sümsape.