YEKIKITHI ATUGHIU 13 - Sumi Naga CL (Re-edited) Bible (BSI)

Kiriath-Jearim lono Puloshoqhi Bohu Süghi

¹ David no qhethonhe shou, aqhe shou zatsümi lakhikhi sasü küsütsa,

² eno Israelmi mishi zülono pi, “Tsala nongu lopu shilu eno Ampeu ni Lhou no pulotsü aye, ningu Israel yeghi lo niw timi kümtsü, eno achinemi ngo Levimi pütüta ghüna lo akemi pelo ningu lau ighi kumqo penike ku puwuni.

³ Tishino ni Lhouw Puloshoqhi Bohu sachile süghiveni, kughengu Saul ghuloki lo ningu ye alokümsü kühave ke.”

⁴ Timi kumqope akemi zülo ti ye achipishi aghive kehu kümtsü no tishi nike pulove.

Uzzah eno Puloshoqhi Bohu

⁵ Ikehu David no Kiriath-jearim lono Alhouw Puloshoqhi Bohu süghini ke ghenguno Israelmi apeu Egypt lughi lono ahuu Lebo-hamath kutolo akemi kümtsü hekütsü.

⁶ David no Israelmi kümtsü sasü Judah yeghi Kiriath-jearim lo Baalah ipikeu-a lono Alhouw Puloshoqhi Bohu, khipau lo Ampeu no cherubim shou ache keno, tipau pekiqhe süghi nike iqho.

⁷ Panongu no Abinadab ki lono mishikulu kithe lakhi lo Puloshoqhi Bohu süve no Uzzah ngo Ahio pama no sache,

⁸ eno David ngo Israelmi kümtsü no alokivi shi Alhou zülo ahe-agho pephe ale phe, eno küghaküsü lebo, aheo, amqü, küghapayi ngo afuko küighasü che.

⁹ Kughou panongu no Khidon niqa lo ighi keno, amishi no küpxape ikiqi cheghi kehu Uzzah no Puloshoqhi bohu mtulu niye pau chhopuwo.

¹⁰ Tileno Ampeu xukighide kije Uzzah shou ikughive, pa no Puloshoqhi Bohu buve kehu Ampeu no tipa-a lono pa heqhive, eno pa ye Alhou zülono thive.

¹¹ Ampeu no süchile mono Uzzah shou Pa xukighide pepheke gheno David ye ighono amloideve. A-a hipau pesü ishi kutolo Perez-uzza ipi kucheni.

¹² Tipani David ye Alhou msave no pi, “Ni ye kishi aki lo Alhouw Puloshoqhi Bohu pewoni akea?”

¹³ Ikehu David no Puloshoqhi Bohu Jerusalem lo pewo moni keu shive no sawo Gathmi Obed-edom kilo qhive.

¹⁴ Eno Alhouw Puloshoqhi Bohu ye aqhi küthü kutolo Obed-edom kibolomi gholo qhive. Ikelo Ampeu no Obed-edom kibolomi eno pa no akeu kümtsü kümgha tsüe.