YEKIKITHI ATUGHIU 12 - Sumi Naga CL (Re-edited) Bible (BSI)

Aghükivimi no David gholo Küqha

¹ David no Kish nu Saul zülo ngomlave no itshüsü Ziklag lo ake ghuloki lo aghükivimi khunoqo aghüshi lo pa kuphu chekeno timi tipaqo no pa lau ighi.

² Panongu ye Benjamin kughuko lo Saul laghami, asüzü kipemi eno akivishi apiji kapuwu chekemi, eno au ajeu-piyiu süla shimono athoshi akighi lono atu küzüpe vepuwulu chekemi.

³ Kümtsü shou atou no Ahiezer, pa thiküzüu Joash pama ye Gibeahmi Shemaah nu; tipau shelo Azmaveth nu Jeziel ngo Pelet, Beracah, Anathothmi Jehu,

⁴ Gibeonmi Ishmaiah, ghüshitomi shighi gholo sakipheu; Jeremiah, Jahaziel, Johanan, Gederahmi Jozabad,

⁵ Eluzai, Jerimoth, Bealiah, Shemariah, Haruphmi Shephatiah;

⁶ Elkanah, Isshiah, Azarel, Joezer eno Korah laghami Jashobeam;

⁷ Gedormi Jeroham nu Joelah ngo Zebadiah pama.

⁸ Gad laghami aghükishi lo puju-pejuve kemi ajekipi ghütomi, azüto eno angu kipe lo shitsami no asayeqha lo David no sükusho-a lo akelono pa gholo küqhaluve. Panongu gi ye abongshuu gi mihi eno naghuto lo ashe toi mthüe.

⁹ Atou no Ezer, akiniu no Obadiah, aküthüu no Eliab,

¹⁰ abidiu Mishmannah, apunguu Jeremiah,

¹¹ akütsüghou Attai, akütsüniu Eliel,

¹² akütacheu Johanan, atokuu Elzabad,

¹³ achighiu Jeremiah, chighiaqhaqhiu Machbannai.

¹⁴ Gad laghami hipaqo ye ghüshimi kijemiqo; pano dolo ayitiu no ghüshimi kütami 100 qhemi, eno akichiu no qhethonhe qhemie.

¹⁵ Ampe lo aqhi atüghüu ghuloki lo kughou Jordan zü no amkü kutolo qochili akeno, timi hipaqo no katha iku tilau kipelau no kulolau kuto akhila lo küghüna akemi kümtsü hapupo khave.

¹⁶ Itaghi Benjamin ngo Judah laghami khami no David lau sükusho-a lo ighi.

¹⁷ David no panoqo sholu nike khalau ipeghi no pi, “Nongu no aküsami kiqi lono I kuphu niye ighi aghi aye, I mlo ye nongu gholo ani; ikemu I küghape I ghümi lau thechu niye aghi aye, I u pesü nongu shou bemo namu, ni puasü Lhou no nongu sakiyi nani.”

¹⁸ Tile aghütomi shighi dolo atou timi lakhi Amasai, ipikeu shou Alhou Ghungu ikughive no pa no pi, “O Jesse nu David, ningu ye ow, eno o gholo anie, O David! O gholo eno o kukuphumi lau aloino keu alo, kughengu o Lhou no o kuphu achenie.” David no panoqo saluve no paw ghüshimi mqo lo kijemi shivepe.

¹⁹ Kughou David no Philistiami gholono Saul sasü aghü shiniye ighi keno, Manasseh lagha lo khami no David lau poighive. (Ikemu Philistiami yepemi no kuchughupe, “Pa ye ni kitimeve no pa mpeu Saul lau pove nani” ipive no David puwuve, ikehu pa ye Philistiami kuphu mlave.)

²⁰ David no Ziklag lo idewo cheke lono Manassehmi hipaqo no pa gholo poighive: Adnah, Jozabad, Jediael, Michael, Jozabad lakhiu, Elihu, eno Zillethai, panoqo ye Manassehmi qhethonhe shou atomi ke.

²¹ Panongu no David kuphu ghi aphughi leighi kemi mjochile, kughengu panongu ye kümtsü shitsami eno amlo kuloghi shi ghüshimi saphe chekemi ke.

²² Tsalakipetsü timi mqo kütüta no David kuphu nike pa gholo ighikeu huno paw ghüshimi kütsasa shive.

²³ Ampeu tsa kiqi lono Saul kükaqha pesü David u lo süve tsüniye azüta angu kipemi ghüshimi loji hitoi Hebron lo David lau ighi.

²⁴ Judah laghami azüta angu kipemi pano 6,800;

²⁵ Simeonmi aghükivimi 7,100;

²⁶ Levimi 4,600;

²⁷ Aaron lagha lo sakipheu Jehoiada gholo 3,700.

²⁸ Aghütou Zadok eno pa li lo zatsümi 22;

²⁹ Benjamin lagha lo Saul limi 3,000, hi kutolo panongu kutomo no Saul lau amlo tsüche ke.

³⁰ Ephraimmi aghükivimi qhethonhe muku no aqhe-tache;

³¹ Kulolau Manassehmi qhethonhe chighitache, hipaqo no David pelo akükau shipeniye piwu ke;

³² Issacharmi 200, panoqo ye ado-aghuloki kiqi lono Israelmi ye kiu shikepu keno ithi chekemi atomi;

³³ Zebulunmi aghüshi lo khutive kemi, David kuphuni keu kimji likhi qhino aghü nanu kümtsü xapu akemi qhethonhe lhopungu;

³⁴ Naphtalimi atomi 1,000 gholo azüta angu kipemi qhethonhe shighi tsüni;

³⁵ Danmi aghüshi ghenguno kutope akemi qhethonhe muku tache no aqhe tsügho;

³⁶ Ashermi aghü lo khutive no kutope akemi qhethonhe lhobidi;

³⁷ Reuben, Gad, eno Jordan Kipelau Manasseh laghaqo no aghünanu kümtsü xapusü timi lakh lakhi no qhethonhe muku ighi.

³⁸ David pelo Israelmi kümtsü kükau shipeni keu kimji lono ghüshimi hipaqo no aghüshi lo wuniye chekeshi shekujo Hebron lo ighi. Titoi Israelmi kümtsü no David pelo akükau shi penike akükümsü lakhi shilue.

³⁹ Ikehu panongu no atsala küthü kutolo David gholo ngono pano thiküzümi no kuto tsükeu chusho ae.

⁴⁰ Itaghi pano laghami Issachar, Zebulun, eno Naphtali lo küamiu ghi khurha, sayeshi, khurgha, eno amshitsüqo lono achuqupu jeli, ashomkhu, mubuthi sho, atsaikipki, atsaiji eno thazü, amshitsü eno ambe, kupukuno shi xapu ighi, kughengu Israel ghakhu kümtsü lo alokivi kije akehue.