YEKIKITHI ATUGHIU 11 - Sumi Naga CL (Re-edited) Bible (BSI)

David pesü Akükau Shive

¹ Tithiu Israelmi kümtsü Hebron lo David lau wuno pa vilo pi, “Ningu ye o shi eno o ji ke.

² Wovekeu lo Saul no ni kükau shiche kelo nomu nono aghüshi lo Israelmi saphe ighike. Eno Ampeu o Lhou no o vilo pi, ‘Nono Iw timi Israelmi sakipheu shinani, eno nono Iw timi Israelmi sakipheu shinani.’”

³ Ikehu Israelmi layemi kümtsü no Hebron lo akükau lau ighi, eno David no tileno panongu sasü Ampeu zülono puloshoqhi shi. Panongu no Ampeu tsa Samuel vecheo tsükeu kiqi lono pa nukishepe Israelmi kükau shive.

David no Jerusalem Lelu

⁴ Tithiu David no Israelmi kümtsü sasü Jerusalem lo wu, tipa ghuloki lo Jebus ipiche, eno tile küghüna chekemi ye Jebusimiqo ke.

⁵ Jebusimi no David vilo pi, “No ye hile iloghi mla nani.” Tishimu David no Zion sükusho-a leluve no tipa-a pesü “David Phughi” ipi kuluve.

⁶ David no pi, “Khukhumu Jebusimi ghiqhi tüghüu no ghüshitou eno zatsüu shipeni.” Ikelo Zeruiah nu Joab no atüghüu shilu kehu pa no zatsüu shiluve.

⁷ David no sükusho-a lo ngoluve, tighenguno tipa-a pesü “David Phughi” ipi kuve.

⁸ Pa no Millo lono aphughi külaqa eno shiqhe kithepe bosü luve, eno Joab no shipüsave keqo shiqhe kithe.

⁹ David ye aqokitikhi Ampeu no pa gholo akehu alau eno alau shi kije shikitheve.

Davidw Ghüshitomi

¹⁰ Hipaqo no Davidw akumto ghüshitomi ke, panongu ye Ampeu no Israelmi vilo pikeu kiqi lono David pelo akükau shi penike Israelmi kümtsü gholo küqhano akumtoshi pa kucho shino choqhe tsüke.

¹¹ Atüghüu no Jashobeam, pa ye Hakhmonimi eno aghütomi akighicheu küthü gholo lakhi. Ghuthu lakhi lo pa no angu pesü timi 300 küpüghü no kümtsü pithive tsü.

¹² Akighicheu küthü gholo akiniu no Eleazar, pa ye Dodo nu eno Ahohi laghami.

¹³ Kughou Philistiami no aghü shinike Pas-dammim lo kütsüpe akeno, pa ye David gholo ake. Israelmi no Philistiami launo posü ashothi luqa kije lakhi lo ngoa.

¹⁴ Ikemu pa no alu mta lo puthugho luve no mjochile thuve kelo Philistiami kutomo pithive tsü. Ampeu no tokulu kije pesü tsüno panoqo xalue.

¹⁵ Ghuthu lakhi lo ghüshitomi shighi gholo pano küthü no Adullam tuki lo David no itshü akeu-alo iqi, tilehi Philistiami ye Rephaim khila lo aghazü shipe ngoa.

¹⁶ David ye sükusho-a lo ngoa, eno Philistiami mqo akijeu no Bethlehem lo ake.

¹⁷ David no minemighei laju pi, “O khuana no Bethlehem ghutu kikha lo azükikhe zü shopewo I piyelu keaye lae!”

¹⁸ Tileno ghüshitomi küthü huno Philistiami ghazü kathasü wuno azükikhe lono azü shope David lau süghi. Ikemu David no tipau yenike züqhulo Ampeu zülo leqhive

¹⁹ eno pi, “I Lhou zülo ni ye khilemu hitoi shimo nanie! Ni ye timi hipaqo küxü ji yeve tsüni keshea? Kughengu pano küxü kutolo kümsapu lo ikhiphe tsüno hi peighi tsüke.” Tighenguno pa ye tipau yemove. Aghütomi pano küthü no hipau kümla shitsüe.

²⁰ Joab thiküzüu Abishai ye akighichemi shighi gholo atou ke, pa no pa ngu pesü timi 300 sasü küpüghü no qhoi pithi khave. Akighichemi küthü nguno alau pa ghi ajekipi shilue.

²¹ Pano shighi dolo pau no ajekipi shino panonguw zatsüu shive, ikemu küthü je qhemiu ye tolumoe.

²² Jehoiada nu Benaiah ye Kabzeelmi aghütomi, akümla kivi shiche kemi. Pa no Moabmi aghütomi kini ghiqhive, eno kughou avükiqi ghuloki shi keno, pa no wuno aqokutho lono abongshuu lakhi ghiqhive.

²³ Itaghi pa no Egyptmi sübosüghimi akushulau auxakuchho kinia toike ghiqhive. Egyptmi huno pa u lo aghüqasü paphishi angu pecheghi, ikemu Benaiah no asüthalu pesü pa mjo no pa u lono angu süxape pa qhuqhive.

²⁴ Jehoiada nu Benaiah no akumto kümla hipaqo shino küthü gholo pa ghi ajekivi shilu.

²⁵ Pa ye shighi gholo aju-aje kivi shilu kemu küthü gholo ye kumoe. David no pa kheu shi penike pa süküsü shive.

²⁶ Hipaqo no aghütomi: Joab thiküzüu Asahel, Bethlehemmi Dodo nu Elhanan,

²⁷ Harodmi Shammoth, Pelonmi Helez,

²⁸ Tekoami Ikkesh nu Ira, Anathothmi Abiezer,

²⁹ Hushahmi Sibbecai, Ahohimi Ilai,

³⁰ Netophahmi Maharai, Netophahmi Baanah nu Heled,

³¹ Benjamin lo Gibeahmi Ribai nu Ithai, Pirathonmi Benaiah,

³² Gaash ghoki phivilo akemi Hurai, Arbathmi Abiel,

³³ Baharummi Azmaveth, Shaalbonmi Eliahba,

³⁴ Gizonmi Hashem, Hurarmi Shagee nu Jonathan,

³⁵ Hararmi Sakhar nu Ahiam, Ur nu Eliphal,

³⁶ Mekherathmi Hepher, Pelonmi Ahijah,

³⁷ Carmelmi Hezro, Ezbai nu Naarai,

³⁸ Nathan thiküzüu Joel, Hagri nu Mibhar,

³⁹ Ammonmi Zelek, Zeruiah nu Joab ghübo kipeu Naharai, pa ye Beerothmi,

⁴⁰ Ithrimi Ira ngo Gareb,

⁴¹ Hatimi Uriah, Ahlai nu Zabad,

⁴² Adina no Shiza nu, Reuben lagha lo akhoto sakiphemi, paw ghüshimi shighi ache,

⁴³ Maacah nu Hanan, eno Mithnimi Joshaphat,

⁴⁴ Ashterathmi Uzzia, eno Aroerimi Hotham nu Shama ngo Jeiel pama,

⁴⁵ Tizimi Shimri nu Jediael ngo Joha pama,

⁴⁶ Mahavimi Eliel, Elnaam nu Jeribai ngo Joshaviah pama, eno Moabmi Ithmah,

⁴⁷ Eliel, Obed, eno Jaasiel noqo no Mezobaitmi.