YEKIKITHI ATUGHIU 10 - Sumi Naga CL (Re-edited) Bible (BSI)

Saul ngo Pa Nuliqo Kithi

¹ Philistiami no Israelmi sasü aghü küpüghü, Israelmi ye tomlave no aghümi zülono pove kemu Gilboa toghi lono kutomo ghiqhi pithive tsü.

² Philistiami no Saul ngo pa nuliqo theqhive no Jonathan, Abinadab eno Malkhi-shua pano küthü ghiqhive.

³ Saul ghenguno aghükishi hipau ighono mkamihi ighive, apiji kipemi no pa ithuluve no ghüzave.

⁴ Tile pa ghübo kipeu vilo pa no pi, “O zütakikihi pesü I ghiqhive lo, tikumo aye aphighüyiko ghamo kemi no I peitha püsa nosae.” Ikemu pa ghübo kipeu no tishini keu ighüve. Ikehu Saul no pa zütakikihi shou iku pa likhi pau jiqhive.

⁵ Kughou pa ghübo kipeu no Saul thive keu ithulu keno, pa ghi pa zütakikihi shou ikiqi iku thive.

⁶ Saul ngo pa nu küthü ye hitoi shi aküxü kühave, eno pa lagha ghi tipau lono kishekhave.

⁷ Kughou Israelmi Jezreel bokhu lo akemi no ghüshimi pokhave keu, eno Saul ngo pa nu küthü thive keu sütsa chilu keno, kümtsü no pano kungo-a qhive no pokhave, ikehu Philistiami no ighi püzü tilehi xüsüve.

⁸ Saul thiwo thoghiu Philistiami no thive kemi nhemgha lheniye ighi no Saul ngo pa nu küthü kumo Gilboa Toghi lo aghikeu ithulu.

⁹ Panongu no Saul kütsü eno pa ghünanu luve no asütsa kipemi hape Philistia qha kümtsü lo panow timi eno ajulhoqo vilo asütsa kivi piwupe.

¹⁰ Panongu no pa ghünanu pesü pano lhouqo chineki lo qhi, eno pa kütsü pesü Dagon chineki lo tshüqhi.

¹¹ Ikemu Philistiami no Saul lau kiu shive keno hi kümtsü Jabesh-gileadmi no chilu kelo,

¹² pano gholo amlo kumtomi no wu püzü Saul ngo anu küthü sükumo pesü Jabesh lo ighi. Panoqo no asaghi pewo aphisübo qholo shiqhove no atsala tsüni kümvü.

¹³ Saul ye Ampeu lau pükhübe move kehu thive. Pa ye Ampeu lau pa küpülü kubove no Ampeu no azah tsükeu pemove, eno alaghi kichetsü peniye tuumi lau wuve.

¹⁴ Pa ye Ampeu lau kichekütsü phuwu püamoe. Tighenguno Ampeu no pa pithive eno pa kükaqha pesü Jesse nu David tsüve.