YEKIKITHI AKINIU 9 - Sumi Naga CL (Re-edited) Bible (BSI)

Sheba Kükaliu

¹ Kughou Sheba kükaliu no Solomon jekipi chilu keno, li no ighono kushokütsü ighikuju tsa pesü pa pejuni ye Jerusalem lo ighi. Li gholo apapemi kütsasa ighi, eno sayeshi lono vekujumkhu, ameshoyi kutomo, eno akughupu tuqo peighi. Kughou li no Solomon sholu keno, li no amlo lo puche keu kümtsü pa vilo pi.

² Solomon no liw ighikuju kümtsü khochile tsü, eno kiumu khochile mlave momu küsüve keu shimoe.

³ Kughou Sheba kükaliu no Solomon lokütsü chilu, pa no kükaki shikeu ithulu keno,

⁴ pa ghulhu lüpa lo achuqupu jeli, pa qholo kijemiqo küghüqa, pa hukuthumi ghola eno pano phimini pekupu, pa jukhu kipemi, eno pa no Ampeu kilo akipti kümllagho pesü mlla keu, kümtsü ithulu kelo, li ye atuthu ghi shemlave.

⁵ Li no akükau vilo pi, “I no ni ghakhu lono o tsa eno o lokütsü ghili timi launo chilu keu ye kuchou kena,

⁶ ikemu I no ighi no I nhethi no ithulu moke kutolo ni ye pülümoe. Julo, o lokütsü kighiche ye tüxamu I vilo pimo kena; o ghili ye asütsa I tokeu nguno kiye anie.

⁷ O nipuqo lokivipue! O qemi lokivipue, kughengu panongu ye alhokuthu o zülo puthughope o lokütsü tsa chilu acheni!

⁸ Ampeu o Lhou shelo! Pa no o shou amlokiqi shino o pesü Israel kükalakhü lo qhie! Kughengu Ampeu no alholo Israel kimiye ke ghenguno Pa no o pesü akükau shike, tishikeu lono o pelo achipiu eno amikucho shi peniye ke.”

⁹ Tishino li no ameshoyi ahu 4,080 vekujumkhu kutomo eno akughupu tuqo pesü akükau tsü. Sheba kükaliu no vekujumkhu Akükau Solomon tsükeu jehi ye khilemu ithulu püamoe.

¹⁰ Itaghi, Hiram ngo Solomon qemi khunoqo Ophir lono ameshoyi süghi keno, tipaqo no algum sü ngo akughupu tuqo ghi kutomo süghi.

¹¹ Akükau no algum sü pesü achineki eno kükaki lo aküptasü shi, eno alephemi ghenguno akighilebo mlatsü. Algum sü titoi keu Judah yeghi lo khilemu küha aphie.

¹² Akükau Solomon ghi Sheba kükaliu no lunishi keu kümtsü tsüe. Li no akükau lau süghi keu nguno alau li no khukeu kümtsü tsüe. Tithiu li ngo li qemiqo ye pano yeghi lo idewove

Solomon Küakini

¹³ Ampe lakhi lo Solomon ye ameshoyi ahu 23,000 ithulu che,

¹⁴ tipau gholo ameshoyi kuphumi, alhikishimi, Arabia kükami, eno Israel lo anghqo no süghi che.

¹⁵ Solomon no ameshoyi pesü azüto kijeje 200 mla; azüto lakhikhi lo ameshoyi ahu tsüni.

¹⁶ Pa no azüto 300 mla; lakhikhi lo ameshoyi ahu küthü no mlae. Azüto hi kümtsü Lebanon Ghasü Kilo qhikhave.

¹⁷ Akükau no akühahu no kükalakhü ghi kije mla eno ameshoyi akiviu no küzüve.

¹⁸ Kükalakhü ye anepa tsügho ae, eno ameshoyi pukhu kinepu shikime pukue, alakhü putoputo lo au kibepu mla, eno ti küma phivilo abongshuu no puthughope akeu julho ghope qhie.

¹⁹ Abongshuu chighikini no anepa tsügho lo hula hila aphe lo qhike. Hitoi keu khuno kükaqha ghenguno mu mla püamoe.

²⁰ Solomon jukhu kümtsü ameshoyi no mla eno Lebanon Ghasü Kilo akhu ajukhu ye kümtsü ameshoyi no mlakeu likhie. Solomon ghuloki lo ghükayi ye ame kühave.

²¹ Kughengu akükau zükiluqo no Hiram qemi gholono Tarshish lo wuche. Ampe aküthükü lo paw Tarshish zükiluqo no ameshoyi, ghükayi, akühahu, ashuki, eno awughidu xapu ighiche.

²² Ikehu Akükau Solomon ye ayeghi lo kükami kümtsü nguno küakini ngo alokütsü lo akighicheu shive.

²³ Ayeghi lo kükami kümtsü no Alhou no pa mlo lo sütsü keu lokütsü inini ke ighiche.

²⁴ Kümtsü no agho pesü pa tsüche, ghükayi, ameshoyi, chijeboike phi, myrrh, vekujumkhu, khurshi, khurgha, ampe atsütsü kutomo pa tsüche.

²⁵ Solomon no khurkulu ngo khurshi ki 4,000 ache eno khurshimi 12,000 ache, tipaqo pesü khurkulu phughiqo lo eno Jerusalem lo akükau gholo qhiche.

²⁶ Pa no Euphrates lono Philistiami yeghi eno Egypt lughi kutolo kükami kümtsü shou ayepe che.

²⁷ Akükau no Jerusalem lo ghükayi pesü atu toi balha shivetsü, eno Cedar sübo no Shephelah lo tüküthibo toi kütsasa shive tsüe.

²⁸ Pa sala khurshiqo ye Egypt eno ayeghi kümtsü lono süghi che.

Solomon kithi

²⁹ Solomon no kütau kiu mla keno, hukuthu lono ashekha kutolo, tungkupu Nathan xülhe, Shilohmi Ahijah tungkuptsa, eno Nebat nu Jeroboam ghenguno Iddow kungunhetsü lo yepüani ke kumo keshea?

³⁰ Solomon no Jerusalem lono Israelmi kümtsü shou ampe lhobidi ayepe.

³¹ Tishino pa ye pa puasüqo gholo zühuve eno papu David phughi lo shiqhove. Eno pa nu Rehoboam no pa thisü luve.