YEKIKITHI AKINIU 8 - Sumi Naga CL (Re-edited) Bible (BSI)

Solomon no Mlalu keqo

¹ Solomon no Ampeu ki eno pa kükaki shikeu ampe muku luve.

² Hiram no mishighüna pa tsü keqo ghi shikithe luve eno Israelmi pelo tipaqo lo ngovepe.

³ Solomon no Hamath-zobah haphe luve.

⁴ Pa no asayeqha lo Tadmor phughi shiqhe eno tinhemgha ngo kuchukini kikepe qhinike mishighünaqo Hamath lo shiqhe.

⁵ Pa no Beth-horon Lashou ngo Beth-horon Aqhou ghi mlae, ti ye aliwo kumto eno khagho ngo akhadu pe khathalu keu mishighüna ke,

⁶ eno Baalath ngo tinhemgha eno kuchukini kikepe qhiche keu mishighüna kümtsü, paw khurkulu ngo khurshimi mishighünaqo, eno Jerusalem, Lebanon, eno pa kükaqha lo pa no khile mlanishi keno, kümtsü lo mlake.

⁷ Israel kumomi Hittimi, Amorimi, Perizimi, Hivimi, eno Jebusimi khunoqo pithi khamove keno,

⁸ Israelmi no leighi kelo heqhi khamove keqo, hipaqo lagha no tipa yeghi lo xüche—Solomon no tipaqo pesü anguka lono aqemi shivepe eno ishi kutolo tishi aphie.

⁹ Ikemu Solomon no pa kümla lo Israelmi ye aqemi shi peithamoe; panongu ye ghüshimi, paw kijemi, khurkulu zatsümi, eno khurshimi kiqi lono peithae.

¹⁰ Solomonw kijemi, pano 250 no timiqo shou kükagha peitha che.

¹¹ Solomon no David phughi lono Pharaoh nonga sasü ighi no li ghenguno mlatsü keu kilo qhive, kughengu pa no pi, “I nipu ye Israel kükau David kükaki lo ngokepu kumoe kughengu Puloshoqhi bohu qhive keu-a ye akimthe ke.”

¹² Tishino Solomon no akümlla-khache pa no mlakeu lono akipti kümllagho Ampeu lau mlla,

¹³ eno Moses zakütsü kiqi lono tsalakipetsü akümllagho pesü tsüe: Sabbath tsala, aqhi kithe, eno ampe lo tiqhetini küthü—Kholaqhi Sümokeu Sho, Ghile Tiqhetini, eno Apusho lo Pine Tiqhetini.

¹⁴ Papu David khuaye kiqi lono pa no achinemi kümla kijeve tsü, Levimi ghi achinemi lau shekiqhe ngo hukuthu kümla atsala kiqi lono kijeve tsü, eno khagho khemi ghi khaghoqo lo kije puwuve kughengu Alhou timi David no tishi azah tsüve ke.

¹⁵ Akükau no achinemi ngo Levimi lau küakini tsa lo eno kiukiu vehulo mu azah tsükeu panongu no tipau lono tsüghüve moe.

¹⁶ Hitoi Ampeu ki boqha ghoke tsala lono kishekha moke kutolo Solomon kümla kümtsü tokulu shilue. Eno Ampeu ki shiqhi luve.

¹⁷ Tishino Solomon no Edom yeghi lo azüghi mkülo Ezion-geber ngo Eloth lo wu.

¹⁸ Eno Hiram no pa qemi zükiluqo eno azüghi akivi shi ithi akemi aqemi pa lau puwu, eno panongu kümtsa Solomon qemi gholono Ophir lo wuno tilauno ameshoyi ahu 15,300 pesü akükau Solomon lau ighi.