YEKIKITHI AKINIU 7 - Sumi Naga CL (Re-edited) Bible (BSI)

Achineki Shikimthe

¹ Solomon no pa kighini tave kemtsa, kungugha lono ami iqighi no akipti kümllagho ngo aghakishi kümllagho pitive, eno Ampeu juküvü no achineki chhive.

² Ampeu juküvü no achineki chhive kehu achinemi ye Ampeu kilo ilomlave.

³ Kughou Israelmi kümtsü no ami iqighi keu ngo achineki lo Ampeu juküvü ithulu keno, panongu no agi pishiqhope aghüza lo ngove no Ampeu mlla eno shikimthi ghi pi, “Pa ye aloe, kughengu Paw iqemokeu kikimiye ye alhokupuju acheni.”

Achineki Ikhiphekütsü

⁴ Tithiu akükau eno timi kümtsü no Ampeu lau aghakishi kümllagho tsü.

⁵ Akükau Solomon no amshitsü 22,000 eno ambe lakh lakhi no qhethonhe muku pesü mllae. Hitoi akükau eno timi kümtsü no Alhou ki ikhiphe tsü.

⁶ Akükau David no Ampeu kishele ghenguno alebo jeli mla keqo pesü achinemi no panongu no ngoche keu lo puthughove eno Levimi ghi tishi ngoluve—kughengu Paw iqemokeu kikimiye ye alholo acheni—kugho kughomu David no hipaqo sasü akishe le phekelo, hipaqo ghüngüu achinemi no afukoqo küigha che eno Israelmi kümtsü no puthughove che.

⁷ Solomon no Ampeu ki zülo achebo amtau ghi ikhiphe tsü, tileno pa no akipti kümllagho, athi kümllagho, eno külakishi kümllagho lo atha kijeje pesü mlla, kughengu Solomon no alazayi kümlla khache mlakeu ye akipti kümllagho, athi kümllagho, eno külakishi kümllagho lo atha kijeje ghenguno müghülo ke.

⁸ Tipa ghuloki lono Solomon no Israelmi kümtsü sasü atsala tsüni aghulhu shi; tile timi kütsasa kumqo, ti ye Lebo-hamath lono Egypt Ghoki kutolo no ighie.

⁹ Eno atsala akütacheni ye panongu no kishekha hoho shi, kughengu panongu no akümlla-khache ikhiphetsü keu no atsala tsüni eno aghulhu no atsala tsüni puwove ke.

¹⁰ Aqhi akütsüniu, atsala muku aküthüu lo pa no timiqo pütüta kilo puwove, Ampeu no David ngo Solomon eno Paw timi Israelmi kinikülü tsükeu ghenguno shishe alokivi shi wokhave.

Iw Timiqo no Inikhu Aye

¹¹ Hitoi Solomon no Ampeu ki ngo kükaki mla luve. Pa no Ampeu kilo ngo pa kilo kiu mlani ke kughu keno, thokha kupukülai toluve.

¹² Tile Ampeu no putho lono pa lau ipeghi no pi, “I no o kighini chiluvae, eno achineki hipau lono I lau aghakishi kümlla-a shi penike I no ikhiluve tsüae.

¹³ I no kungugha khave no ghuqhi tsü move kelo, tülhaquqo pelo aghakhu külhüvepe kelo, timiqo lau asa-agha puwu kelo,

¹⁴ tsala Iw timi I je kuche keqo no kuchuni püzü inikhu no I phuighi eno panow kixikila lono tsüghü ighi aye, I no kungugha lono panongu kighini chilutsü nani eno pano xine qhive tsüno pano yeghi shipivi tsü nani.

¹⁵ Itehi ye I nhethi tsükho niae eno I kini no kughope aki hipau lono inikhu keu ini tsüni.

¹⁶ Kughengu itehi aki hipau ye I no kishekimthepe qhivae, tishianguno alholo I je tile ache peni. Ado kümtsü lo I nhethi eno I mlo ye tile ache nani.

¹⁷ Eno o ghengu ye, tsala o pu David no cheche ketoi, I no ayezah o tsü keqo nono pelu aye,

¹⁸ I no o pu David vilo, ‘No ye Israel lo ayepeni kemi püqümo nani,’ ipi püake toi, I no o kükalakhü iqhikumto tsü nani.

¹⁹ “Ikemu nono tsüghüve no I zakütsü o tsü keqo hebide, eno kütau lhouqo huthu no mllauve aye,

²⁰ I no I yeghi o tsü püakeu lono o hapheve nani eno aki khikhi I no I je ghenguno shikimthepe püani keno, ti ghi I zülono ikhive nani. Eno hipau pesü küghakiche tsa eno thoküghapu shivetsü nani.

²¹ Aki hipau khikhi ajekipipu shi ache keno, hi veche iqhoiqi chekemi kümtsü no akichiqhi akümza ghi pi nani, ‘Kushiye Ampeu ye hipa yeghi shou eno aki hipau shou hi shive tsü kea?’

²² Tile timiqo no khochile nani, ‘Kughengu panongu no Ampeu pano Lhou khuu no pano puasüqo Egypt lono saipeghi keno, Pa kümsümave eno Alhou kütau qhoqhüuve no tipaqo mllauve. Hi ghenguno Ampeu no panongu shou shiküpsa hipau puku tsüe.’”