YEKIKITHI AKINIU 6 - Sumi Naga CL (Re-edited) Bible (BSI)

Solomon no Timiqo Kümghatsü

¹ Tileno Solomon no pi, “Ampeu no Pa ye ighono aküzü lo ananie pike.

² Ikemu I no O pelo alholo ache penike O ghenguno akümllaki kighiche mlave tsüae.”

³ Timiqo no hekütsüpe puthugho ake lono akükau no timiqo lau tsüghü ighi no panongu shou kükümgha betsü.

⁴ Pa no pi, “Israel Lhou Ampeu sheqhelo! Pa no I pu David lau tushoqhi püakeu Pa u no ti shikupuvae; Pa no hitoi piqhi püake,

⁵ ‘I no Egypt lono Iw timiqo saipeghi ke tsala lono, Israel yeghi lo I je ghenguno aki shiqhe nike aphughi lakhimu kishemoe, eno timi khumu Iw Israelmi yepeu shi penike kishemoe;

⁶ ikemu I je apeni kehu I no Jerusalem kishelu eno David pelo Iw timi Israelmi shou ayepe penike kishelue.’

⁷ I pu David no Israel Lhou, Ampeu je lono akümllaki shinike pa mlo lo ae.

⁸ Ikemu Ampeu no I pu David vilo pi, ‘Nono I je ghenguno akümllaki mla tsünike o mlo lo akeu ye akivie,

⁹ ikeghi aki ye nono mlamo nani, ikemu o nu o polo kiyighi no I je lono aki mla nani.’

¹⁰ Ikehu Ampeu no Pa shoqhi shikupuvae. Kughengu I no I pu-a lo ikughi luvae, eno Ampeu no piqhike toi I no Israel kükalakhü lo iqa no Israel Lhou Ampeu je ghenguno aki shiqhevae.

¹¹ Eno Ampeu no Israelmi sasü Puloshoqhi shikeu, I no Puloshoqhi bohu tipau tile qhive tsüae.”

Ikhiphekütsü Kighini

¹² Israelmi zülono Solomon no Ampeu kümlla khache lo puthugho no pa u sükhove.

¹³ Solomon no alazayi khache mlano aki alou amta lo qhipüa keu lo puthugho luve; ti ye akushulau eno akijelau aunhekipshe tsüni tüxaxa, eno akiqhelau aunhekipshe bidi tüxa. Pa no Israelmi kümtsü zülono qhoqhünhepe pa u kungugha küdau chhopuku,

¹⁴ eno inikhu, “O Ampeu, Israel Lhou, tsütsü qholo eno yeghi shou khumu O toikeu Lhou kühae! Nono O qemiqo no amlo kuchopu ikhiphepe aghokulu shi ake thaqhü lo, Ow timiqo sasü puloshoqhi shikeu pape, eno O kikimiye panongu lau pephe piyeke.

¹⁵ Nono I pu David lau shuphe keu shikupu tsüe. Nono O kichi lono piqhi eno O u no ishi tsala lono shikupu tsüke.

¹⁶ Tighenguno itehi, O Israel Lhou, Nono O qeu I pu David lau hitoi piqhi püakeu shikupu tsülo, ‘Nono I zülo cheche ketoi o nuliqo no tsaqütsalei xü, eno I yezah pelu aye, no ye Israel kükalakhü lo iqani keu timi püqümo nani.’

¹⁷ Tighenguno itehi, O Israel Lhou, Nono O qeu I pu David vilo pikeu tsa achipika tsülo.

¹⁸ “Ikemu Alhou ye kuchou no ayeghi lo xünani keshea? Julo, kungugha eno kungugha akiqheu thotsü O qhilu kepu-a ililai moe, tishiaye kishino I no aki hipau shipüa keu no ililai luni kea?

¹⁹ Ikeghi, O Ampeu I Lhou, o qeu no akighini shi akeu eno pa no khu akeu chilu tsülo, eno ishi, pa no ighamku O zülo akighini shi akeu ini tsülo,

²⁰ O nhethi no putho pucho aki hipau lo jupuku tsüalo, a-a hipau ye Nono, ‘I je tile anani,’ ipi püakeu shilu pelo, tishianguno o qeu no a-a hipau küdau jupuwo inikhu kelo Nono chilutsü nani.

²¹ Kughou o qeu ngo ow timiqo no akümllaki küdau juno inikhuni keno, panongu kighini chilu tsülo. Kungugha lo O kungo-a lono initsü lo eno kughou Nono chiluni keno ni kipimi qhitsülo.

²² “Timi lakhi no pa kisüghüu lau pimive no pa pelo ashoqhi shi penike O ki hipau lo akümlla-khache lono tushoqhi aye,

²³ Ow kungugha lono ini tsüno O qeu lau küghatha tsülo, eno küqüve keu lau aghime tsülo ikemu achipiu ye pa chipiu kiqi lono kümgha tsülo.

²⁴ “Ow timi Israelmi no O zülo axine shiveke ghenguno pano ghümi zülo tomlave, eno aki hipau lono panongu no O lau ideighi no O je kulu, eno akighini lono O lau ighamku aye,

²⁵ kungugha lono panongu tsa ini tsüno Ow timi Israelmi xine qhive tsülo, eno panongu sasü pano puasü tsükeu yeghi lo saghi tsülo.”

²⁶ “Kughou panongu no O zülo axine shive kehu atsütsü lono tsütsüghu lakhave, eno Nono panongu ghime kehu panongu no pano xine lono ideighini keno, panongu no a-a hipau lono akighini shi aye, eno O je kulu aye,

²⁷ kungugha lono ini tsülo eno O qemi Israelmi xine qhive tsülo. Tishino panongu no chewuni keu laghi kivi kiche tsüno Ow timiqo amheghi shi tsükeu yeghi lo tsütsüghu puwu tsülo.

²⁸ “Tsala aghakhu lo püqümiye ighi momu asa-agha, amülhü kushu no axaboqo fupithi, momu tülhaqu, aninga, momu aghümi no pano phughi khagho lono khasü luve, momu püsa eno aküsü kiukiu ighimu,

²⁹ khuana momu Ow timi Israelmi kümtsü no pütüta mlo ghime ithi no au sükhope akümllaki hipau lono kiukiu inikhu momu qhüiniju aye,

³⁰ O kungo-a kungugha lono, ini tsüno akipimi qhitsülo, eno pütüta mlo Nono ithi akeu kiqi lono, panongu lau mla tsülo kughengu O likhi no timi kümtsü mlo ithi anike,

³¹ tishikeu lono Nono ni puasüqo tsükeu yeghi lo Ow timiqo no küghüna ake tivilo, O sümsa ghi xüche peniye ke.”

³² “Titoi kughou inami lakhi khuu Israelmi kumo kemu aghakhu kushuo lono O jekipi eno O kumto ngo Nono O u sükhope akeu ghenguno ighi no aki hipau lono inikhuni keno,

³³ O kungo-a kungugha lono ini tsüno inami huno O vilo khukeu kiqi lono kümtsü shitsü lo, tishikeu lono ayeghi lo ashiaye kümtsü pelo ow timi Israelmi no No ithi eno O sümsa cheke toilu pelo, eno I no aki hipau mla püakeu ye O je vecheo mla kepi panongu no ithi peni.

³⁴ “Tsala ow timiqo no pano ghümi sasü aghü shinike wu aye, Nono kiukiu gholau no panongu puwu aghimu, panongu no aphughi Nono kishelu keu eno aki hipau I no O je ghenguno mlatsü keu küdau juno Ampeu lau inikhu aye,

³⁵ kungugha lono pano kighini ini tsüno pano vehupu shitsülo.

³⁶ “Tsala panongu no O zülo axine shive—kughengu axine shimo kemi khumu kühake—eno Nono panongu shou amlo ideve no aghümi u lo süvetsü, eno tipaqo no akughumi shi pano yeghi lo sawuve aye,

³⁷ akughushi akeu yeghi lono panongu no amlo pebide no xaide püzü pano ghümi yeghi lono O lau, ‘Nino axine shivae eno lhoksakügha shi xüvae,’ ipi ighamku aye,

³⁸ pano küghaluve kemi yeghi lono panongu no kuchou no xaide no ayeghi hipau Nono ni puasüqo tsükeu eno Nono kishephelu keu phughi hipau eno I no O ghenguno mlatsü keu ki hipau küdau juno inikhu aye,

³⁹ O kungo-a kungugha lono, ini tsüno pano vehupu shitsülo, eno Ow timi khunoqo O zülo axine shive akeno pano kipimi qhitsülo.

⁴⁰ O I Lhou, itehi O nhethi tsükho no O kini kughope aki hipau lono inikhu keu ini tsülo.

⁴¹ “Itehi ithulo, O Ampeu Alhou, No eno Ow Puloshoqhi kumto kulhokiqhi-a lo ilolo. O chinemi no xakulupu pepu pelo, Ow timiqo no O kivi lo alovilu pelo.

⁴² Ampeu Alhou, Nono nukisheve keu gi kughotsü kevilo! Nono O qeu David kimiye chekeu kümsülu lo.”