YEKIKITHI AKINIU 5 - Sumi Naga CL (Re-edited) Bible (BSI)

¹ Tipa ghola lono Solomon no Ampeu kümllaki lo akümla kümtsü shive. Pa no papu David no ikhiphepe akimtheshi tsükeu thime, ghükayi, ameshoyi, eno abohu kümtsü pesü Alhou kilo akini pekükütsü-a lo qhive.

Puloshoqhi Bohu Achineki lo Süghi

² Tithiu Solomon no Israel lo sakiphemi ngo ashiaye lo akütsüqo eno alitomi ishi Jerusalem lo kusü, ti ye David phughi lo, Zion lono Ampeuw Puloshoqhi Bohu pesü ighi nike kuto.

³ Aqhi akütsüniu aghulhu pine lono Israel lo kiptimi kümtsü akükau zülo kumqo luve.

⁴ Israel lo sakiphemi kümtsü kumqo luve kethiu Levi shiaye no Puloshoqhi Bohu peluve.

⁵ Eno panongu no Puloshoqhi bohu ngo kuposhukulu phiki ngo aphiki lo akimthe bohu kümtsü Levi chinemi no pesü ighive.

⁶ Akükau Solomon ngo Israelmi khunoqo pa zülo hekütsü keno kümtsü no Puloshoqhi bohu zülo kumqo, eno ambe ngo amshitsü kihikhakümla heqhipe mllae.

⁷ Tishino achinemi no Ampeuw Puloshoqhi bohu pesü achineki lo ilo alou akimthe chebo lo Shishe Akimthe-a lo cherubim küma qholo qhive.

⁸ Cherubim chishibo Puloshoqhi bohu shou sükhope püakeu no Puloshoqhi bohu ngo akipesüqo khonhave.

⁹ Akipesüqo ye kushuo kehu Shishe Akimthe-a khalau no pishipuwo ashe ithulu, ikemu Akimthe-a nguno khalau ye ithumlae; tipau ye ishi kutolo tile achephi.

¹⁰ Puloshoqhi bohu alou ye khaghi Israelmi no Egypt lono ipeche kelo Ampeu no panongu sasü Puloshoqhi shikeu, Moses no atupha kini Horeb lono süpüakeu nguno kütau ye kiumu kühae.

¹¹ Achinemi no akimthe-a lono ipeghive. Achinemi tile akeqo ye amqo ajeli kütüta lono ighi kemu kümtsü pütüta shikimtheve no ighi.

¹² Levi lagha lo alephemi kümtsü, Asaph, Heman eno Jeduthun, ngo panongu nuli eno pano thiküzümi no phepheike phimini pepusü ajoshi küghapayi ngo aheo eno akighi lebo pesü, akümlla-khache phivilo kipela küdau, afuko küighami achinemi pano 120 gholo puthugho.

¹³ Afuko küighami ngo alephemi no kümtsa Ampeu lau akishe le ngo shikimthikütsü le phe. Kughou afuko ngo küghapayi eno alebo jeliqo küigha keno alephemi ishi Ampeu shipili, “Kughengu Pa ye aloe, eno Paw iqemokeu kikimiye ye alholo achenie.” Ampeu chineki lo khüngküsü no chhitoive,

¹⁴ eno tipa ghenguno achinemi ye puthughope huthu mlave, kughengu Ampeu juküvü no Alhou ki chhitoive ke.